Marcos 4:1 - Tagbanwa Calamian

¹ Taa numanyan may uras ang ti Jesus nag̱intra si pasanag tung mga tau duun tung bakayan. Kumus durug damel yang mga taung namagtaripukpuk da tung anya, purisu naparugal-rugal dang suminaay tung balangay ang napaabwat-abwat ta gesye. Duun da ilem ngarung ang ya kag tatalunga tung mga tau asan tung bakayan.

Marcos 4:1 Referans Kwoze

Marcos 2:13

Taa numanyan, dayun dang naglampud ti Jesus tung balay ang nagpabakayan si. Numanyan may mga taung buntun ang namag̱arangay-angayan da tung anya ang ya ra kay pinanuldukan na natetenged tung bitala yang Dios.

Marcos 3:7

Taa numanyan nagpalikay ra ti Jesus ang minangay duun tung bakayan yang aw̱uyuk, kasiraan da ka tanira yang mga taung nag̱apangugyatan na. Buntun ang pisan yang mga taung namagpakignunut tung anya. May mga tag̱a Galilea, may mga tag̱a Judea, may mga tag̱a Jerusalem, may mga tag̱a Idumea, may mga tag̱a duw̱ali yang subang atiang pag̱aningen ang Jordan, may mga taung duun mamansiliit tung kakunayungan yang siudad yang Tiro may Sidon. Yang inangay yang mga taung atiang durug damel tung anya, nagkarabalitaan da natetenged tung nagkarabuat na.

Marcos 3:9

Kumus namanlag̱em da ilem asan yang mga taung atia, nanuw̱ul da ti Jesus tung mga taung atiang nag̱apangugyatan na ang tanya simpanan da kanay nira ta balangay ang kung may kaministiran na, ya ray saayan nang magpadistansia ta gesye ang para indi makipit yang mga taung atiang buntun ang pamagdarag̱umukan da tung anya.

Marcos 4:36

Purisu dayun da nirang binutwanan yang mga taung atiang buntun duun tung bakayan ang namansisaay tung balangay ang atiang pag̱akarungan kang lag̱i ni Jesus ang pagkatapus namagpaabwat da. May dumang mga balangay ang namagpaaway ka tung pag̱asaayan nira na Jesus.

Marcos 5:2

Pagkalampud ni Jesus tung balangay, may sasang taung pag̱aekel-ekelan ta dimunyu ang ya ray nagpakigbag̱as tung anya. Baklu ilem nanliit tung may mga leyang ang pinanlug̱uran ta mga patay ang ya ra kay pagpalaug-laug̱an na. Yang taung atia, anda ray masarang tung anyang begkesen pa ta kadina.

Marcos 5:21

Taa numanyan, nagpatindak si ti Jesus ang nagbalik ang ampir tung pinanliitan na, kasiraan da ka yang mga tauan na Pagparuung nira, buntun da yang mga taung namagpakigbag̱as dang namagtaripukpuk tung anya duun tung bakayan.