Zekhariah 2:9 - Tedim Bible

⁹ Topa mahmah in note hong su ding a, ni danga note’ na hong sepsak mite in tu-in note’ nate hong lehsuh kik ding uh hi,” hong cisak hi. Hih bangin thu hong pian’ ciangin Vanglianpen Topa in kei hong sawl lam tak na thei ding uh hi.

Tedim Bible Revision 2017

⁹ Topa mahmah in note hong su dinga, nidang a noteʼ na hong sepsak mite in tu-in noteʼ nate hong leh suhkik ding uh hi, hong cisak hi. Hih bangin thu hong pian ciangin Vanglian Topa in kei hong sawl ahih lamtak na thei ding uh hi.

Zekhariah 2:9 Referans Kwoze

Isaiah 19:16

Tua ni ciangin Izipt mite pen numei bang ding uh a, Vanglianpen Topa in amaute tungah a khut a sin’sanna hangin lau-in liing ding uh hi.

Zekhariah 6:15

Gamlapi-a teeng mite hong pai-in Topa’ inn lam nasep hong huh ding uh hi. Tua biakinn a kilam kik ciangin Vanglianpen Topa in note kiangah kei a hong sawlna thu na thei ding uh hi. Topa na Pasian uh’ thupiaknate cing takin na zuih nak uh leh tu-a ka gen bangin hong piang ding hi.

Zekhariah 4:9

Amah in, “Zerubbabel in biakinn bulpi phut khin a, biakinn lam zong zo ding hi. Tua ciangin ka mite in, amaute kiangah nang kong sawlna thu thei ding uh hi.

Ezekiel 39:10

Amaute in mei cih dingin a kinusia galhiamte nei uh ahih manin gamlakah sing tom kul lo ding a, tulakah sing phuk ding zong kisam lo ding hi. Amaute in amau’ na a sutte’ na sutin, a suksiatsakte’ na suksiatsak ding uh hi. Topa Pasian in thu ka gen khin hi,” hong ci hi.

Isaiah 14:2

Minamte in amaute la-in amau omna munah paipih ding uh hi. Israel mite in minamte nei ding uh a, Topa’ gam sungah amaute pen sila numei sila pasal dingin nei ding uh hi; amaute a man ngei mite pen tu-in amaute in leh mat ding a, amaute a nengniam ngei mite tungah tu-in ukna nei ding uh hi.

Isaiah 11:15

Topa in ama huihsa nungsakin Nail gunpi leh Eufrates gunpi tuite tungah a khut zanin kangsak ding a, mi khempeuh in nuam takin khedap tawh a kantan zawh ding luineu sagih bek siit lai ding hi.

Johan 16:4

Amau hun a tun’ ciangin kong gensa hih thute na phawk kik nadingun tu-in kong genkhol hi.” “Acil panin hih thute note kiangah kong gen ngei kei hi. Bang hang hiam na cih uh leh, note tawh keimah ka omkhawm lai hi.

Johan 13:19

Hih thute hong tun’ ciangin tua pa ka hih lam na theih nadingun, hong tun’ ma-in no kiangah kong genkhol hi.

Zekhariah 2:8

Hih bangin mang ka muh khit ciangin, ama mite’ na a sut gawp minam dangte kiangah thu a gen dingin Vanglianpen Topa in kei hong sawl a, “Topa’ mite a su mi peuhpeuh in a mit nauta banga a na manpha pen khat a su ahi hi.

Zefaniah 2:9

Keimah in a nungta Israel Pasian ka hih mah bangin, Moab mite, Sodom khuamite bangin kisusia-in, Ammon mite, Gomorrah khuamite bangin kisusia-in, a gam sung uhah lingkung bek po zoin, a gam uh cikhuk tawh kidimin a sia tawntung suakin, a suakta lai ka mite in a neihsa uh sutin, a gam uh a laksak tak kei leh, ci-in ka kiciam hi,” ci hi.

Habakkuk 2:17

Note in Lebanon gam singkungte phuk na hihmanun note zong hong kiphuk ding a, a ganhingte zong that na hih manun, tu-in ganhingte in note hong lausak ding uh hi. Gam sung khempeuh ah mi thatin na bawlsiatna hang uh, leh khuapite leh a sunga teengte na suksiatna hangun, note tungah hih bangin a hong piang ding ahi hi.

Habakkuk 2:8

Note in minam dang tampite’ na na sut uh a, tu-in a om lai mite in note’ na hong sut ding uh hi. Bang hang hiam cih leh note in mite thatin, khuapite leh a sunga teeng mite na bawlsia uh hi.

Jeremiah 28:9

Ahi zongin, nopna hong tung ding hi, ci-a a gen kamsangpa pen Topa’ hong sawl kamsangpa hi taktak hiam, cih kamsangpa’ gen bang hong tun’ ciangin a kithei pan ding hi,” a ci hi.

