1 Kurin 1:1 - Udél Dwata: Gna Kesfasad ne Lomi Kesfasad

¹ Ou se Pol gónóhen lemwót nim sulat ni. Tódô lemwót bè kun kóyô Dwata yóm tehe kéléken dou mò sotu tau gel hógów Krays Jisas. Lewu me Sustinis nim nô bè ni, yóm sotu dumu tekuy setwoli.

1 Kurin 1:1 Referans Kwoze

Sulat Pol Ebè Yó Kem Tau Hemtahu Bè Rom 1:1

Ou se Pol yóm smulat ebélê ye ni, yóm sotu tau gel tóbóng lówó Krays Jisas. Deng nélék Dwata ou, ne deng tnabahen o mò gel hógówen mit yóm Tulón Hyu lemwót gu béléen.

Ifisus 1:1

Ou Pol gónóhen lemwót nim sulat ni. Hol lemwót bè kun kóyô Dwata yóm kbalingu tau gel hógów Krays Jisas. Nim sulat ni, hwitu ebélê ye yu kem kun tau Dwata bè Ifisus, yu kem tau deng ssotu bè Krays Jisas, kem tau là kóen monol nawa le ebéléen.

2 Kurin 1:1

Ou se Pol gónóhen lemwót nim sulat ni, lewu me Timuti, yóm sotu dumu tekuy setwoli. Hol lemwót bè kun kóyô Dwata yóm khógów Krays Jisas do. Smulate ebélê ye, yu kem tau hemtahu bè Dwata bè syudad Kurin, dalang se bè yóm kdéen tau Dwata bè klamangen prubinsya Akiya.

Kulasi 1:1

Ou se Pol gónóhen lemwót nim sulat ni, lewu me Timuti, yóm sotu dumu tekuy setwoli. Hol lemwót bè kun kóyô Dwata yóm kbalingu tau gel hógów Krays Jisas.

Kul Nmò 18:17

Lemwót yó kem tau là Ju le mdà bè yó, gotu sensogot le Sustinis, yóm tau malak bè gónó le gel stifun yó kem Ju, ne gotu sensuntuk le bè yó bè lewà yóm gónô gónó le gel skukum. Ton Galyu se, okóm tódô bayaen lu.

2 Timuti 1:1

Ou se Pol gónón lemwót nim sulat ni. Ou se sotu hógów Krays Jisas mlan bè kun kóyô Dwata. Hógówen ou mò hetngón du bè kdéen tau yóm klowil laen dù sónen deng fasad Dwata tekuy, hlanen bè yóm deng kessotu tekuy bè Krays Jisas.

1 Timuti 2:7

Ni se gónó Dwata hógów dou mò tmolok yó kem dumu tau là Ju le anì hentahu le yóm ktahuhen. Hol tahu nim monu ni, là kô kéngu du.

1 Timuti 1:1

Ou se Pol gónóhen lemwót nim sulat ni. Ou se sotu tau fen gel hógów Krays Jisas. Nim kógówu ni, hol lemwót bè Dwata, yóm deng lemwà kut gu lem hatay, ne Krays Jisas, yóm tendo hendón nangat te.

Ifisus 4:11

Bud du se koni gónón e gbak yóm tulón le yóm “kwen kenhulung blayen bè yó kem tauhen.” Wen se kem tau néléken mò aposol. Ne tólóng se tau néléken mò tugoden. Tólóng se gel hógówen mò tmolok bè yó kem tau là dengen hemtahu he. Bud tólóng se tau néléken mò malak yó kem tau hemtahu ne mò fen gel tmolok kul.

Glasya 1:1

Ou se Pol gónóhen lemwót nim sulat ni, yóm tau fen gel hógów Jisas Krays. Là kóen lemwót bè tau yóm gel kógówu ni, ne là kóen mlan bélê le snéen. Okóm tódô lemwót bè Jisas Krays lewu le Dwata, yóm Mà tekuy, yóm tehe hlowil ke Jisas.

Kul Nmò 22:21

Bud mon yóm gónóhu mogot mò dou, ‘Lemwóti ne, abay se mayuk gónóhu e hógów kóm elem blóng yó kem tau là Ju le.’ ”

Kun Snulat Jan 15:16

Là kô yu du mélék do, ou se fen mélék kuy. Yó gónóhu mélék kuy mò hógówu anì hol ye mungu, yóm kbungu laen kô dù tul sónen. Ke ni se nmò ye, balù kihu hni ye bè Mà mlan bè dou boluy, tódô blayen kuy.

2 Kurin 12:12

Yó se gónó ye milô du ou se sotu tahu hógów Dwata, duhen yó kem dê hentaw ton hmoen dou lem blóng ye, mung du yóm tey kganag nawahu.

2 Kurin 11:5

Bè dou kehedem du, là kóe na a glaan bélê le yó kem tau lembù mógów, yóm alì hegeta ye bè yó lem blóng ye.

1 Kurin 15:9

Yakà ou du yóm alì glaan bè yó kem tau gel hógów Krays. Là kóen knóón béléu ke tnaba le o sotu bè yó kem gel hógówen, bà mon se yóm tey tehe alì gel kehsideku yó kem tau hemtahu bè Dwata.

1 Kurin 3:9

Nim mi, stóbóng me mò nmò bè Dwata. Ne yu, hol lómón ke kun tniba Dwata. Sotuhen, lómón ke yu yóm gónô hdà Dwata.

Sulat Pol Ebè Yó Kem Tau Hemtahu Bè Rom 1:5

Mlan bè yóm Ngaen yó, wen tey hyu hmò Dwata dou, duhen yóm gel khógówen dou elem blóng yó kem tau là Ju le anì hol megdóyón Krays. Nitu yóm Tulón Hyu lem blóng le anì gbót nimón le Jisas se kul lemwót bè yóm kehtahu le béléen.

Kul Nmò 1:2

efet kól bè yóm kdaw khawayen ebè longit. Okóm yóm gu laanen là deng haway ebè longit, wen hloloen yó kem tau tehe néléken mò mit yóm kun tulón. Yóm hloloen kul yó hlanen bè yóm Tulus Dwata mò fen hetngón du kul.

Kun Snulat Jan 20:21

Ne bud mon Jisas mò kul, “Dwata he hol henek nawa ye. Lómón yóm tehe khógów Mà do, hol lómón yó se bud khógówu kuy.”

Kun Snulat Luk 6:13

Tikóng mwas bè yó, ominen htaba yó kem tau gel lemolò du, ne sfolò lewu yóm néléken bélê le mò gel hógówen. Ne boluyen kul aposol.

Kul Nmò 1:15

Bud sotu kdaw bè yó, gotu le stifun yó kem tau hemtahu, wen dô lematu bud lewu folò kwen le.

Sulat Pol Ebè Yó Kem Tau Hemtahu Bè Rom 1:10

Yó hol hnihu bè Dwata anì wen lanu hol mauy kuy ke lemwót bè kun kóyô, abay se deng tey kegenu ne tendo móló mógów edyó.

2 Kurin 8:5

Ya tey ketnga me du yóm kbong blay le. Okóm yó hol tanay nmò le, na le gotu hogot yóm gónó tekuy mogot yóm kul klowil. Ne lemwót bè yóm kimón le ke Dwata, bud gbót nimón le mi snéen kum.