Zekhariah 10:5 - Tedim Bible

⁵ Kongzing buannawng lakah, a galte a tuancil gawp galkapte bangin, amaute gualzo ding uh a, Topa in a ompih manin amaute in galdo ding uh a, a galte’ sakol galkapte zo gawp ding uh hi.

Tedim Bible Revision 2017

⁵ Kongzing buannawng lakah a galte uh a tuancil gawp galkapte bangin amaute gualzo ding uh a, Topa in a ompih manin amaute in gal a sim uh ciangin a galteʼ sakol galkapte zo gawp ding uh hi.

Zekhariah 10:5 Referans Kwoze

Haggai 2:22

Kumpi gam khempeuh lumletin a vangliatna uh a beisak ding ka hi hi. Leengte leh leeng hawlte ka lawnthal ding a, sakol leengte leh a tung tuangte puk ding uh a, amaute khat leh khat kithat lum ding uh hi.

Zekhariah 12:8

Tua ni ciangin Jerusalem-a teeng mite, Topa in hu ding a, a gina lo pente nangawn, David zahin thahat ding hi. David’ suan-le-khakte in Topa’ vantungmi bangin ahi zongin Pasian mahmah bangin ahi zongin amaute makaih ding uh hi.

Zekhariah 9:13

Grik mite sim nadingin, Judah thal bangin keek-in, Israel thaltang-in ka zang ding a, Zion mite namsau-in ka zang ding hi.

Late 20:7

Pawlkhat in leengte kihihsak pih-a, pawlkhat in sakolte kihihsak pih hi; ahih hangin eite in Topa i Pasian’ min i kihihsak pih hi.

2 TIMOTI NIHNA 4:7

Galdona a pha ka do zo hi, tai nading lam a mong dongin ka tai zo hi, upna thu ka keem zo hi.

2 KORIN NIHNA 10:4

Kote’ galdona-a ka zat uh hiamte in ci-le-sa tawh kipawl ahi kei hi: khuapi kulhte a cim gawpsak thei, Pasian mai-ah vangliatna tawh a dim hiam ahi uh hi.

Sawltak 7:22

Moses in Izipt mite’ pilna khempeuh sin a, kam tawh nasepna tawh a siam hi.

Luka 24:19

Zeisu in, “Bang thu ahi hiam?” ci-a a dot leh, tua pa in, “Nazareth mi Zeisu’ thu ahi hi. Tua pa in Pasian mai-ah ahi zongin, mite mai-ah ahi zongin, kam siamna leh khut siamna tawh a dim kamsangpa ahi hi.

Mattiu 4:3

Tua lai takin a kheem dingpa in va nai a, “Nang in Pasian’ Tapa na hih takpi leh, hih suangte khomun suaksak in,” a ci hi.

Zekhariah 14:13

Tua ni ciangin Topa in amaute amkhamsak gawp ding a, mite in a gei-a a mat khak mite manin khat leh khat kilaithang gawp ding uh hi.

Zekhariah 14:3

Tua ciangin Topa hong kuankhia ding a, a beisa hun-a a sim ngei bangin hih minam dangte hong sim ding hi.

Zekhariah 12:4

Tua ni ciangin a sakolte uh ka lausak ding a, a sakol tung tuangte uh ka haisak ding hi. Ahi zongin Judah mite ka kem ding a, a galte uh’ sakolte, a mit ka tawsak ding hi.

Micah 7:10

Tua hun ciangin ka galte in hih thu mu ding uh a, “Na Topa Pasian koi-ah om hiam? ci-in hong tawng ka galte maizum ding uh hi. Amaute guallel ding a, kongzing buan bangin a kisik gawp mu-in kei ka nuam ding hi.

Amos 2:15

Thal tawite nangawn in do zo lo ding a, a tai hatte nangawn kisuahtak zo lo ding a, sakol tung tuangte nangawn in a nuntakna suahtak zo lo ding hi.

Ezekiel 38:15

leilu lam pek-a na omna gam panin, sakol tung vive-ah a tuang, minam tampite kiang panin na kaihkhop a thahat galkap hon tampite masuanin na kuan khia ding a,

Isaiah 41:12

Nangmah hong langpangte na zon’ hangin amaute na mu nawn kei ding hi; nangmah hong dote pen bangmah hi het lo ding uh hi.

Isaiah 25:10

Bang hang hiam cih leh Topa in hih Zion Mual hu ding a, ahi zongin Moab mite ahih leh ninkholna dum sungah buhkungte a kisikcip bangin kisikcip gawp ding hi.

