Zekhariah 9:10 - Tedim Bible

¹⁰ Gal kidona leengte, Israel gam pan beisakin, sakol galkapte, Judah gam pan ka la khia ding a, galdona-a kizang thalte, kisusia ding hi. Na kumpipa un, minamte lakah kilemna thu gen ding a, amah in, tuipi mong khat pan tuipi mong khat dong, Eufrates gunpi panin leimong dongin uk ding hi.

Tedim Bible Revision 2017

¹⁰ Gal kidona leengte Israel gam pan beisakin, sakol galkapte, Judah gam pan ka la khia dinga, galdona a kizang thalte kisusia ding hi. Na kumpipa un minam dangte lakah kilemna thu gen dinga, amah in tuipi mong khat pan tuipi mong khat dong, Eufratis Gunpi panin leimong dongin a uk ding hi.

Zekhariah 9:10 Referans Kwoze

Hosea 2:18

Tua ciangin, ka mite a suksiat loh nadingun gamlaka om gamsate, huih laka leeng vasate, leh leitung a bokvak ganhingte tawh thuciamna ka bawl ding a, thalte, namsaute, galhiam khempeuh, leitung panin ka phiat khia ding hi. A lungnuam, lungmuang hithiatin ka mite ka om sak ding hi.

Hosea 1:7

Ahi zongin Judah mite ka hehpih ding a, namsau leh thal, sakol leh sakol tung tuangte, leh galsimna tawh hi loin, amaute’ Topa, Pasian ahi keimah mah in amaute ka honkhia ding hi,” a ci hi.

Mangmuhna 11:15

Sagihna vantungmi in peengkul a tum ciangin, “Hih leitung gam in i Topa leh ama Khazih gam a suak zo hi. Amah in a tawntungin a uk ding hi,” ci-in vantungah nakpi-in a genna aw ka za hi.

Micah 5:4

Amah in Topa’ thahatna tawh a tuute uk ding a, Topa ama Pasian’ min vangliatna tawh uk ding hi. Leitung mi khempeuh in ama liatna phawk ding uh ahih manin, ama mite lungmuang takin om thei ding uh hi.

Isaiah 60:12

Bang hang hiam cih leh nangma na hong sem lo minam leh kumpi gam beimang ding hi; tua minamte kisia maimang ding hi.

Isaiah 49:6

amah in, “Jakob minamte a laamto ding leh ka kepsa Israel mite a ngei uh a bangsak kik ding in keima nasem na hihna pen a baih lua mahmah nasep ahi hi; keima hotkhiatna in lei mong dong a tun’ theih nadingin Gentailte tungah khuavak dingin nang kong pia ding hi,” hong ci hi.

2 KORIN NIHNA 5:20

Tua ahih ciangin kote in Khazih tang ding sawltak ka hi uh hi. Note in Pasian tawh na kilem un ci-in Pasian in kote tungah hong hansuah mah bangin kote in zong Khazih tang ding kong thuum uh hi.

2 KORIN NIHNA 5:18

Na khempeuh Pasian panin a piang hi. Pasian in Khazih hangin amah tawh hong kilemsak a, tua kilemna thu tawh kipawl nasepna za kote hong pia hi.

Sawltak 10:36

Mi khempeuhte’ Topa ahi, Zeisu Khazih hangah thupha Lungdamna Thu kihilhin, Israel mite a vaikhak mah bangin,

Haggai 2:22

Kumpi gam khempeuh lumletin a vangliatna uh a beisak ding ka hi hi. Leengte leh leeng hawlte ka lawnthal ding a, sakol leengte leh a tung tuangte puk ding uh a, amaute khat leh khat kithat lum ding uh hi.

Isaiah 11:10

Tua ni ciangin Jessi’ zung pen mihingte’ tungah lim khat hi ding hi; minamte in ama kiangah kikhawm ding uh a, ama tawlngakna mun pen minthang mahmah ding hi.

Late 72:17

Ama min kip tawntung hen la, ni a om lai teng a minthan’na kip suak hen! Ama hangin mite in thupha ngah hen la, minam khempeuh in amah pen thupha ngahpa, ci ta uh hen!

Late 72:3

Mualliante leh mualneute in thumanna tawh na mite’ adingin nopna puak ta hen!

Thu-hilhkikna 11:24

Na khe un a sikna mun khempeuh nomau’ aa hi ding hi; na gamgi un gamlak panin Lebanon ciang dong leh Gun, Eufrates gun, panin nitumna tuipi dong hi ding hi.

1 KUMPI MASATE 4:21

Solomon in Eufrates panin Filistiate’ gam leh Izipt gamgi ciang dong kumpi gam khempeuh uk hi; amaute in siah hong puak uh a, a nuntak sung tawntung Solomon’ na sem uh hi.

Late 85:8

Topa Pasian’ thu gen ding hong zasak dih un, bang hang hiam cih leh amah in ama lamah a lungsim uh tawh a kiheite, ama mi siangthote, a mite tungah kilemna thu gen ding hi.

Isaiah 2:4

Amah in minamte khat leh khat kikal ah thukhenin, mi tampite’ thu khentat sak ding hi; amaute in a namsaute uh lo khawh na tu, a teipite uh singhiang heuhna temkawi-in seek ding uh hi; Minam khat leh minam khat kido nawn lo ding a, galdo dingin kithawi nawn lo ding uh hi.

Micah 4:8

Pasian in a mite a etna Jerusalem khuapi aw, nidang a, na vangliatna ngah kikin, kumpi khuapi na suak kik ding hi.

Late 89:26

Amah in kei kiangah, ‘Nangmah in keima Pa, ka Pasian leh ka kihotkhiatna Suangpi na hi hi,’ hong ci ding hi.

Hosea 2:20

Kei’ aa ahi tawntung dingin nang kong la ding hi. Tua ciangin Topa ka hih lam tak nong thei ding hi.

Micah 5:9

Israel mite in a galte’ tungah a khutte uh lamto-in, a gal khempeuh uh zo gawpin susia mang ding uh hi.