1 Corinto 7:29 - Tagbanwa Calamian

²⁹ Yang gustuung ianing tia, mga putulu, kumus diput da ilem yang timpung ipanirbian ta tung ni Ginuu ta, mintras indi pa nag̱alkat ti Ginuung Jesus, kaministiran ang yang mga bag̱ay-w̱ag̱ay taa tung kaliw̱utan ang naa belag̱an ang ya ipalusuay ta. Ya ra ka man taang nag̱ipag̱aningu tung numyung mga lalii ang may mga kasawa ang yang pagkakasawaan ming atia, indi mi ilem pagamenan ta mga isip ming subra ay muya asan da nga pabaya-w̱ayaay mi yang pagprusigir mi tung nag̱ipaubra ra rin ni Ginuu ta tung numyu.

1 Corinto 7:29 Referans Kwoze

1 Juan 2:17

Ayw̱a magpagamenita asan sindu magtataklib da ka ilem pati yang kumpurming nag̱alelyag̱an yang pamagpaguyud, ya ka. Piru kung tinu pay pagtuman yang kalelyag̱an yang Dios, yay magnatis tung anya ang asta tung sampa.

1 Corinto 7:31

Bilang kada magbuatita ta maskin unu pang bag̱ayay ang yay kadagmitan ang nag̱abuat yang mga tau sigun tung pagpangabui nira taa tung kaliw̱utan ang naa, indi ta ra ilem pagamenan ta mga isip ta ang alus pa ilem ya ra ilem tiay nag̱atalunga ta, nusias mapabayaw̱ayaan ta yang nag̱ipaubra ni Ginuu ta tung yaten. Tutal yang sistima yang kaliw̱utan ang naa pati yang tanan ang pag̱urubraen taa, magkarapareng da ka ilem.

1 Pedro 4:7

Alenget da ilem yang uras ang pagtapusan da yang tanan ang pagkarainabu taa tung kaliw̱utan ang naa. Purisu kaministiran ang pirmi tung magkatama yang palaksu yang pag̱irisipen mi ang nunut da ka ta pagsuspindi mi tung mga sadili mi ug̱ud mapag̱ampuamu ra ta ustu tung Dios ang bilug tung mga isip mi.

1 Pedro 1:24

Yang palaksu yang bitala na katulad ka tung sasang sinambit tung kasulatan ang mag̱aning, “Yang tanan ang mga tau magkapariu ka ilem tung ilamunun, Ig yang kadengeg̱an nira magkapariu ka ilem tung talay ta ilamunun. Pag nanlumpayeng da ngani yang ilamunun, Yang talay na magkarataktak da ilem. Piru yang bitala ni Yawi dumayun ang asta tung sampa,” ag̱aaning.

1 Corinto 7:28

Piru kung talagang mangasawa ra ka enged, indi ka pagpakasalak tung Dios. Pati yang sasang darala, kung magpakasawa, indi ka pagpakasalak. Ingkasu ilem, yang duruang magkasawa durung mga kaliwag̱an ang talungaen nira natetenged ka man tung panimpu tang naang durug liwag ig gustuu ang basi pa ra ilem yay malikayan nira.

1 Corinto 7:30

Maskin ag̱ampayanita ra ta kapupungawen tang duru ang nunut da ka ta pagtarangiten ta, indi ta ra ilem pabilug̱an ta isip tang alus pa ilem ya ra ilem tiay nag̱aisip ta, kung indi, ipabtang ta ra ilem ang midyu tung anda kay pagpungawan ta. Maskin ag̱angepenita ra ta kasadyaan tang duru, indi ta ra ilem pagamenan ta isip tang masyadu, kung indi, ipabetang ta ra ilem ang midyu tung anda kay pagpakasadyaan ta. Kung mangalangita ra nganing ta maskin unu pang bag̱ayay, ipabetang ta ra ilem ang midyu tung anda ra kay inalang ta ang para indi ta ra mapabaya-w̱ayaan yang nag̱ipaubra ni Ginuu ta tung yaten.

Lucas 14:20

Yang sam bilug kang imbitasiun, yang anyang baliw̱ad maning taa: ‘Bakluaw ilem ang pisan nga kasawa. Purisu indiaw ra siguru masakep,’ ag̱aaning. Maning dang maning yang baliw̱ad yang mga tau.