Roma 3:8 - Tagbanwa Calamian

⁸ Abaa, kung tama yang katadlengan yang pagsulingaag ang atia, ig disir, maayen pang magbuatita ra ilem ta mga malalain ang para may pakaw̱utun nang matinlu ay asan da ka pala nga padengeg̱ay ta yang Dios buat! Atia pala maning kang pisan tia yang nag̱ipag̱insultu yang dumang pagbangdan tung yeen ang ya unu ay nag̱ipagpakaw̱utu tung mga tau buat. Yang mga taung mga maning tia, sintinsiaan da ka enged yang Dios tung kalainan ang ya ray magkatamang pisan ang buaten na tung nira.

Roma 3:8 Referans Kwoze

Roma 6:1

Ta, unu pay linagpakan yang ipinagpasanag̱ung atia? Aningen ta w̱asu ang kumus pinagpaitaanita ra yang Dios ta kaneeman nang tinapnay, padanayan ta ra ilem yang pagpakasalak ta ug̱ud mas pang paitaanita ra anya yang kaneeman na?

Roma 6:15

Ta, unu pay nalagpakan yang nag̱ipag̱aningung atia? Aningen ta w̱asu ang liw̱ianuita rang magpakasalak kumus belag̱anita ra suitu yang mga katuw̱ulan, kung indi, suituita ra yang Dios? Abaa, indi ra ka enged magkatama tia!

Roma 7:7

Muya may magsulingaag tung yeen ang maning taa, “Kung tama ang tung sasang katuw̱ulan asan da nga bungkad yang kalelyag̱anung magpakasalak, intunsis malain pala yang mga katuw̱ulan!” ag̱aaning. Yang matuw̱alu tung anya, “Abee belag ka! Kung indi, maning taa. Indi ra rin nasimanu ang may kalelyag̱anung magpakasalak kung belag tung katuw̱ulan. Kipurki indi ra rin nabilug̱anu kung unu pay palaksu yang pag̱aramlukun kung belag̱an tung sasang katuw̱ulan ang pag̱aning ang indiaw unu dapat ang mag̱amluk tung belag̱an yeen.”

Roma 5:20

Kung natetenged tung mga katuw̱ulan ang atiing ipinadapat yang Dios atiing tukaw, belag̱an sintru tung planu nang magpalibri tung mga tau, kung indi, ipinasagpi na ra ilem asan ug̱ud duun da nga maladmaray nira kung ya pa ag̱arig kalelbat yang paglalampasen nira. Piru kung ay pa tiing nanginlelebat da yang paglalampasen nira, duun da ka ngaipaitaay yang Dios yang kaneeman nang andang pisan ay natengeran na tung nira ang yay mas pang may timbang na kay tung paglalampasen nira.

Judas 1:4

Sanu pa indiamu aningenu ay kipurki may mga tau ra asan ang pamagsag̱usut da tung mga grupu mi ang indi mi ra nabantayan. Anda tung kuinta nira yang kalelyag̱an yang Dios. Yang bukling nag̱itulduk nira, kumus pinaitaanamu ra yang Dios ta kaneeman nang tinapnay tung diw̱aldi, ya ra ilem agbaliskaray nirang buaten ang sasang padatelan ang yang sasa unung tumatalig, maskin magpadayun da unu tung pagburuaten nang malalaway, anday bali unu tung Dios buat. Maskin nganing ti Ginuu tang Jesu-Cristong yay nanggawad tung nirang nagpakugmatay ang para ultimu ra ilem din tanya yang pangag̱alenan nira, ya pay indi nira ag̱ilalaen. Yang mga taung atia, nabuay ra kang lag̱ing naula tung kasulatan kung ya pa ag̱aring sintinsiaan yang Dios tung kalainan ang maning taa tung magdarasun ang sambitenu.

Mateo 5:11

Pati yamu, teed mi tia agkatinlu yang nag̱abtangan mi kung insultuenamu ra nganing ta duma natetenged tung pagtaralig̱en mi tung yeen ubin kung ya ra ka nganing ay ipandeeg-deeg nira tung numyu ubin kung ya ra ka nganing ay ipagpetel nira tung numyu ta sari-saring malalain ang pulus bukli.

2 Corinto 6:8

Ay kung kaisan maggalangenaw ka ta mupia yang mga tau, piru kung kaisan, magsawayanaw ka nira. Kung kaisan magdayawenaw ka nira ta maayen, piru kung kaisan mag̱insultuenaw ka nira. Mag̱aningenaw pa ta duma ang yuu unu sasang mandarayang pagpatalang tung mga tau. Piru yang nag̱akegnganu sulaminti ilem yang kamatuuran ang ipinagpabunayag yang Dios tung yaten.

2 Corinto 11:15

Purisu belag̱an makabew̱ereng kung yang nag̱apanuw̱ul na pamagpasuad-suad ka ang tanira nag̱apanuw̱ul ka ni Jesu-Cristong mamag̱erekelen tung pagburuaten yang matitinlu. Piru yang panampetan nira tung uri, pakdulan yang Dios ta parusang magkabag̱ay ang pisan tung mga inubra-ubra nirang atiang pagpandaya.