Lucas 11:1 - Tagbanwa Calamian

¹ Taa numanyan may dumang kaldaw ang ti Jesus pag̱ampu tung Dios duun tung sasang lugar. Numanyan pagkatapus yang pag̱arampuen na, mag̱aning yang sasang nag̱apangugyatan na tung anya, “Ginuu, tuldukayami kang mag̱ampu ang katulad ka tung binuat ni Juan ang manigbenyag tung mga tauan na,” ag̱aaning.

Lucas 11:1 Referans Kwoze

Judas 1:20

Piru ta yamung nag̱amaalu ta duru, maskin maning da tiag kaliwag, pirmiamung magsarasaan ang magparaketel-ketelan ug̱ud asan da magbaked yang pagparanangeren mi tung kamatuuran ang yay sagradung bitala yang Dios ang nunut da ka ta pagturumanen mi. Kada mag̱ampuamu ra nganing, yang Espiritu Santo, ya ra kay pirming papagmanguluen mi.

Lucas 6:12

Taa numanyan, may pira pang kaldaw ang nagtaklib, ti Jesus nagpaelak-elak da duun tung kabukiran ang para mag̱arampuen da tung Dios. Nagdamal da duun tung pag̱arampuen na.

Lucas 9:18

Taa numanyan, may dumang kaldaw ang ti Jesus nag̱ampu ang tanya ilem ang sam bilug. Pati yang mga taung nag̱apangugyatan na duun ka. Matapus ta pag̱ampu na, dayun dang nagtalimaan tung nirang mag̱aning, “Elat kanay, ang yuu pagkeresen-kesenan ta mga tau, unu pay pagpabetang nira tung yeen?”

Mga Hebreo 5:7

Atiing ti Ginuu ta taa pa rin tung kaliw̱utan ang naa, tedek ang pisan tung isip na yang pag̱arampuen na tung Dios ang yay sarang ang mapagpalibri tung anya tung kamatayen ang atiing pag̱atalungaan na. Pinadegte na pa ka enged nganing yang pag̱arampuen nang atii ang nunut da ka ta pagtarangiten na ang kaisan ya ra kay pinag̱isyakan na. Ang pagkatapus, natetenged tung pagparanek nang nagpauyun tung kalelyag̱an yang Dios, asan da pamatiay nang pinaktel ang mag̱agwanta tung maagmaan nang pinitinsia.

Lucas 9:28

Numanyan atiing pagpanaw ra ta mga san linggu tung pagkainambit ni Jesus yang mga bag̱ay ang atia, nanungul da tung sasang bukid ang para duun da mag̱arampuen tung Dios. Pati ti Pedro may ti Juan durua ni Santiago ingkelan na ra ka duun.

Lucas 7:13

Numanyan pagkaita ni Ginuu ta tung may ana, ya ra ngaildaw ang mag̱aning tung anya, “Ineey, ustu ra tiang pagtarangiten mu,” ag̱aaning.

Lucas 10:42

Piru sam bilug ilem yang dapat ang impurtaen. Yang ipinalandaw ni Maria, ya ra yang durug tinlu ang indi ra enged mabawi tung anya,” mag̱aning.

Lucas 11:2

Kapurisu, mag̱aning ti Jesus ang minles, “Kung mag̱ampuamu ra nganing tung Dios, maning taa yang ianing mi tung anya: ‘Ama, taw̱angayami ka ang para yang panggalang yamen tung nuyu mag̱atu tung pagkadios mung durung pisan agkasagradu. Gustu yamen ang tung makali ipabistu mu ra enged ang pisan yang paggaraemen mu tung tanan.