Lucas 18:20 - Tagbanwa Calamian

²⁰ Yang mga katuw̱ulan na, nag̱askean mu ra ka siguru. Ulitenu ra kanay ang ipademdem tung nuyu. ‘India maglimbung tung kasawa mu, india mangimatay tung masigkatau mu, india manakaw, india manistigus ta bukli tung katalungaan yang ustisia, ig galangen mu ti tatay mu may ti nanay mu.’”

Lucas 18:20 Referans Kwoze

Roma 13:9

Kipurki kung isip-isipen ta yang mga katuw̱ulan yang Dios, maning taa yang palaksu yang duma ang nag̱adapat tung pagpakignunut ta tung aruman tang tau. Indiita unu maglimbung tung kasawa ta, indiita ka unu mangimatay ta masigkatau ta, indiita ka unu manakaw ta belag̱an yaten, indiita ka unu mag̱amluk tung belag̱an yaten. Maskin may duma pang duun ka yang rumbu nira, tanira kang tanan lug̱ud da tung sa nga katuw̱ulanan da ilem ang gegmaan ta unu yang masigkatau ta ang katulad ka tung paggeregmaen ta tung mga sadili ta.

Efeso 6:2

Demdemen mi ra ka kanay yang sasang katuw̱ulan ang ipinagpadapat yang Dios ang mag̱aning, “Galangen mu ti tatay mu may ti nanay mu,” ag̱aaning. Nag̱askean mi tia, yay pinakaimpurtanting katuw̱ulan ang dapat intindien ming mga mamula. Pinanuntan na pa ngani ta pangaku na ang mag̱aning, “Yay tumanen mu ug̱ud magkatinlu ra yang pagkabetang mu ig malawig da ka yang kabui mu tung katanekan,” ag̱aaning.

Colosas 3:20

Yamung mga mamula, magpanangeramu rang pirmi tung mga ginikanan mi, ay yang pagpananged mi tung nira yay nag̱auyunan ang pisan yang Dios ig ya kay magkabag̱ay tung numyung kumpurming pagkinapulitay ra ni Ginuung Jesus.

Roma 3:20

Kipurki andang pisan ay taung mausgaran yang Dios ang salu ra tung pagterelengen na natetenged tung pagturumanen na yang mga katuw̱ulan na, sindu andang pisan ay taung mapagsepet asan. Asan da ngani tung mga katuw̱ulan na nga bilug̱ay ta ang ita talagang makinasalananen.

Lucas 18:19

Mag̱aning ka ti Jesus ang nagtimales, “Muya indi mu ilem nag̱askean kung unu pay linagpakan na atiing inaningaw ra nuyung maayen. Anday dumang sarang ang maaning mung maayen kung indi ultimu ilem yang Dios.

Lucas 18:21

Ag̱aaning ka yang taung atiang nagtimales, “Piru elat kanay, Ameey. Yang tanan ang atiang mga katuw̱ulan ang sinambit mu, luw̱us dang nag̱atumanu mag̱impisa pang atiing paran-paranaw pa.”