Kolosi 1:14 - Takia

¹⁴ Nanun an lo idad iŋiliad go, idsad aupasek fidian isuas panad a.

Kolosi 1:14 Referans Kwoze

Efesus 1:7

Kristus id da tutumani kisaek an niŋen o, iŋanen dar lo iŋ idad iŋiliad dugo idaned aupasek fidian ipare idu ya. An iŋsan ilo panek tubun geig ak iri pani a.

Hibru 9:22

Rumok, kubiaeŋ paen na, mel wei mi dar nam ikok digane ilasa ya. Agod dar ta ikulmaek yau na yak man aupasek dam ta isuas yau na wa.

Hibru 9:12

Iŋ nal kisaek o lian mi galuŋ Gun Di, Gun Mok an ilon lo iladu ya, agod dar a iŋaneg ida iladu yan man bilelek boi, tia makau nanun ta boi san dar tia ya, tia, an iŋsinanen dar mok a. An niŋen o id iŋiliad tamul pe iŋsan na pempem tumado yau san dal ipasi a.

Revelesen 5:9

Iŋ bar foun ak ta igo diabi da, “Oŋ buk ŋanep kendel san gureŋ ate buk dufutanig dufou yan fidian oŋ pasi san uloŋ a. Oŋ ago gane san man idaisuda geig a. Ata wo, iŋ oŋ dufuno umat dugo, oŋane dar lo tamolpein Anut tuon lo dirai san udad a. Tamolpein aenta man, warou fidian lo yak, muroun ru fidian lo yak, tinik naon sensen lo yak, agod tan titin fidian lo yan oŋ udad uŋal a.

Galesia 3:13

Id fidian kubiaeŋ san misilanek paen na tumado dan, Kristus iŋiliad go misilanek an patun fo tilasa ya. Dugo woŋ i? Iŋsen man id niŋed o misilanek paen na idug imado ya. Man dugo, ru e kubiaeŋ ilon lo yen den igo ibol a. “Talpein a ai fo iyuk dan Anut san misilanek paen na imado da.”

Matyu 20:28

Nek ibol Tamol Nanun iŋsen igo woŋ, tamolpein aenta binawek urat dupani wo ta ipalu na ya, tia, aenta niŋedi wo binawek urat igane wo ipalu ya. Agod sen tinin fidian ibiseip an lo tamolpein wei mi siganen dar lo idad pe iŋal imul o dam ipalu ya.”

Revelesen 1:5

Nek ago mi, Jesus Kristus dam, ilon ipanaŋ dop ilo maror amado san ka ipanaŋ a. Iŋ Anut san ru itaot geig ibol ilasa da. Iŋ mi tamol malan te geig mutou lo imasa ya. Agod iŋ dam kiŋ adi e tan na dumado den sad Tubun a. Iŋ id niŋed o tubun mi imat da, agod iŋanen dar lo idsad aupasek fidian mi isasi panad an lo, muruan tiag kawan tumado da.

Efesus 5:2

Aŋ aenta ilom apidinai san tureŋ lo mi ator a, nek ago mi Kristus ilon ipanad an lo iŋsen tinin ibisei panad a. Iŋ man nek ibol bilelek a Anut dupani wo yai digane dop iŋsan mumalun iwen siŋaokan pe lak na yaup Anut ilo uyan ipani san igo woŋ a.

1 Jon 2:2

Idsad aupasek niŋen o Anut ilon wananan da. Ak man Kristus sen iŋsan mateŋ lo Anut ilon ago iganeg ibubarum a. Id niŋed o mi tia ya, tia, tamolpein a tan titin fidian lo dumado dugo iŋ niŋen o ilod rumok tap, sad aupasek an dam isasi yau a.

1 Pita 3:18

Man dugo rumok, Kristus iŋsen saen kisaek o lian aupasek niŋen o mateŋ ile ya. Iŋ man tamol itaot ak igo woŋ aŋ tamolpein ta itaot na yan aŋsam abem iŋane ya, an lo aŋ iŋiliaŋ pe Anut san na au a. Tinin tan san en lo dufuni imat a, gug ŋutun lo Anut iganeg kumaen ilasa ya.

1 Jon 2:12

Nanug muroug, iŋ yaŋan o, aŋsam aupasek ipare idu yak niŋen o ŋai aŋsam na girek en ŋigire da.

