Sawltak 7:45 - Tedim Bible

⁴⁵ A piang nunung eite pate in tua buk Gentailte’ lei a luah uh ciangin Joshua tawh a paipih uh hi. Tua Gentailte Pasian in David’ khang dongin i pu i pate mai pan a hawlkhia hi.

Tedim Bible Revision 2017

⁴⁵ Tua khit ciangin i pute in amauʼ pate tung panin a ngah uh tua puanbuk pen amauʼ ten nading gam a la dingin a kuan uh ciangin na pua uh a, Pasian in amauteʼ mai ah tua gam mite hawl khiatsak ahih manin tua gam a luah uh ciangin a puanbuk zong a na tunpih uh hi. Tua ahih manin Davidʼ hun ciang dong tua puanbuk na om hi.

Sawltak 7:45 Referans Kwoze

Late 44:2

Na khut tawh minam dangte na hawlkhia a, ahih hangin amaute na phut hi; midangte na sugawp a, ahih hangin amaute na suakta sak hi;

Sawltak 13:19

Kanaan gam sung mipawl sagih a suksiat khit ciangin tuate gam ama mite in a luah dingun kum zali leh sawmnga tawntung a hawmsak hi.

Joshua 24:18

Topa in eite mai-ah mi khempeuh, tua gam-a teeng Amor mite hawlkhia hi; tua ahih ciangin amah in i Pasian ahih manin kote in zong Topa’ na ka sem ding uh hi,” a ci uh hi.

Joshua 23:9

Bang hang hiam cih leh Topa in note mai-ah a lian a tha-hat minamte hawlkhia hi; note ahih leh tu ni dongin mi khat beek in hong nang zo lo hi.

Joshua 18:1

Tua ciangin Israel mihon buppi Shiloh-ah kikhawm uh a, tua lai-ah kikhopna buk lam uh hi; amaute mai-ah gam zawhsa-in om hi.

Hebru 4:8

Bang hang hiam i cih leh, Joshua in tua mite nopsakna pia hi leh, tua nung ciangin a nidang ni thu Pasian in a gen kei ding hi.

Late 78:55

Amah in, minamte, amau’ mai panin hawlkhia-in; amau’ luah ding neihsa hawmsak a, Israel minamte amau buk sungah teeng sak hi.

Nehemiah 9:24

A suan a khakte uh tua gamah lutin a lak uh ciangin, amau’ mai-ah tua gam-a teeng Kanaan mite na nuaisiah a, a ut bang bangun a bawl dingun a kumpite leh a mite amau’ khut sungah na pia hi.

1 KHANG TANGTHU MASATE 21:29

Bang hang hiam cih leh Moses in gamlakah a bawl Topa’ biakbuk leh meihal biakna tau pen tua hunin Gibeon mualdawn ah om lai hi;

1 KHANG TANGTHU MASATE 16:39

Tua ciangin amah in Topa’ thukham sungah a kigelh ama thupiak khempeuh bangin, zingsang leh nitakin meihal biakna tau tungah Topa’ adingin meihal biaknate a pia tawntung dingin, Gibeon a, om mual dawn-a Topa’ biakbuk mai-ahsiampi Zadok leh a sanggam siampite nusia hi.

1 KUMPI MASATE 8:4

Tua ciangin amaute in Topa’ thuciamna singkuang, kikhopna buk, leh puanbuk sunga om a siangtho nazatte khempeuh paipih uh hi; siampite leh Levi mite in tuate paipih to uh hi.

1 SAMUEL MASA 4:4

Tua ahih ciangin mite in Shiloh-ah mi paisak uh a, Kherubte tungah a tu Vanglianpen Topa’ thuciamna singkuang tua lai panin hong pua uh hi; Eli’ tapa nihte, Hofni leh Finehas Pasian’ thuciamna singkuang tawh tua lai-ah om uh hi.

Thukhente 18:31

Tua ahih ciangin amaute in Shiloh-ah Pasian’ inn a om sung teng Mikah’ bawlsa a kiseek milim phut uh hi.

Thu-hilhkikna 32:49

Jerikho gal lam, Moab sungah a om Nebo Mual, hih Abarim mual tungah kahto in; a neih dingun Israel mite tungah ka piak Kanaan gam en in;

Late 80:8

Nangmah in, Izipt panin leenggui khat na la a, minamte hawlkhia-in, tua leenggui na suan hi.

1 KHANG TANGTHU MASATE 7:27

a tapa Mun, a tapa Joshua ahi hi.