1 Corinto 4:12 - Tagbanwa Calamian

¹² Pati yang ulas yamen magbew̱eek tung pagpakabedlay yamen ang para maitaami ilem ta pangabui yamen. Kung palagpakanami ta mga bitalang malalain, yang nag̱ibles yamen tung pagpalagpak, ya ra ilem ag̱ipag̱ampuay yamen ang pakaayenen da yang Dios. Kung deeg-deeg̱anami ta duma, mag̱agwantaen da ilem yamen tung mauray ang kinaisipan.

1 Corinto 4:12 Referans Kwoze

1 Pedro 3:9

Indiamu enged mangimalesan tung nagbuat ta malain tung numyu. Indiamu ka mag̱insultu tung nag̱insultu tung numyu. Kung indi, anday dumang ibles mi tung nira, ya ingalukay mi tung Dios ang pakaayenen na ta mupia natetenged ya ra ka man ay ipinagbeteng na tung isip mi atiing primiru ang ya ray buaten mi tung mga masigkatau mi ug̱ud asanamu ra ka nga pakaayenay na.

Mateo 5:11

Pati yamu, teed mi tia agkatinlu yang nag̱abtangan mi kung insultuenamu ra nganing ta duma natetenged tung pagtaralig̱en mi tung yeen ubin kung ya ra ka nganing ay ipandeeg-deeg nira tung numyu ubin kung ya ra ka nganing ay ipagpetel nira tung numyu ta sari-saring malalain ang pulus bukli.

Roma 12:14

Kung may mga taung pamagpandeeg-deeg tung yaten arangan da ilem tung pagtaralig̱en ta tung ni Jesu-Cristo, indi ta ra ipag̱ampu tung Dios ang para padalpetan na ta malain, kung indi, ya ag̱ipag̱ampuay ta ang ya ra pakaayenay na.

Roma 12:20

Kung indi, yang buaten ta, mag̱usuyita ra ilem tung sam bilug ang bitalang nabtang ka tung kasulatan ang mag̱aning, “Kung alimbawa nag̱asuw̱uk da yang pagpakigsuay tung nuyu, papaanen mu. Kung alimbawa agkanalen da, paigmen mu ka ta wai. Ay asan da nga paeyak natetenged tung pagpakigsuay na tung nuyu,” mag̱aning.

Mga Binuat-buatan 18:3

Pagkatapus duun da ka nagdayun tung nira. Nagbarakasan da tanira dayun tung trabaw natetenged tanira parariu ka ta pangitang mga manigtiik ta mga tarapal.

Lucas 6:28

Kung iampuamu ta duma tung Dios ang ituluy tung kalainan, anday dumang ibales mi tung anya, tanya si kay iampu mi tung Dios ang pakaayenen na. Asta yang mga taung mga manlelepes tung numyu, ya ka, iampu mi ka tung Dios ang para pakaayenen na.

1 Pedro 3:14

Piru maskin tigbakenamu pa ka enged natetenged tung pagburuaten mi yang magkatama, durug katinlu yang nag̱abtangan mi. Indiamu ilem mag̱eled tung pagpapinitinsia tung numyu, indiamu ra ka magpataranta.

1 Pedro 2:23

Atiing tanya ininsultu yang mga tau, indi ra enged nangimalesan tung nag̱insultu tung anya. Atiing tanya pinapinitinsiaan ta malbat, indi ra enged nagpauras tung mga taung namagpapinitinsia tung anya, kung indi, itinalig na ra ilem yang tanan ang atiang malbat tung Dios ang yay pulus tama yang sintinsiang nag̱ipakdul na.

Lucas 23:34

Numanyan ti Jesus tanya, nag̱ampu ra tung Dios ang mag̱aning, “Ama, patawaren mu tanira kipurki indi nira nag̱amaresmesan yang pag̱abuat nirang naa,” ag̱aaning. Numanyan anday dumang binuat yang mga sundalu, namagburunutan dang para maintindian da kung unu pang pidasuay ta mga aw̱el ni Jesus yang maeklan yang sasa may sasa tung nira.

Mateo 5:44

Piru ya ra taa yang yeen ang pag̱irintindien tung bag̱ay ang atia. Yang dapat ang gegmaan mi pati yang mga taung pagpakigsuay tung numyu. Kung may asan ang pagpandeeg-deeg tung numyu, ya ipag̱ampuay mi tung Dios ang pakaayenen na.

Mga Binuat-buatan 7:60

Pagkatapus, dayun dang nagluud ang yang busis na ya ray padakulay nang mag̱aning, “Ginuu, indi mu ra idata tung nira yang kasalanan nirang naa,” mag̱aning. Pagkaaning na tia, baklu ra nadayunan. Numanyan ti Saulong naang pinapagbantay nira yang mga lambung nira, nagpauyun da ka tung disisiun nirang mangimatay tung ni Esteban.

