Sawltak 5:31 - Tedim Bible

³¹ Israel mipawl kisikkikna leh mawh kimaisakna thu a piak nading tua mi in Ukpa leh Gumpa a suah na’ngin Pasian in ama ziat lamah a koih sang hi.

Tedim Bible Revision 2017

³¹ Israel mite kisikkikin Pasian in a mawhna uh a maisak theih nadingin Ukpi le Honpa-in tua Jesu bawlin ama tak lamah a tusak hi.

Sawltak 5:31 Referans Kwoze

Luka 24:47

ama min tawh kisikkikna thu leh mawhmaisakna thu Jerusalem khua pan akipan mi pawl khempeuhte’ kiangah a kigen ding hi ci-in kigelh hi.

Sawltak 2:33

Tua ahih ciangin amah in Pasian’ ziat lamah pahtawina ngah a, Pa kiangah Kha Siangtho kiciamna a ngah khit ciangin, no na muh na zak uh nate hong bua zo hi.

Sawltak 11:18

Amaute in hih thu a zak uh ciangin nial loin, “Pasian in Gentailte zong a nuntak nadingin kisikkikna thu a pia hi,” ci-in Pasian a phat uh hi.

Luka 2:11

Tuni-in, David’ khua-ah Topa Khazih ahi hong Gumpa in note adingin a suak zo hi.

1 JOHAN MASA 4:14

Pa in a Tapa leitungmite’ Gumpa a suah nadingin hong sawl thu kote in thei-in teci ka pang uh hi.

Hebru 2:10

Bang hang hiam na cih uh leh, ta tampite vanglian nopsakna-ah a khak nadingin, tua mite’ gupna a piangsakpa in gimna a thuakna hangin kicin’na a tun’ nadingin na khempeuh bawl a, a uk Pasian in a kilawm hi.

Hebru 12:2

eite upna a piangsakpa a kicingsakpa Zeisu a tel takin enin, i mai-ah a om kitaitehna-ah thakiamsak loin kidem ni. Tua Topa Zeisu in ama mai-ah a koih lungnopna thu hangin zumna ngaihsun loin, singlamteh a thuak khit ciangin Pasian’ tokhom ziat lamah a tu hi.

Isaiah 9:6

Bang hang hiam cih leh eite adingin naungek khat hong suak a, eite tungah tapa khat hong kipia hi; ama liangko tungah ukna om ding a, ama min pen, “Lamdang, Thulakpa, Vanglian Pasian, Tawntung Pa, Nopsakna Kumpi,” kici ding hi.

Sawltak 3:15

nuntakna hong pia Mangpa na that tazen uh hi! Ahih hangin Pasian in amah a thawhkiksak thu kote in teci ka hi uh hi.

Mattiu 28:18

Zeisu in amau kiangah va pai a, “Vantungah ahi zongin, leitungah ahi zongin, vangliatna khempeuh kei hong kipia zo hi.

2 PETER NIHNA 1:11

Tua bang hangin eite Topa leh Honpa Zeisu Khazih’ tawntung Gam sung lut theihna thu note a kicingin hong kipia ding hi.

Sawltak 2:38

Piter in, “Na mawhnate uh kisikkik un la, na vekpi un, mawh kimaisak nadingin Zeisu Khazih’ min tawh kibaptaiz un, Tua bang na hih uh leh, Kha Siangtho’ thupha letsong na ngah ding uh hi.

Mattiu 1:21

Amah in tapa a nei ding hi. Tua tapa in ama mipawlte’ mawhnate sung pan a gumkhia ding ahih ciangin a min Zeisu na phuak ding hi,” ci-in a hilh hi.

Zekhariah 12:10

David’ suan-le-khakte leh Jerusalem khuamite tungah, hehpihna leh thunget nopna lungsim ka guan ding hi. Amaute in a sut lup uh mipa enin, ta khat neihsun a sihsuahte bangin kap ding uh a, a tacil a khuaisuahte bangin nakpi takin kapin thuum ding uh hi.

2 PETER NIHNA 1:1

Zeisu Khazih’ sila leh sawltak keimah Simon Piter in, eite Pasian leh Honpa Zeisu Khazih’ dikna hangin kote thu-up bangin a manpha upna a ngah mite ka hong zasak hi.

1 PETER MASA 3:22

Tua Topa vantungah kahto a, Pasian’ ziat lamah a tu hi. Vantungmite akipan, a ukte leh vangliatnate in ama nuai-ah kikoihin a om hi.

Kolose 1:14

Tua a Tapa’ sisan hangin i mawhnate maisakna ahi hong tatkhiatna thupha i ngah hi.

Filippi 3:20

Eite in i hih leh, vantung gam tawh kipawl mi i hi hi. Tua gam panin Honpa ahi Topa Zeisu Khazih hong paisuk kik ding hi ci-in eite in ngakin, lamenin i om hi.

Efesa 1:7

Pilna khempeuh leh phawktheih pilna khempeuh tawh kituak, eite tungah hehpihna a kicin’sak mah bangin tua Zeisu’ sisan hangin mawh maisakna ahi tatkhiatna thupha ama sungah eite in i ngah hi.

2 KORIN NIHNA 2:10

Midangte mawhna na maisak uh leh, tuate’ mawhna keimah in zong ka maisak ding hi. Bang hang hiam na cih uh leh, keimah in mi khat mawhna ka maisak ngei leh, note hong ngaihsunin Khazih’ mai-ah ka maisak hi.

Sawltak 13:23

Johan in amah a pai ma-in Israel mi khempeuh kiangah kisikkik nading baptaizna thu a hilhkholh lai takin tua David’ suante lakah Pasian in a ciamsa mah bangin Israelte ading Gumpa Zeisu a piangsak hi.

