Zekhariah 10:4 - Tedim Bible

⁴ Amaute sung panin innkiu suang khetphim galkap mangte, gam ukte, hong khangkhia ding uh hi.

Tedim Bible Revision 2017

⁴ Amaute sung pan mi makaite, galkap maangte, gam ukte, hong khang khia ding uh hi.

Zekhariah 10:4 Referans Kwoze

Zekhariah 9:10

Gal kidona leengte, Israel gam pan beisakin, sakol galkapte, Judah gam pan ka la khia ding a, galdona-a kizang thalte, kisusia ding hi. Na kumpipa un, minamte lakah kilemna thu gen ding a, amah in, tuipi mong khat pan tuipi mong khat dong, Eufrates gunpi panin leimong dongin uk ding hi.

Zekhariah 9:8

Tua ciangin ka gamsung ka hu ding a, galte ka nawksak kei ding hi. Ka mihingte’ thuakna mu khin ka hih manin, mi gilote ka bawlsiasak nawn kei ding hi.

Gamlak-vakna 24:17

Amah ka mu hi, ahih hangin tu hun hi lo hi; amah ka en hi, ahih hangin a hun nai nai lo hi: Jakob sung pan aksi khat hong suakkhia ding a, Israel sung pan kumpi ciangkhut khat hong piang ding hi; tua in Moab’ taltang sat kham ding a, Sheth’ suante khempeuh sugawp ding hi.

Mangmuhna 17:14

Amaute in Tuuno tawh a kido uh ciangin Tuuno in amau a zo gawp ding hi. Bang hang hiam na cih uh leh, amah in topate’ Topa, kumpite’ Kumpipa ahi hi. Kiteelkhia, kisamin, thuman mi ahi Topa tawh a omkhawm mite in zong a zo gawp ding uh hi,” ci-in kei kiangah hong gen hi.

2 TIMOTI NIHNA 2:4

Na a sep lai takin galkap in amah galkap a tumsak mi’ deihna bangin ahih theih nadingin, hih leitung vaite tawh a kikai-awk sak kei hi.

Mattiu 9:38

Tua ahih ciangin, ‘buh at nasem ding mi hong sawl in’ ci-in buh nei Topa kiangah thu na ngen un,” a ci hi.

Jeremiah 1:18

En in, hih gambup langah ding dingin, Judah kumpite, uliante, siampite leh hih gam mi khempeuh langpan’ dingin tu ni-in nang, khuapi muanhuai khat bangin ahi zongin, sik khuampi khat bangin ahi zongin, sumngo kulhpi khat bangin ahi zongin kong bawl hi.

Isaiah 54:16

En un, pum zaap-in ama kizat nading ciat a sem dingin hiam a bawl siksekpa ka piangsak khin hi. A susia dingin a susia gawp theipa zong ka piangsak khin hi;

Isaiah 49:2

Amah in ka kam, namsau hiam bangsak a, ama khut liim tawh kei hong hu hi; amah in a kinawtngil thaltang bangin kei hong bawl a, a hiamsa-in zat pah dingin a thallawng sungah kei hong koih hi.

Isaiah 19:13

Zoan uliante mihai suak khin a, Memfis uliante zong hai khin uh hi: minamte a makaih ding a, kineite mah in Izipt mite lam khialhpih khin hi.

Late 118:22

Inn lamte in a nilkhiat suang pen innkiu suang bulpi suak khin ta hi.

Ezra 9:8

Ahi zongin tu-in Topa ka Pasian un tomkha sung kote hong hehpih a, a suakta pawlkhat hong omsakin ama mun siangtho ah siksan ding mun hong pia hi. Amah in ka mit uh hong vaak sak kikin ka salsuahna uhah ka nuntakna uh ka thak pat theih nading uh kalsuan cilna hong pia hi.

1 SAMUEL MASA 14:38

Tua ciangin Saul in, “Mi a makaite khempeuh aw, hih lai-ah hong pai un; hih mawhna tu ni-in hong pian’na thei un la mu un.

Piancilna 49:24

ahih hangin ama' thal liing loin om a, a khutte kizaptel sak hi, Jakob’ Vanglian Pa’ khut (Israel Suangpi, Tuucingpa’ min),

Luka 20:17

Zeisu in amaute a et lai takin, “Tua ahih leh, ‘Inn lamte in a nilkhiat suang in anung ciangin innkiu suang a piang hi,’ ci-in a kigelh thu, bang cihnopna ahi hiam?

Efesa 2:20

Bang hang hiam na cih uh leh, sawltakte-a kipan kamsangte ahi, khuam tungah note in zomin a kilam mi na hi uh hi. Khazih in tua innkiunuai suang ahi hi.

1 PETER MASA 2:6

Bang hang hiam na cih uh leh: “A kiteel a manpha inn kiu khuam bul suangpi, Zion mual tungah ka koih hi. Tua suangpi a beel mi in, Zumna a thuak kei ding hi,” ci-in Lai Siangtho sungah a kigen hi.

Jeremiah 51:20

“Babilon aw, nangmah in ka sekpi leh ka galhiam na hi a, nang hong zangin gamdangte ka satnen a, kumpi gamte ka susia hi.

Isaiah 28:16

Tua ahih ciangin Topa Pasian in, “En un, keimah in Zion sungah bulpi ding khat, suang, a kize-etsa suang, a manpha innkiu suang, bulpi muanhuai khat ka koih hi: Tua suang tungah, ‘Hih a um mi in lungkhamna tuak lo ding hi,” ci-in kigelh hi.