Juan 15:20

Demdemen mi yang inaningu tung numyu ta nungayna ang yang sasang kirepen belag̱an landaw tung ag̱alen na. Kapurisu kung yuung ag̱alen mi nag̱adeeg-deeg̱enaw ra nganing nira, pati bitalaw indi ra ka nganing nag̱apauyunan nira, asta yamung nag̱apangugyatanu, deeg-deeg̱anamu ra ka nira, asta bitala mi indi ra ka pauyunan nira.

Judas 1:9

Piru, maskin nganing ti Miguel ang sasang angil ang pag̱atuw̱ul yang Dios ang abwat ta katengdanan, indi ra ka nganing nagsaway. Ay atiing pagtinuw̱alay ra tanira ni Satanas tung katalungaan yang Dios natetenged tung tinanguni ni Moises kung tinu pa tung nirang durua ay may kagaeman, indi nagpabetang tung sadili na ang tanya may kagaeman nang magsintinsia tung ni Satanas ang puiding insultuen na, kung indi, ya ra ilem ag̱aningay nang, “Ti Yawi, ya ra ilem ay magsintinsia tung nuyu.”

1 Timoteo 4:10

Ya ra ka nganing ay natengeran na ang pagpakabedlayitang pagpaawat tung pag̱urusuyun ta tung kalelyag̱an yang Dios. Kipurki tanyang makagag̱aem yay pag̱ineteg̱an yang isip tang pakdulanita ra anya yang pinangakuan na ang tanya ka man yang manigpanapnay tung maskin tinu pang tauay bilang tung kumpurming magtalig yang sadili na tung ni Ginuung Jesus.

2 Tesalonica 3:8

Indiami ra ka nganing nagpasuitu maskin tung ninu pa, kung indi, law̱iig kaldaw nagpakabedlayaming nagtrabaw basta indiami ilem mapagpalbat tung numyu.

1 Tesalonica 2:9

Mga kaputulan, siguru nag̱ademdeman mi ra ka ang belag̱an ilem gesye yang bedlay yamen ang nagtrabaw asan. Sipurki law̱iig kaldaw yang pandilem yamen yang pagpangabui yamen basta indiami ilem mapagpalbat tung numyu. Ya ra ilem ibalakyang-balakyangay yamen yang pagparakaw̱utun yamen tung numyu yang Matinlung Balitang naang liit tung Dios.

1 Corinto 9:6

Ayw̱a, yami ilem ni Bernabe ang anday rasun yamen ang imbis mandilemami yang pagpangabui yamen, magpasuituami ra ilem tung mga kaputulan sigun tung pagkaapustul yamen?

Mga Binuat-buatan 20:34

Mismu yamung tanan nag̱akdek ang yang kalimaung naang durua ay nag̱ubra ang para maitaw yang tanan ang kaministiranu pati kaministiran pa yang mga arumanu.

1 Pedro 4:19

Kapurisu kung nainu pa asan tung numyu ay nag̱apasaran ta mga pinitinsia sigun tung pagturumanen na yang kalelyag̱an yang Dios kung yay uyun tung planu na tung nira, kaministiran ang iintriga ra nira yang mga sadili nira tung anyang ya ka man ay nag̱imu tung nira ig talagang yay matalig̱an nirang magkereng tung tanan ang pinangakuan na tung nira. Ig yang pagtaralig̱en nira asan da ka nga papruibaay nirang mabaked ekel tung pagpadayun nira tung pagburuaten nira yang matitinlu.

Roma 8:35

Kapurisu kumus maning da ka man tia, anda enged ang pisan ay sarang ang mabuat yang mga tau tung yaten ubin maskin unu pa man ang bag̱ayay ang mapasaran ta ang yay pagsangkelan yang paggeregmaen ni Jesu-Cristo tung yaten. Maskin paliwag̱anita pang papinitinsiaan, maskin deeg-deeg̱anita pa natetenged ilem tung pagtaralig̱en ta tung anya, maskin pasubkanita pa, maskin pakulanganita pa ta pag̱araw̱elen ta, maskin ideselita pa tung may karisguan na, maski nganing ang patayenita pa, indi ka enged mag̱uman yang paggeregmaen na tung yaten.

2 Corinto 11:8

Kuw̱ali pinanakawanu ra ilem yang duma-rumang grupung nagpaekel ta supurta tung yeen basta mapagpadag̱en-dag̱enaw ra ilem tung numyu ta diw̱aldi.

Efeso 4:28

Kung may asan tung numyung takawan pa rin atiing indi pa nag̱apagsuku tung ni Ginuung Jesus, indi na ra enged balikan ang egnaan. Kung indi, numanyan magpakabedlay rang mangita ang yang mga kalima nang atiang mabtik pa rin ang manakaw, ya ray gamiten nang ipabtik tung ubrang matitinlu ug̱ud maita ta mga kaministiran na ig may mataw̱ang na pa tung aruman nang nag̱aliwag̱an.