Roma 4:5 - Tagbanwa Calamian

⁵ Piru yang taung anday nag̱atalig̱an na tung sadiling pag̱urubraen na ang para asan da rin ngausgaray yang Dios ang salu ra, kung indi, pagtalig da ilem ang bug̱us tung Dios ang yay pag̱usgad tung sasang taung malalain ang salu rang pisan tung pagterelengen na, yang pag̱usgad nang atia tung anya natetenged ilem tung pagtalig na, belag̱an ang mag̱aning ang ya ray maning pa tung sasang pinatengeran na, kung indi, ya ra ka ilem ag̱ipakdulay yang Dios ta diw̱aldi tung anya.

Roma 4:5 Referans Kwoze

Roma 3:22

Yang nag̱ipag̱usgad yang Dios tung mga tau ang salu rang pisan tung pagterelengen na ay natetenged ilem tung pagtalig nira yang mga sadili nira tung ni Jesu-Cristong mampatapnay. Ya ray buaten na tung kumpurming tinu pang tauay ang magtalig mag̱ing Judio man kag belag ay andang pisan ay pagsigwatan nira tung pagterelengen na.

Roma 10:3

Sanu pa nga tultulay nira tia naang anda nganing ay gustu nirang mamag̱intindi tung baklung ipinagpakigpaig̱ung naang pinagtukud yang Dios kung ya pa ag̱ari yang pag̱usgad na tung mga tau ang salu rang pisan tung pagterelengen na. Kung indi, yang nag̱asikad nira ang asan da ilem ngausgaray na tanira tung pagturumanen nira yang mga katuw̱ulan na. Purisu ya ray indi nira ipinagsuku tung anya ang para mampauyun da rin tung ipinagpakigpaig̱u nang atiang baklu ang para asan da rin ngausgaray na ta maning tia.

Roma 4:3

Kipurki pademdeman ta ra kanay yang sasang napabtang tung kasulatan ang mag̱aning, “Ti Abraham nagtalig da tung Dios ang magkereng tung sasang pinangakuan na tung anya, ig natetenged ilem tung pagtalig nang atii, asan da tanya ngaipabtangay yang Dios ang salu rang pisan tung pagterelengen na,” ag̱aaning.

Juan 6:29

Mag̱aning ti Jesus ang nagtuw̱al, “Ya taa yang dapat buaten ming para mauyunanamu ra anya. Magtalig̱amu ra ilem yang mga sadili mi tung yeen ang tinuw̱ul na.”

Juan 5:24

“Iugtulu tung numyu yang kamatuuran, kung tinu pay pananged tung bitalang naang nag̱ipagpakaw̱utu ang asan dag pagpailala yang pagtaralig̱en na tung ni Amang nagtuw̱ul tung yeen, may pagkatau na rang baklu ang ya ray pagnatisan nang asta tung sampa. Anda ray elatan nang sintinsiaan pa tung kalainan, kung indi, naliit da tung dating pagkatau nang alawid tung Dios ang nalakted da tung baklung pagkatau nang uyun tung Dios.

Marcos 9:23

Mag̱aning ti Jesus ang nagtimales, “Unu pay gustu mung ianing kung masaranganu? Kung tinu pay magtalig tung yeen, maimuanu ta maskin unu pa.”

Roma 4:6

Yang bag̱ay ang naa, yang pisan ay nag̱adapatan yang sasang inaning ni Adi David nun tukaw atiing pagkasambit na yang kasadyaan yang sasang tau ang inusgaran da yang Dios ang salu rang pisan, ang yang pag̱usgad na ta maning tia tung anya, andang pisan ay kalalabten yang pagburuaten na yang matitinlu.