Efeso 3:6 - Tagbanwa Calamian

⁶ Maning taa yang palaksu yang planu nang atia. Pati yang belag̱an mga Judio puidi ra kang pakaayenen yang Dios, kasiraan da ka tanira yang mga Judio. Puidi ra kang pasakepen na tung mga tauan nang baklung paeyang na, kasiraan da ka tanira yang mga Judio. Puidi ra kang pakdulan na ta kalibrian nira ang pinangakuan na tung kumpurming tinu pay magtalig yang sadili nira tung ni Jesu-Cristo, kasiraan da ka tanira yang mga Judio. Mainabu ra tia kung mananged da tung Matinlung Balitang nag̱ipagpakaw̱ut da tung nira.

Efeso 3:6 Referans Kwoze

1 Juan 2:25

Dispuis ya taa yang pinangakuan yang Dios tung yaten ang kumpurming pagpadayun tung pagpakigkapulit tang atia tung anya. Tugtanita anyang magpakigsapen tung anya ang asta tung sampa.

1 Juan 1:3

Kapurisu pagpaintindiami ra nganing tung numyu natetenged tung taung naang nag̱asambitung naita yamen kag nagngel yamen ug̱ud magpakiglaketamu ra ka tung pagsarasaan yamen yang Ama tang Dios durua yang pag̱aningen nang Ana Na ang ya ra ti Jesu-Cristo.

Galacia 3:14

Yang katuyuan nang nagpalibri tung yaten tung maning tiang papanaw ay ug̱ud pati yang maning tung numyung mga tag̱a duma-rumang nasyun mapakaayenamu ra ka yang Dios ang katulad ka tung inaning na tung ni Abraham, bilang mausgaranamu ra anyang saluamu rang pisan tung pagterelengen na natetenged ilem tung pagpakugmatay ni Jesu-Cristo. Yadwa pa, ekel tung pagtalig ta tung ni Jesu-Cristo, asanita ra ka nga patiniray yang Dios tung Espiritu Santong pinangakuan na.

1 Corinto 12:27

Anday dumang linegdangan yang nag̱ipananglitung naa, kung indi, yamung tanan maning pa tung tinanguni ni Jesu-Cristo asan tung Corinto. Ig sasa may sasa tung numyu, maning pa tung mga parti-parti yang tinanguni na.

Colosas 2:19

Yang taung maning tia, namalpas da tung ni Ginuung Jesus ang ya ra kay natengeran na ang pati yang matuud ang nag̱itulduk natetenged tung anya, ipinlek na ra ka. Ay ti Ginuung Jesus yay maning pa tung sasang kulu. Katulad tung kulu ta ang yay pag̱erekelen tung kabilug̱an yang tinanguni ta ang may mga ulaan kag kaulatan nang pagsurugpat-sugpatan, tanya kay pag̱erekelen tung kabilug̱an yang tanan ang mga tumatalig ang salegsa-salegsang pundaan ang yay maning pa tung tinanguni na taa tung katanekan ug̱ud mag̱umintu rang mag̱umintu ang uyun tung pinagplanu kang lag̱i yang Dios.

Efeso 5:30

Ay kipurki itay maning pa tung mga parti-parti mismu yang tinanguni na.

Efeso 5:7

Purisu indiamu ra enged magpaguyud tung nira ang magpakled tung mga ubra-ubrang mga maning tia.

1 Corinto 12:12

Maayen pa, ipananglitu ra kanay yang gustuung ianing tung tinanguni ta sasang tau. Maskin sam bilug ilem ka man, piru durung mga parti-parti na, ig maskin durung mga parti-parti na, sa nga tinangunian ka ilem yang pamilug̱an nirang tanan. Yang pisan tia ay kaalimbawaan ni Jesu-Cristo ang yay pamilug̱an ta.

Galacia 5:24

Dispuis kumpurming tinu pay pagkinapulitay ni Jesu-Cristo, pinangindian da nirang tinalyuran yang dating pagkatau nira pati yang dating mga kalelyag̱an nira ang kung kaisan anda ray teregkaan. Kung duun ipananglitayu tung ni Jesu-Cristong ilinansang tung krus, maning pa tung ipinaumid da nira tung anyang ilinansang.

Efeso 3:3

Ay pinabunayag̱anaw ra anyang pinapag̱intindi ta maayen natetenged tung planu nang nag̱aegteman na pa rin tiing tukaw ang sigun tung kamtangan na, ya ray isinulatu ta diput ka ilem.