Taitus 2:14

Iŋsen id abed lo muruan isini a, an lo idsad aupasek fidian an san naon lo ipasad iŋiliad tamul a. Agod iŋ wagen lo idirad go ikok tilasag iŋsan tamolpein mok tumado da. An niŋen o urat uyan uyan ak mi tigane wo yaes isofutanad a.

1 Timoti 2:6

Iŋsen tamolpein fidian o iŋ tinin nam naon iganeg id idad an san ru Anut lo yen da, agod iŋanen saen fom ilasa ya.

Kolosi 2:13

Gubak mi aŋ gob mi a, aŋ aupasek kagin lo ator dugo, Juda sad muluŋ lo adu man tia ya. An niŋen o aŋ ŋutumi imat ak igo amado ator se ya. Ak man saen Anut Kristus kumaen foun ak ipani man, kumaen foun ak ipanaŋ go an lo aŋanem ŋutumi dam kumaen dilasa ya. Agod idaned aupasek fidian isuas yau a.

Efesus 4:32

Aŋ nug niŋen o bubem kisaek ak lo, tini misek san kagin lo dam atur sakar a. Nek ibol Anut iŋ Kristus log aŋanem aupasek ipare idu yak ago mi, aŋsem dam nug niŋen o ago agane dop ator a.

Aposel 20:28

Sem kagin ipanaŋ dop Urgun sipsip malan tubun banim lo igane yan dam kagin apidinai uyanan a. Sipsip an Anut iŋanen Nanun san dar lo iŋal a. Aŋ Tubun en san midaeŋ sad titianek adi ak niŋen o afutai o uyanan a.

Aposel 10:43

Profet fidian iŋ niŋen o igo dubol ilasa, ‘Tamolpein a fidian iŋ o ilod rumok dan, iŋanen yaŋan lo Anut iŋsad aupasek ipare idu pidinai a.’”

Kolosi 3:13

Nug ale saian amoi dop, muruan dugo yak aŋ nugnug lo yen dan, aŋ anen anen apare idu dop, nek ibol Tubun en aŋanem aupasek isuas panaŋ ak igo woŋ, aŋ dam nug san aupasek asuas a.

Aposel 2:38

Agog Pita awad yabig ibol, “Fidian aŋanem aupasek anen anen patum apanip, apalup Jesus Kristus yaŋan lo suguek aŋane wa. Ago tap Anut aŋanem aupasek fidian ipare idup Awan Urgun ipanaŋ a. Urgun man iŋsan lou panek, an kawan naon an tia aŋane wa.

1 Jon 1:9

Ak man iŋ awa urek san tamol, agod itaot geig a, amaiak niŋen o id idsad aupasek an kuai te tabol ilasa tap, idsad aupasek an fidian isasi yau dop, ilod lo kagin itaot tia yan fidian ipasi dop ikok tilasa wa.

Aposel 26:18

Oŋ iŋ malad wafutep, tidom tubun lo yak lilaman lo dupalu wa. Satan san tuon lo yak Anut san na diau a. Agop iŋsad ilo rumok ŋai lo iŋaned aupasek isasi pidinai a, agod tamolpein a Anut itaot idirai dilasa yan luluŋad lo aben ta diŋane wa.’”

Revelesen 14:4

Tamol emaiak pein adi dida sed nun ta ipidinai na ya. Tia, iŋ ikokan mi dumado da. Sipsip Nanun panu fidian lo dugon te yau dan, aria, tamol adi emaiak durig dida diau da. Anut warou nek emaiak, tan san tamolpein luluŋad lo idad iŋal a. Agop iŋ warou malan te Anut iŋal an, iŋanen warou lo, agod Sipsip Nanun san warou lo dam dumado wa. Nek ibol abi taman anaŋ malan te ilasa dak iŋanep, Anut yai igane pani dak igo woŋ, tamol an Anut agod Sipsip Nanun da sad ilo rumok adi e tan en lo imug dilasa yen, nek ama ya.

Luk 5:20

Jesus iŋsad ilo rumok ile tag tamol an irupei, “O turag, ŋai oŋane aupasek fidian ŋupasi yau la ya.”

1 Korint 1:30

Anut iŋsen mi, aŋanem madok Jesus Kristus lo yan san fun mok a. Anut lou wei mi Kristus ipanig ate id ibinawad a. Kristus lo mi id kankan milaen ak amad da tilasag tumado da. Tamol a id idad go iŋiliad an man Kristus mi a. Iŋ lo yak niŋen o Anut malan lo id itaot, agod gun tilasag tumado da.