Isaiah 10:6

Pasian thu a ngaihsun lo minam leh keimah hong hehsak mite’ neihsa sutin lak sakin, amaute pen konglak buannawng bangin a tuancil dingin amaute sawlin thu ka pia hi.

Isaiah 8:9

No minam dangte aw, galsim dingin awng un, thei un la, kitamzan un; gamlapi-a om gamte khempeuh aw, ngai un; kigalging un, ahih hangin lungkiatna na thuak veve ding uh hi; kigalging un, ahih hangin lungkiatna na thuak veve ding uh hi.

Late 45:3

Vanglianpa aw, na minthan’na leh na liatna tawh, na namsau kuah in.

Late 33:16

A galkap tampi in kumpi khat suakta sak zo lo a, galkap hangpa ama hatna tawh kihonkhia zo lo hi.

Late 18:42

Huihpi mai-ah leivui bangin amaute ka satvui a, kongzing buante bangin amaute ka lawnkhia hi.

2 SAMUEL NIHNA 22:43

Leivui bangin amaute ka satvui a, kongzing buante bangin amaute tuankhamin ka sikcipsuk hi.

2 SAMUEL NIHNA 22:8

“Tua ciangin leitung kisingin kilok a, vantung bulpite liingin taang hi; bang hang hiam cih leh amah heh hi.

1 SAMUEL MASA 16:18

Tangvalte khat in dawngin, “En un, Bethlehem mi Jessi’ tapa, a tum siam, a thahat, a gal hang mi, thugen a siam, a mel hoih khat ka mu hi; Topa in amah tawh omkhawm hi,” a ci hi.

Joshua 10:42

Israelte’ Topa Pasian in Israelte adingin dosak ahih manin Joshua in hih kumpite khempeuh leh amau leitang hun khat sungin la khin hi.

Joshua 10:14

Tua hun ma hita leh tua hun khit hita leh Topa in mi khat’ thu a ngaih tua ni bang ni dang om lo hi; bang hang hiam cih leh Topa in Israel mite adingin dosak hi.

Thu-hilhkikna 20:1

“Na langte uh a do dingin pai-in sakolte leh leengte leh galkapte nomau’ aa sangin a tam zaw-in na muh uh ciangin amaute na kihta kei ding uh hi; bang hang hiam cih leh Izipt gam panin note hong paikhiatpih Topa na Pasian uh note tawh hong om hi.

Mangmuhna 19:17

Tua nung ciangin vantungmi khat in ni sungah ding-in a om ka mu hi. Amah in van kim lai-ah a leeng vasate kiangah, “Pasian’ nitak an nekna lianpi-ah kikhawmin hong pai un.

2 TIMOTI NIHNA 4:17

Thuhilhna khempeuh ka hilh theih nading ahi zongin, Gentail mi khempeuh in a zak nadingun ahi zongin, Topa in kei lamah om a, keima tha hong dimsak a, humpinelkai’ kam sung pan hong honkhia hi.

Sawltak 18:24

Alekzandria khua mi Apollos min nei, thuhilh siam, Judah mi khat in Efesa khua-ah a tung hi.

Mattiu 28:20

Keimah in note kong piak thukham khempeuh a tan’ dingun na hilh ta un. Keimah in leitung a bei dongin note tawh ka omkhawm tawntung ding hi,” ci-in a vaikhak hi.

Late 44:5

Nangma hangin ka galte uh ka sawnpai uh a, ko hong dote, na min suangin ka tuancil uh hi.

Isaiah 41:25

Leilu lam gam panin mi khat ka hanthawn a, amah hong kuan khin hi, nisuahna lam panin amah in ka min hong lo ding hi; beel sekpa in buan a cil bang, sum sunga a kisu gawp bangin, amah in gam ukte tuancil gawp ding hi.

Micah 5:8

A om lai Israel mite pen minam dangte lakah, gamlakah sa a beng, tuute a tuah ciangin manin balnen gawp a, a kam sung pan a honkhia zo a om lo, humpinelkai bang ding uh hi.

2 KUMPI NIHNATE 9:33

Jehu in, “Amah hong lawnsuk un,” a ci hi. Tua ahih ciangin amaute in Jezebel lawnsuk uh hi; a sisan pawlkhat kulh tung leh sakolte tungah kitheh a, tua ciangin amaute in amah tuancil uh hi.

Isaiah 31:1

Izipt gamah huhna ngen dingin paisuk a, sakolte suan’ in a nei, leengte a tam manin muang a, sakol tuangte a hat mahmah manin a suang, ahih hangin Israelte’ Siangtho Pa a suang lo, Topa thu a dong lote in gimna ngah ta hen!