2 Timoteo 3:1 - Tagbanwa Calamian

¹ Timoteo, naaw̱a may sasang bag̱ay ang yay dapat ang intindien mu ta maayen. Baklu maglekat ti Ginuung Jesus, may uras ang kaw̱utun ang durug liwag.

2 Timoteo 3:1 Referans Kwoze

2 Pedro 3:3

Yang impurtanting maintindian mi ang baklu ra maglekat ti Ginuung Jesus, may mga taung mamansiluang mamagtag̱am ta saway tung numyu natetenged tung pagpakbat mi tung anyang maglekat. Yang ug̱ali nira, indi enged temegka ang indi ra nira mapapsawan yang mga kalelyag̱an nirang anday sayud.

2 Timoteo 4:3

Ya ray dapat ang prusigiran mu ay kipurki may uras ang kaw̱utun ang yang nag̱itulduk tang naang tama, indi ra mauyunan ta mga tau, kung indi, mamandawal da ilem ta mga manigtulduk ang magpagngel tung nira yang kumpurming unu pay uyun tung isip nirang magngel. Yang nag̱ipagsagyap nira tung mga taung atia, ay yang gustu nira mamagpapsaw ra ilem tung sadiling kalelyag̱an nira.

1 Juan 2:18

Yamung magkaw̱ig̱enung mga anaw, kung isip-isipenu, midyu tung alenget da yang pagtapusan yang panimpung naa. Nagngel mi ra ka ang tung uri may sasang taung maglua ang yay magpakigkuntra tung ni Ginuung Jesu-Cristo. Ang pagkatapus numanyan ang mga panguras ang naa, dakele rang mga palatkaw nang pamaglua. Purisu asan da nga pamalaray ta ang alenget da yang pagtapusan yang panimpung naa.

Judas 1:17

Piru ta yamung nag̱amaalu ta duru, pademdeman mi ra ka yang inula ra kang lag̱i yang mga apustul ang atiing tinuw̱ul ni Ginuu tang Jesu-Cristong magpaliked yang Matinlung Balita natetenged tung anya asan tung numyu.

Judas 1:18

Pinagpaamananamu rang lag̱i nirang pinag̱aning ang, “Baklu ra maglekat ti Ginuung Jesus, may mga taung mamansiluang mamagtag̱am ta saway tung numyu ang kalukuan da ilem unu yang kamatuuran ang naang nag̱apananged mi. Yang ug̱ali nira, indi enged temegka ang indi ra nira papsawan yang mga kalelyag̱an nirang magbuat ta makalalaway ta isip yang Dios,” mag̱aning.