Zekhariah 1:3 - Tedim Bible

³ Ahi zongin tu-in kei kiangah hong ciahkik le uh cin, kei zong note kiangah kong paikik ding hi.

Tedim Bible Revision 2017

³ Ahi zongin tu-in kei kiangah hong ciahkik le-uhcin, kei zong note kiangah kong paikik ding hi.

Zekhariah 1:3 Referans Kwoze

Malakhi 3:7

Note in, na pu na pate uh mah bangin ka thukhamte panin na pialkhia uh a, ka thukhamte na zui kei uh hi. Ahi zongin keima lamah hong kihei kik un; kei zong note lamah kong kihei ding hi. Ahi zongin note in, ‘Nang lamah kong kihei nadingun bang hih ding ka hi uh hiam?’ na ci uh hi.

Jeremiah 3:22

Topa in, “Hong kilehkik un, a zulhzau ka tate aw, na zulhzauna uh kong damsak ding hi,” a ci hi. Amau in zong, “En in, nang kiangah kong pai uh hi; bang hang hiam cih leh Topa kote’ Pasian na hi hi.

Joel 2:12

Topa in hih bangin ci hi, “Tu mahmah nangawnin, lungsim tak tawh kisik kikin, an tangin, kapin, thuumna tawh kei kiangah hong paikik un.

Jeremiah 4:1

Topa in, “Israel mite aw, na kilehkik uh leh kei’ kiangah hong kilehkik un. Na kihhuainate uh kei kiang pan na paihkhiat uh a, na tai kawikawi kei uh leh,

Jeremiah 12:15

Ahih hangin amaute ka lakkhiat khit ciangin ka hehpih kik ding a, amau’ luah ding amau’ gam ciatciat uhah ka koihkik ding hi.

Isaiah 31:6

Israel mite aw, nakpi tak-a na dopa uh’ lamah kihei kik un.

Hosea 14:4

Ka mite tungah heh nawn lo ka hih manin ka mite ka kiangah ka sam kik ding a, lungsim takpi tawh amaute ka it ding hi.

Hosea 6:1

“Hong pai un, Topa kiangah ciahkik ni; amah in eite hong balgawp hangin hong damsak kik ding a, eite hong liamsak hangin i liamnate hong tun’sak kik ding hilo ahi hiam?

Ezekiel 33:11

Amaute kiangah hih bangin gen in: Keimah in a nungta Topa Pasian ka hih mah bangin mawhnei mi khat a si ka muh ciangin nuam ka sa het kei hi. A mawh gamtatna khawlin a nuntak ding ka deihna hi zaw hi. Israel mite aw, na mawh gamtatnate uh khawl un. Bang hangin si nuam se na hi uh hiam?

Jeremiah 35:15

Ka nasem ahi kamsangte khempeuh note kiangah hong sawl tawntungin, ‘Tu-in note khempeuh na hoih lohna-uh panin kihei un la, na gamtat hoihlote uh kipuah pha un. pasian dangte nung delh loin, ama’ na na sep kei uh leh note leh na pute na pate’ kianga kong piak gam sungah na teeng ding uh hi,’ ci-in hong gen uh hi. Ahih hangin note in na bil uh nong ngat kei uh a, ka thu nong ngai kei uh hi.

Jeremiah 25:5

Amaute in, ‘Tu-in na vekpi-un na giltohna uh leh na gamtat khialhnate uh panin na kihei uh leh Topa in note leh tanglai-a na pute na pate uh tungah na neih tawntung ding uh a, a hong piak gam sungah na teeng thei ding uh hi.

Hosea 14:1

Israelte aw, note’ Topa Pasian lamah kihei kik un. Na mawhna hangun note na puk khin uh hi.

Nehemiah 9:28

Ahi zongin a tawldam khit uh ciangin nangma muhna ah a sia gamta zel uh a, nangmah in amau’ galte khut sungah na nusia a, a galte un amaute ukgawp uh hi. Ahi zongin amaute in nang tungah huhna hong nget uh ciangin vantung panin amau’ ngetna za-in na hehpihna tawh amaute tam veipi na honkhia hi.

2 KHANG TANGTHU NIHNATE 15:4

ahih hangin a lungkham uh ciangin Israel Pasian, Topa’ lamah kihei uh a, amah zongin amaute in amah mu uh hi.

JOB (Job) 22:23

Lungsim tak tawh Vanglianpa lamah kihei in la, na innsung pan gamtatsia khempeuh bei sak in la,

Isaiah 44:22

Na thupalsatnate meiipi bangin, na khialhnate meiilum bangin ka phiatkhia khin zo hi; nang hong tan khin ka hih ciangin kei kiangah hong ciahkik in.

Jeremiah 3:1

“Mi khat in a zi ma hen la, tua nu in zong amah nusia-in, pasal dang khat’ zi suak leh, a pasal masa in tua nu la kik thei ding ahi hiam? Tua gam teng a nin suaksak khin ding hilo ahi hiam? Nang in numei paktat suak-in mi tampi tawh kingai khin zo napi cin tu’n kei’ kiang hong zuankik ding na hi hiam? Topa in kong ci hi.

Ezekiel 18:19

“Ahi zongin, ‘Bang hangin a pa’ mawhna a tapa in thuak lo ding ahi hiam?’ nong ci kha ding hi. A tapa a hoih, a manin a gamtatna hang ahi hi. Amah in ka thukhamte kemin hoih takin zui hi. Tua ahih manin pel loin amah nungta ding hi.

2 KHANG TANGTHU NIHNATE 15:2

tua ciangin Asa dawntuah dingin amah pai-in ama kiangah, “Ka thu ngai un, Asa leh Judah mite leh Benjaminte aw: Note in amah tawh na om lai teng uh Topa in note tawh om hi. Amah na zon’ uh leh amah na mu ding uh a, ahih hangin amah na nusiat uh leh amah in note hong nusia ding hi.

Ezekiel 18:31

Na gamtatnasa uh mawhna khempeuh nusia un la, na lungsim leh na ngaihsutna uh thaksuahsak un. Bang hangin no Israel mite si nuam na hi uh hiam?

Ezekiel 18:32

Kuama’ sih ding ka deih kei hi. Tua ahih manin na mawh gamtatna uh khawl un la, nungta un. Topa Pasian in ci hi,” hong ci hi.