Zefaniah 3:3 - Tedim Bible

³ A uliante, a hawk thei humpinelkai gilkial bang a, a thukhente, keivom gilkial bang uh hi. Zing khuavak mateng a saguh nek a nusia nuam lo, a huaiham gamsate tawh kibang uh hi.

Tedim Bible Revision 2017

³ A uliante, humpinelkai gilkial bang a, a thukhente, keivom gilkial bang uh hi. Zingsang khuavak mateng a saguh nek a nusia nuam lo, a huaiham gamsate tawh kibang uh hi.

Zefaniah 3:3 Referans Kwoze

Habakkuk 1:8

A sakolte uh, kamkei sangin tai hatzaw a, keivom gilkial sangin kihtakhuai zaw hi. Gamlapi pek panin a sakol tung tuangte hong kipan uh a, a sakolte un lei-ah a khe phut uh hi. Muvanlai in sa a bawh bangin, a galte len’lak uh hi.

Jeremiah 5:6

Tua ahih manin tuulak panin humpi khat in amaute that ding a, sehnel gam panin keivom khat in a petgawp ding hi. Kamkei khat in a khuapite uh vil gige a, a pusuak khia peuhpeuh balzan gawp ding hi; bang hang hiam cih leh amaute’ mawhna uh tamlua a, kei hong taisan mun lua uh hi.

Ezekiel 22:6

Na sunga om Israel ulian khempeuh in amau’ thatang muang uh a, mi that uh hi.

Jeremiah 22:17

Ahih hangin note in thu manlo tawh ngah nading ahi zongin, mimawh lote’ sisan luan’ nading ahi zongin, mi nuaisiahna leh ngongtat nading ahi zongin, na mitte uh leh na lungsim uh na zang uh hi.

Isaiah 1:23

Na uliante, mi lehdote hi a, gutate tawh a kikhawlte ahi hi. Mi khempeuh in sumgolh leh letsong deih uh hi. Amaute in pa nei lote pan’pih lo uh a, meigongnu’ thu amaute in sang lo uh hi.

Paunak 28:15

Mizawngte a uk migilopa in humpinelkai gilkial, leh vompi halungvei tawh kibang hi.

Isaiah 5:29

Amaute’ kikona pen humpinelkai hawk tawh kibang a, humpinelkai khanglaite bangin amaute hawk uh hi; amaute humhamin a sa nek ding uh man uh a, amaute in puakhia-in kuamah in honkhia zo lo hi.

Ezekiel 33:26

Note in namsau suan’in na nei uh a, na gamtatnate uh kihhuai mahmah hi. Mi khempeuh in nu-le-pa mawhna na gamta uh hi. Tua bangpi-in hih gam luah thei ding na hi uh hiam? ci-in gen in.

Jeremiah 23:11

Topa in a cih-inah: “Kamsangte leh siampite in Pasian a zahtak kei uh hi. Ka biakinn sung nangawn ah amau’ gitlohna ka mu hi.