1 Corinto 1:31 - Tagbanwa Calamian

³¹ Nagkamaninganamu ra ta maning tia ay ug̱ud magkamatuud da tung numyu yang sasang bitalang nabtang tung kasulatan ang mag̱aning, “Kung tinu pay malelyag ang magpabantug, kaministiran ang ultimu ra ilem ti Yawi ya ray ipabantug na,” mag̱aning.

1 Corinto 1:31 Referans Kwoze

2 Corinto 10:17

Yang linyang nag̱ausuyu ya ra yang sasang sinambit tung kasulatan ang mag̱aning, “Kung tinu pay malelyag ang magpabantug, belag̱an yang sadili na ya ipabantug̱ay na, kung indi, ultimu ra ilem ti Yawi, ya ray dapat ang ipabantug na,” mag̱aning.

Filipos 3:3

Yang pagpabetang nira tung mga sadili nira, tanira unu yay ultimung mga tauan yang Dios ay natetenged binuatan da ta tanda yang mga tinanguni nira. Piru ta yaten ang mga tumatalig tung ni Jesu-Cristo, itay matuud ang mga tauan yang Dios natetenged tung Espiritu Santong pagtinir da tung yaten ang itag paktelay nang para mapagtuuita ta ustu tung Dios. Sulaminting nag̱apanalig̱an tang nag̱ipagpabantug, ultimu ra ilem ti Jesu-Cristo. Andang pisan ay dumang panalig̱an ta, mag̱ing sasang ubraen tung mga tinanguni ta, mag̱ing sasang ubraen ta man tung sadiling puirsa ta ang para asanita ra rin nga risibiay yang Dios.

Roma 4:2

Kipurki kung alimbawa tanya inusgaran yang Dios ta maning tia natetenged tung pagburuaten nang matitinlu, intunsis puidi ka rin ang yay ipagpabug̱al na tung mga kaarumanan na, piru tung Dios indi ra ka enged mapuidi tii.

1 Corinto 4:6

Yang mga bag̱ay ang atia ipinadapatu tung yamen ni Apolos ang para tung numyu ug̱ud tung yamen ni Apolos ngaitaay mi yang mulidu kung unu pay tamang pag̱urusuyun tung sasang matinlung kunsiu ang indi ta unu pasubraan yang gustung ianing yang napabtang tung kasulatan. Yadwa pa ang para sasa may sasa tung numyu asan da ka magkepes yang mga kulu ming pagdakul ang mapinagdapig̱amu tung sasang manigparakaw̱utun ang yay maayen tung numyu ang pagkatapus yang aruman na ya rag lamkuay ming magsawayen.