Jeremiah 27:7

Ama’ gam kisiat hun a tun’ mateng gam khempeuh in amah-a kipan a tapa leh a tupa’ na a sepsak ding uh hi. Tua khit ciangin gam tampi leh kumpi liante in amah salin a leh neih kik ding uh hi.

Isaiah 33:23

Gal teembaw khaute kol a, ama om nading mun sanah gunkuang puan khuam lenkip zo lo a, gunkuang puan zal thei lo hi. Tua ciangin galte’ neihsate kihawm keek ding a, khebaite nangawnin van ngah ding uh hi.

Isaiah 33:1

Hong kisusia nai lo, mi a susiapa aw, gimna a ngah ding na hi ta hi. Kuamah in hong khem nai loh mi khempa aw, gimna a ngah ding na hi ta hi. Na suksiat nawn loh ciangin nang hong kisusia ding a, na khem nawn loh ciangin nang hong kikhem ding hi.

Isaiah 13:2

Mual kolh tungah lan khat khai to un la, galkapte tungah nakpi takin kiko un; mi liante’ kongpi-ah a lut nadingun amaute khut vaan un.

Isaiah 10:32

Tu ni mahmah-in Nob khua-ah galte tungin khawl uh a, Zion Mual ahi, Jerulasem khuapi, a khuttum uh sin’san uh hi.

Isaiah 48:16

Kei kiangah hong nai un la, hih thu za un: a kipat cil-a kipanin a simthamin thu ka gen kei a, tua thu hong pian’ akipanin kei ka om hi. (Tu-in Topa Pasian in a Kha tawh kei hong sawl hi.)

Zekhariah 2:11

Tua hun ciangin Topa kiangah minam tampi hong pai ding uh a, ama mite suak ding uh hi. Topa in note hong ompih ding a, tua ciangin note kiangah kei a hong sawlna thu na thei ding uh hi.

Isaiah 4:5

Tua ciangin Zion Mual tung khempeuh leh ama kikhopnate tungah, sun-in meii sungah, zan-in meikuang khu tawh Topa in hong bawl ding a, Topa’ minthan’na tung khempeuh ah a kizal khat om ding hi.

Isaiah 12:6

Zion-a teeng mite aw, nomau’ lakah Israelte’ Siangtho Pa lianin om ahih manin awng un la, lungdamin la sa un,” a cih hun uh hong tung ding hi.

Isaiah 26:1

Tua ni ciangin Judah gam sungah hih la kisa ding hi: “Khuapi muanhuai khat i nei hi; Topa mahmah in i kulhte leh i panmun kipte hong hut sak hi.

Isaiah 33:21

Tua khua sungah Topa in a thahat Pa hi in, a minthan’na hong langsak ding a, a zai gunte leh a zai lui geite-ah i teeng ding hi. Tua tuite tungah ei hong do ding gal gunkuang hong kihot nawn lo ding a, gal teembaw hong pai nawn lo ding hi.

Isaiah 60:18

Na gam sungah ngongtatna kiza nawn lo ding a, na gam sungah siatmai-na leh suksiatna om nawn lo ding hi; nangmah in na kulhte pen Hotkhiatna, na kulh kongpite pen Phatna, na ci ding hi.

Isaiah 60:19

Sun hunin ni pen nangma khuavak hi loin, zan hunin kha pen nangma khuavakna hi nawn lo ding hi; Topa pen a tawntung nangma khuavak hi ding a, na Pasian pen nangma minthan’na hi ding hi.

Jeremiah 8:19

Ngai un, gamsung mun khempeuh panin ka mite’ tanute kap uh hi: “Zion khua-ah Topa om nawn lo ahi hiam? A kumpipa uh om nawn lo ahi hiam?” a ci uh hi. Topa in dawng kik a, “Bang hangin a milim bawl tawmte uh leh a gamdang milimte uh tawh kei hong hehsak uh ahi hiam?” a ci hi.

Joel 2:27

Tua ciangin, no Israel mite lakah kei ka omna thu, leh keimah Topa in note’ Pasian ka hihna thu, kei sim loh kuamah dang a om lohna na thei ding uh hi. Ka mite hong kisimmawh kik ngei nawn lo ding hi.

Zefaniah 3:15

Topa in na galte hong paihkhiatsak khin a, hong langpang khempeuh hong hawlkhiatsak khin hi. Topa ahi Israel Kumpipa in nang tawh hong om a, na lau nading thu om nawn lo hi.

Zekhariah 9:15

Vanglianpen Topa in ama mite hu ding a, ama mite in a galte uh susia ding hi. Galdona sungah, zukham bangin awng gawp ding uh a, a galte uh’ sisan luangsak gawp ding uh hi. Biakna site, biakna tau tungah, hai-a sun tawh kibangin luangsak ding uh hi.