1 Kurin 12:13 - Udél Dwata: Gna Kesfasad ne Lomi Kesfasad

¹³ Lómón yó se yóm kdê tekuy lemolò ke Krays. Bè yóm tehe kehbabtays tekuy, henbalingen tekuy sotu lówó yóm Tulus Dwata, kihu ke Ju duhen ke là Ju le, ke tau klifen duhen là klifen le. Liman ke tek sotu lówó tekuy, abay se tek sotu yóm Tulus Dwata tendo nô bélê tekuy.

1 Kurin 12:13 Referans Kwoze

Ifisus 4:5

Tek sotu se yóm gónó tekuy mogot, ne tek sotu yóm hentahu tekuy, ne tek sotu se yóm gónó tekuy hbabtays.

Kulasi 3:11

Yó nefeten nim lomi klowil ni, laen dù bud gónón stólóng ne yóm tau Ju ne yóm tau là Juhen, yóm tau tnulì ne yóm tau là tnulien, yóm tau tólóng udélen, ne yóm tau laen dù tngónen, yóm tau klifen ne yóm tau là klifenen, abay se Krays yóm alì bong muhen bè kdéen, ne du se tendo nô bélê tekuy.

Glasya 3:28

Duhen yó, laen kô dù gónó ye stólóng kem tau hemtahu bè Krays, tau Ju duhen tau là Ju le, tau klifen duhen tau là klifenen, logi duhen libun. Tódô gotu senged yóm kdê ye lemwót bè yóm deng kessotu ye bè Krays Jisas.

1 Pitér 3:21

Yóm kegewà le yó ekni, hningónen yóm kegewà tekuy gu lem hatay bè yóm kehbabtays tekuy. Bè yóm kehbabtays ye, là kô mò lan mkó using bè lówó du, okóm yó lanen mò ilô yóm deng eles kehkodu ye bè Dwata anì kóhen yó kem salà ye, ne anì laen dù blóng ye ebéléen. Ne yó gónó ye gewà gu lem salà ye mlan bè yóm tehe klowil Dwata ke Jisas Krays gu lem hatay.

Sulat Pol Ebè Yó Kem Tau Hemtahu Bè Rom 3:29

Déke wen mon du, són kem tau Ju nogot Dwata, fen là yó kem tau là Ju le. Là kô yó du.

Kul Nmò 1:5

Bong ke Jan kun, él yóm gel babtaysen kem tau. Okóm tek hilu kdaw ne duen bnabtays Dwata yu bè Tulus Dwata.”

Kun Snulat Jan 4:10

Ne bnalà Jisas se yóm libun yó koni, monen, “Ke deng tngónem yóm tô blay Dwata kóm, ne ke tngónem yóm tau mni él béléem, dengi bud semwì mni él béléen ne anì benlayen uu yóm él hlowil tau.”

Kun Snulat Luk 3:16

Okóm yó udél Jan ebélê le, monen, “Béléu do, él gel babtaysu kuy. Okóm wen móyón sut hol mfasang sentahu. Là kóe knóón baluen ke olohu hesek béléen. Yó kun kmò kbabtays yó kem tau mimón béléen, suen bélê le yóm Tulus Dwata. Bong yó kem tau là mimón le, ofi moen kul.

Matyu 3:11

“Béléu do,” mon Jan, “él gel babtaysu kuy mò ilô yóm deng kehegsel ye. Okóm yóm huli do, yó kun kmò kbabtays yó kem tau mimón béléen, suen bélê le yóm Tulus Dwata. Bong yó kem tau là mimón le, ofi moen kul. Yóm tau huli do yó, tey mfasang sentahu. Là kóe knóón baluen ke heseke béléen.

Ifisus 5:26

Yó gónón matay anì wen lanen hembaling tekuy tau Dwata. Hólósen tekuy hlanen bè udélen ne bè yóm kehbabtays tekuy,

Kun Snulat Jan 4:14

Okóm yóm tau minum yóm él dou blay, là kóen na a bud meeng. Yóm él blayu yó, baling sfut él mò gónó gmuta yóm klowil laen dù sónen.”

Kun Snulat Jan 3:5

Bud bnalà Jisas se, monen, “Tódô tulónu kóm ktahuhen, là kóen gmung bè yó kem tau nogot Dwata ke là nan na mlan bè él ne bè yóm Tulus Dwata.

