1 Jan 2:17 - Udél Dwata: Gna Kesfasad ne Lomi Kesfasad

¹⁷ Wen sónen nim benwu ni, dalang se yóm kdéen kenbeyen nawa nô lemen. Yóm tau gel mò yóm kun kóyô Dwata, laen kô dù tul sónen yóm kun klowil.

1 Jan 2:17 Referans Kwoze

Matyu 24:35

Angat tódô kmanas yóm longit dalang se yóm tonok. Okóm yóm dou udél,” mon Jisas, “là kóen na a lana.”

Sulat Pol Ebè Yó Kem Tau Hemtahu Bè Rom 12:2

Bê ye abay lolò kul kmò yó kem tau là hemtahu le lem nim benwu ni. Hesfili ye ke Dwata yóm kehedem ye anì gtukul ye ke tedu yóm kun kóyô bélê ye, ne ke tedu yóm hyu ne yóm tedeng ne yóm mò gónón hligal.

1 Kurin 7:31

Béen són bè yóm gutahen lem benwu ni gónón nô nawan yóm tau, abay se angat gesón nim benwu ni, mung du yóm kdéen nô tahen.

1 Pitér 4:2

Yó gónóm mon, lenwóten ni ne efet kukol towok ye, yake hol nô bè nawa ye mò du yóm kun kóyô bélê ye Dwata. Bê ye abay bud nmung yó kem sidek knóyô lówó tau.

Hibru 10:36

Hol hanay ye nawa ye dé anì gmò ye yóm kun kóyô Dwata, ne anì guta ye yóm tehe fasaden kuy.

Mark 3:35

Yó se mimón yóm kun kóyô Dwata, yó se hol twolihu ne libunu ne yéu.”

1 Pitér 1:5

Hono kuy se funen yóm hyu yó. Ne lemwót bè yóm kehtahu ye, tódô senflós Dwata mofin kuy mlan bè yóm tey kegbeken. Yó gónón mofin kuy, abay se deng eles wen ne yóm klowil laen du sónen angat blayen tekuy, yóm hegfanen bélê tekuy bè yóm hol són kdaw.

1 Tisalunika 4:3

Yó hol kun kóyô Dwata bélê ye ke hol ye mólós ne ke laen dù bélê ye fen mò samuk.

Kun Snulat Jan 4:14

Okóm yóm tau minum yóm él dou blay, là kóen na a bud meeng. Yóm él blayu yó, baling sfut él mò gónó gmuta yóm klowil laen dù sónen.”

Kem Lingón 143:10

Tolokem o mò du yóm kóm kóyô, yakà uu du yóm do Dwata. Yó hem Tulusem he fen malak do anì laen dù gfau.

Matyu 7:21

“Là kô kdéen du yó kem tau mon du ou yóm gónó le mogot, angat gmung bè yó kem tau nogot Dwata,” mon Jisas. “Tek són olo gmung yó kem tau mimón yóm kun kóyô yóm Mà bè longit.

Sulat Jim 4:14

Hatan monem he ke deng tonem. Yakem eles tngónem yóm elem haya. Le hilu he kegenen mowil tau. Lómón ke kebel, tek likóten mbel, sana bud tódô kmanas.

Kun Snulat Jan 6:58

Duhen ni, yóm ken tulónu kuy ni, ni se yóm ken lemwót gu bè longit. Bede là mkélen bè yóm ken tehe gel ken yó kem fù tekuy ekni. Balù yóm kken le du, senged gotu katay le snéen. Okóm yó se tau mken yóm ken monu ni, angat gutahen yóm klowil laen dù sónen.”

Matyu 21:31

Bud mon Jisas, “Mahi du de bélê le mimón ke mà le?” Ne mon le se, “Yóm ngaen twogu.” Omin Jisas bud mon du mò kul, “Tódô tulónu kuy, mom gna mung bè yó kem tau nogot Dwata yó kem tau gel mtuk bwis, ne yó kem libun hdóyón. Là kuy, là kô ye na a gmung.

1 Tisalunika 5:18

Kihu mefet bélê ye, hyu duhen ke là hyuhen, senged nóm kdóyón ye ke Dwata. Yó se yóm hol kun kóyô bélê ye Dwata bè yóm deng kessotu ye bè Krays Jisas.

Kulasi 4:12

Tey gel kólóm Ipafras kuy snéen kun sotu tau lemwót dyó bélê ye, yóm sotu tóbóng lówó Krays Jisas. Tey gel knihen bélê ye bè Dwata anì hol hbegelen yóm kehtahu ye, ne anì hol gtukul ye yóm kun kóyô bélê ye Dwata ne anì hol gulit klolò ye du.

Kem Udél Hlalak Tehe Selumun 10:25

Sok wen glumfak gefet béléen yóm tau gel mò sidek hol lómón ke miwes klifus yóm tódô klanahen, okóm là kun yóm tau tedeng kmoen tódô kem sana yó ne kun laen kô sónen.

Kulasi 1:9

Yó gónóm mon, lemwót bè yóm kungol me du yóm kehtahu ye, là kóen skó yóm tendo gel kni me bélê ye bè Dwata. Yó gel hni me béléen anì hol hetngónen kuy yóm kun kóyô, hlanen bè yóm khulung hedem ne yóm khulung milô gel blayen tekuy yóm kun Tulus.

Kun Snulat Jan 7:17

Yó se tau móyô mimón yóm kun kóyô Dwata,” monen, “dilóen ke lemwót bè Dwata nim toloku ni duhen ke tódô lenbuu.

Kem Lingón 90:9

Igò me mowil, Dwata, igoen se nô ta me yóm kebutem kum. Sal dolong bè kegesón yóm klowil me.

Kem Lingón 39:6

Yóm igoen mowil te tonok yóm tau, hol lómón ke yóm olung. Tey kmoen nmò yóm tau, laen sem gónón e kól. Tey kendengen gel sentifunen, bede là tngónen du yóm tau angat mamà du.

Kem Lingón 102:26

Angat le gotu kmanas se yó, okóm kóm, laen kô dù nam e són. Hol le skél bè nes, angat le gotu bolok. Gotu tenlesem lu lómón nes, ne tódô le lana lem matahem.