Sawltak 4:11

Tua Topa in innlam note in na paih uh, a nung cianga kiukawi bul a suakkik suang ahi hi.

Sawltak 3:26

Pasian in a Silapa hong thawhsak khit ciangin, note na vekpi un na khialhna uh pan hong kikheelsakin, note thupha hong pia dingin note kiangah hong paisak masa hi,” a ci hi.

Sawltak 3:19

Tua ahih ciangin Pasian kiang pan nopna hun hong tung a, note ading hong koihsa Khazih Zeisu hong paisak nadingin, note mawhna a sawpsiang nading na kisik un la, na lungsim uh na kikheel un.

Sawltak 2:36

Tua ahih ciangin note in singlamteh tungah na thah uh Zeisu pen Pasian in Topa leh Khazih a suaksak hi ci-in Israel mi khempeuh in a man takpi thei ta uh hen,” a ci hi.

Marka 4:12

amau enin, a en napi-un a mu kei ding uh a; ngai-in, a ngai napi-un a khiatna thei lo ding uh ahih ciangin, amaute thugentehna tawh ka hilh hi.”

Marka 2:10

Ahih hangin Mihing Tapa in leitungah mawhna a maisak theih nading, thu a neih lam na theih nadingun,

Daniel 9:25

Hih thu ciamteh in la, thei in: Jerusalem lamkik nading thupiak khiat huna kipan sathau kinilhpa’ ukpa hong pai dong nipi kalsagih leh nipi kal sawmguk leh nih ahi ding hi. Jerusalem kongzing lampi nei leh kulhpi nei-in kilamkik ding a, ahih hangin buai hun sung ahi ding hi.

Ezekiel 37:25

A pu a pate uh a ten’ nasa ahi ka nasempa Jakob tungah ka piak leitangah amaute teeng ding uh a, amaute bek hi loin a suan a khak dongun teeng suak ding uh hi. Ka nasempa David in amaute uk tawntung ding hi.

Ezekiel 34:24

Topa ahi keimah in amaute’ Pasian ka hi ding a, ka nasempa David in amaute a ukpa hi ding hi. Topa ahi keimah in hih thu ka gen khin hi.

Ezekiel 17:24

Tua ciangin singkung sangte phukin, singkung neute a liansakpa, singkung hingte keusakin, singkung keute a hingsak kik Topa ka hihna thu gam sunga om singkung khempeuh in thei ding uh hi. Topa ahi keimah in hih thu ka gen khin a, hih dingin ka gen bangin ka gamta ding hi,” hong ci hi.

Isaiah 49:26

Nang hong nengniam mite pen amau’ satak mah ka ne sak ding a, zukham bangin amau’ si mah kham ding uh hi. Tua ciangin, kei pen, Jakob’ Vanglian Pa, nang hong Tankhiapa, nang hong Honpa Topa ka hihna mi khempeuh in thei ding hi,” a ci hi.

Isaiah 45:21

Na thu uh sung un la, gen un; amaute kikum khawmsak un! Hih thu sawt pekin kua in genkhol ahi hiam? Tang lai-in kua in pulak ahi hiam? Keimah Topa hilo ka hi hiam? Thuman Pasian leh Honpa ahi, kei sim loh Pasian dang om lo hi; kei sim loh kuamah dang om lo hi.

Isaiah 43:11

Kei, keimah in Topa ka hi a, kei sim loh honpa dang om lo hi.

Isaiah 43:3

Bang hang hiam cih leh keimah in Topa na Pasian, Israelte’ Siangtho Pa, nangmah hong Honpa ka hi hi. Nangmah tat nadingin Izipt ka pia a, nangmah khek nadingin Ethiopia leh Seba ka pia hi.

Late 89:24

Amah it tawntungin, ama tungah ka thutak ding a, amah, ka gualzosak tawntung ding hi.

Late 89:19

Hunlui lai-in na thuman mipa tungah mang sungah thu genin hih bangin na ci hi: A vanglian khatpa tungah lukhu ka koih zo a, mite lak panin a kitengkhia mi khat ka liansak zo hi.

2 PETER NIHNA 3:18

Hehpihna thupha ah ahi zongin, i Topa leh Honpa Zeisu Khazih theihtelna ah ahi zongin na khangto un. Tua Topa tungah tu-a kipan a tawntungin minthan’na om ta hen. Amen.

2 PETER NIHNA 2:20

I Topa leh Honpa Zeisu Khazih theihtelna hangin leitung kihhuaina tawh a suahtak khit uh ciangin, khat vei awk kikin a lelh uh leh, a nung ciangin a pian’ in a pian’masak sangin a gilo zaw hi.

Titu 2:13

nialin; tu lai hunin khuaval zulhtat lohna, thuman gamtatna, Pasian biakna lamah nopsakna bawl nadingin, Pasian’ hehpihna thupha hong kilang a, mi khempeuh kiangah gupna thu hong paipih zo hi.

Titu 1:4

A kibang khawm upna thu sungah ka ta taktak ahi Titu kiangah thu ka hong zasak hi. Pa Pasian leh eite Honpa Khazih Zeisu kiang pan hehpihna thupha leh nopna nangma tungah om ta hen.

Johan 4:42

Amaute in numei kiangah, “Tu-in ahih leh, kote in na genna hangin um ka hi kei uh hi. Kote in zong ka za teekteek uh a, hih pa in leitung mite’ Gumpa ahi takpi hi ci-in ka thei uh hi,” a ci uh hi.