Kun Snulat Jan 1:33

Là kô tehe dilóu du se dou ke du yóm deng nélék Dwata ke là yóm deng eles ktulón Dwata du dou bè yóm tehe khógówen dou mò na a mabtays kuy bè él. Eles monen mò dou, ‘Sok tonem yóm dou Tulus htuntun gu tta ebè yóm sotu tau, ne angat tódô hlós nô béléen, deng duhen yó se yóm tau angat mabtays kuy yóm dou Tulus.’

Kulasi 1:27

Kun kóyô Dwata ke hegfanen bè yó kem kun tau ni kmoen ni yóm tehe gbuni bè yó kem tau gnan, duhen yóm tey któbóngen yóm kdéen tau bè klamangen benwu. Yóm tehe bunihen yó ekni, duhen yóm knô Krays bélê ye ket kuy ne sotu. Bè yóm knóen bélê ye yó, yó se gónó ye temngón du yóm angat kegbót ye bè klaen sónen kun klowil Dwata.

Ifisus 3:6

Ni se hol lemen yóm tehe bunihen yó, duhen yóm kehlan Dwata du bè yóm Tulón Hyu yóm khomongen kuy yu kem tau là Juhen bè yó kem hyu blayen bè yó kem Ju. Deng ye tahu baling kun fes lówó Dwata snéen kuy, ne wen kuy du snéen yóm tehe fasad Dwata bè yó kem Ju hlanen bè Krays Jisas.

Glasya 3:23

Gu laan tekuy là deng hemtahu he, hol lómón ke bnangguen tekuy yóm hlau. Là kô tekuy gewà du efet deng tngón tekuy yóm lan tekuy hemtahu bè Krays.

1 Kurin 10:2

Lemwót bè yóm klolò le yóm lobun ne bè tum kifal le yóm mohin, hol lómón ke deng le gotu hbabtays mò tau lemolò ke Musis.

Kun Snulat Jan 6:63

Tek són yóm Tulus Dwata gembek hlowil tau. Bong yó dum lówó tau, bà udì ke wen gmoen. Kdê ni kem udélu ebélê ye ni koni, hlowilen tau abay se hono lemwót gu bè yóm Tulus Dwata.

Ifisus 6:8

Hentulón ye nawa dé, ke hyu yóm nmò ye, bud hyu snéen yóm ofol blayen kuy yóm gónó tekuy mogot, senged se ke tauhi klifen duhen ke là.

Sulat Pol Ebè Yó Kem Tau Hemtahu Bè Rom 4:11

Deng gegna ne yóm kehtahu Abraham ke Dwata ominen yó he htulì. Hmò Dwata du yóm yó mò ilô yóm deng ktedeng ktonen du lemwót bè yóm deng kehtahu Abraham béléen. Ne duhen yó, lemwót bè yóm kehtahu Abraham ke Dwata, yó gónóhen baling mà kdéen tau hemtahu bè Dwata, baluen he ke là Ju le, ne baluen he ke là tnulì le. Tódô lemwót bè kehtahu le gónón tedeng kton Dwata kul.

Kun Snulat Jan 1:16

Deng tekuy gotu gomong lemen ne yóm tey klinggel nawahen ebè tau. Yóm któbóngen tekuy, tódô seflós, là kóen skó.

Isaya 55:1

Yó udél Dwata, monen, “Ó kem tau meeng, géhél ye edini ne ni wen él mò ninum ye. Ó kem tau laen dù filak le, géhél ye edini ne ni wen mò ken ye. Géhél ye edini ne ni wen mò ninum ye. Là heblihu du kuy nim ni.

Juwél 2:29

Bè yó kem kdaw yó, balù yó kem tóbóng lówó ye kewóten bè logi ne libun, angat suu bélê le yóm dou Tulus.

Sulat Pol Ebè Yó Kem Tau Hemtahu Bè Rom 3:22

Yó gónón baling tedeng kton Dwata tekuy, duhen yóm kehtahu tekuy ke Jisas Krays. Tu se nmò Dwata bè kdéen tau hemtahu bè Krays, laen kô dù mtukul néléken.