Zekhariah 11:3 - Tedim Bible

³ Tuucingte, a minthan’na uh beita ahih manin, dahin kap uh hi. A tulak inn uh kisusia khin ahih manin humpinelkaite’ hawkna za un.

Tedim Bible Revision 2017

³ Tuucingte a minthanna uh bei khinta ahih manin dahin a kap uh hi. A tuulak inn uh kisusia khin ahih manin humpi-nelkaiteʼ hawkna za un.

Zekhariah 11:3 Referans Kwoze

Jeremiah 50:44

“En un, lo nona-a nuam taka om tuute, Jordan gam tuulak pana hong paito humpi in a delh mang bangin keimah in amaute, a gam uh nusia-in thakhat thu-in ka taimang sak ding a, a gam uh a uk dingin ka deih peuhpeuh ka seh ding hi. Bang hang hiam cih leh kei bang mi kua om ahi hiam? Ka to ding kua om lai ahi hiam? Ka mai-ah kua kumpi hong ding ngam ding ahi hiam?

Sawltak 7:52

No na pute na pate un a bawlsiat loh kamsang kua ahi hiam? ‘Midik Pa hong pai ding ci-a a genkholh mite a that uh hi. Tu-in tua Midik Pa a heekte, a thatte na suak zo uh hi.

Mattiu 15:14

Tua mite amau ut bangin om sak un. Amau in mittaw lamhilhte ahi uh hi. Mittaw leh mittaw lam kihilh leh, a nih un leihawm sungah a kiakhawm ding uh hi,” a ci hi.

Zekhariah 11:8

Kha khat sungin tuucing thumte ka notkhia hi. Bang hang hiam cih leh amaute tungah ka lungduai zo nawn kei a, amaute in kei hong mudah uh hi.

Zefaniah 3:11

Tua hun ciangin, ka mite in kei nong lehdona hangun, maizumna ding bangmah om nawn lo ding hi. Note’ lak panin a kiphasak a kihisak mite ka hawlkhia ding a, Jerusalem khua a, ka mual siangtho tungah kei nong lehdo nawn kei ding uh hi.

Zefaniah 3:3

A uliante, a hawk thei humpinelkai gilkial bang a, a thukhente, keivom gilkial bang uh hi. Zing khuavak mateng a saguh nek a nusia nuam lo, a huaiham gamsate tawh kibang uh hi.

Zefaniah 1:10

Topa in hih bangin thu gen a, tua ni-in “Jerusalem khua Ngasa Kulh kongpi-ah mite’ kikona na za ding uh a, tua khuapi Veng Nihna sungah mite’ kahna, leh mual neute tungah a puak zaizai-a ging na za ding uh hi.

Amos 8:8

Tua ahih manin ziin hong liing ding a, leitunga om mi khempeuh kap ding uh hi. Nail Gunpi bangin leitung khempeuh khang toin kiamsuk ding hi.

Joel 1:13

Siampite aw, puanhampi silhin kap un la, biakna tau-a nasemte aw, thum un. Ka Pasian’ na a semte aw, biakinn sungah tum un la, zan thapai-in dahna lim puanhampi silh un. Note’ Pasian’ inn sungah piak ding, an leh leenggahzu om nawn lo hi.

Hosea 10:5

Beth-aven khua a bawngno milim a taanna hangun Samaria khuapi sunga a teeng mite lau-in liing ding uh a, amaute leh tua milim na a sem siampite thuum ding uh hi. A etlawmna teng a maiman’ ciangin tau ding uh hi.

Jeremiah 49:19

En un, lonona a, nuam taka om tuute, Jordan gam tuulak pan a, a hong paito humpi in a delhmang bangin keimah in amaute a gam uh nusia-in thakhat thu-in ka tai mangsak ding a, a gam uh a uk dingin ka deih peuhpeuh ka seh ding hi. Bang hang hiam cih leh kei bang mi kua om ahi hiam? Ka to ding kua om lai ahi hiam?

Jeremiah 26:6

hih biakinnpi Shiloh khua ka bawl bangin ka bawl ding a, hih khuapi leitung gam khempeuhte’ kihaamsiatna-in ka zangsak ding hi,’ na ci ding hi,” a ci hi.

Jeremiah 7:4

‘Hih in Topa’ biakinn ahi hi, Topa’ biakinn ahi hi, Topa’ biakinn ahi hi,’ a kicici zuauthute um kei un.

Jeremiah 2:30

Na tate uh thu hilh-in ka sat hangin a mawkna suak zo hi, amaute kibawlpha tuan lo uh hi; na namsaute un humpi an zong bangin na kamsangte uh a that khin zo uh hi.

Jeremiah 2:15

Humpite bangin a galte in amah hawk uh a, nakpi takin a hawkgawp uh hi. A gam uh gam simtham a suah uh a, a khuapite cim-in kuamah teeng lo hi.

Isaiah 65:15

Keima teel mite in ciamsiatna-in na min uh zang ding uh a, Topa Pasian in note hong that ding hi; ahih hangin ama nasemte pen min dang phuah ding hi.

Late 22:21

Humpinelkai kam panin keimah hong hon in la, gamsialte’ ki panin a cimawh keimah hong hon in.

Isaiah 5:29

Amaute’ kikona pen humpinelkai hawk tawh kibang a, humpinelkai khanglaite bangin amaute hawk uh hi; amaute humhamin a sa nek ding uh man uh a, amaute in puakhia-in kuamah in honkhia zo lo hi.

Zekhariah 11:2

Taaksan kungte aw, kapin thuum un; taamtaak kungte pukkhin a, a minthang singkungte kisia ta hi. Bashan tawsaw kungte aw, kapin thuum un; gammang tupi sing teng kiphuk ta hi.

Ezekiel 19:2

Na nu uh, humpinelkai tawh kibang! Humpinelkai dangte tawh kikhawlin, a note khoi hi.