Sawltak 18:6 - Tedim Bible

⁶ Judah mite in thu nial uh a, a selpho uh ciangin Paul in langpanna tawh ama puan singkhia-in, “Note’ si uh note lu tungah om ta hen! Keimah ka siang hi. Tu-a kipanin Gentailte kiangah ka pai ding hi,” a cih khit ciangin

Tedim Bible Revision 2017

⁶ Jew mite in ama thuhilhna nialin a gensiat uh ciangin Paul in a puan tunga leivui baangte sinsanin, “Pasian tawh kikhenin siatna na tuah uh leh nomau khialhna hi a, kei nong ngawh nading uh om lo hi. Tu a kipanin Gentail mite kiangah thu ka hilh ding hi,” a ci hi.

Sawltak 18:6 Referans Kwoze

Ezekiel 33:4

Mi khatpeuh in tua patau kohna za napi-in don loin om mawk a, a galte hong pai-in tua mipa a thah leh, ama sihna sisan pen amahmah ngawh ding ahi hi.

2 SAMUEL NIHNA 1:16

Tua ciangin David in ama kiangah, “Nangma mawhna nangma lu tungah tung ta hen; bang hang hiam cih leh nangma kam in nang lang khatah teci pangin, ‘Topa’ sathau nilhpa ka that khin hi,’ na ci hi,” a ci hi.

Ezekiel 18:13

A meet lunggulhna-in sum leitawi pia a, a meet zong a kilawm loin tampi tak la hi. Hih bang mipa nungta ding ahi hiam? Nungta het lo ding hi. Hih bangin a mindai huaite khempeuh gamta ahih manin tuate’ hangin amah si ding hi. Ama sihna in ama mawhna hang ahi hi.

Nehemiah 5:13

Tua ciangin kei zong ka puan singin, “Hih thuciamna a tungsak lo peuhmah a inn leh a neihsa panin Pasian in singkhia ta hen. Hih bangin kisingkhia hen la, hawmsuak hen!” ka ci hi. Tua ciangin a kikhawmte khempeuh in, “Amen,” ci uh a, Topa phat uh hi. Tua hi a, a ciamsa bangun mite gamta uh hi.

Sawltak 13:51

Ahih hangin amaute in a khepeek tungah leivui amau langkhatah sin’ khiatin, Ikonium khua-ah a pai uh hi.

1 PETER MASA 4:4

Tua hihnate-ah note in amaute tawh kipawlin noptatna-ah kihhuaina na bawl lohna uh amaute in lamdangsa-in hong ko thei uh hi.

Luka 9:5

Mi khatpeuh in note hong nolh leh, amau khua pan na paikhiat uh ciangin, amau lang khatah teci a pang dingin, na khepeek nuai-a leivuite na singkhia un,” ci-in thu a pia hi.

Mattiu 27:25

Mi khempeuh in, “Ama si in ko tung leh ka tu ka tate tungah om tawntung ta hen,” a ci uh hi.

1 PETER MASA 4:14

Khazih’ min hangin kosiatna na thuak uh leh, thupha na ngah ding uh hi. Bang hang hiam na cih uh leh, minthan’na tawh kipawl kha ahi Pasian’ Kha Siangtho in note tungah a om hi.

2 TIMOTI NIHNA 2:25

A kam a nial mite in thuman a theih nadingun Pasian in kisikkikna pia kha ding a, Dawimangpa in ama deihna zui dingin thangsiah-a a awk mite phawkin, tua awkna pan suahtakna a ngah khak theih nadingun lungnemna tawh thuhilh mi ahi ding hi.

ROM (Romans) 3:29

Pasian in Judah mite’ Pasian bek ahi hiam? Gentailte’ Pasian zong hilo ahi hiam? Ahi mah hi. Pasian khat bek a om leh, Gentailte’ Pasian zong ahi hi.

Sawltak 28:28

Tua ahih ciangin Pasian in hong piak hih gupna thu Gentailte kiangah kipuak ding a,

Sawltak 26:20

Amaute kisikkik a, kisikkikna tawh kilawm gamtatna bawlin Pasian kiangah a kihei na’ngun Damaskas khua-ah ka gen masak khit ciangin Jerusalem khua akipan Judah gamah a om mi khempeuh kiangah ahi zongin, Gentailte kiangah ahi zongin ka hilh hi.

Sawltak 26:11

Mite in Pasian tungah a pau khialh nadingin thatang hat thu-in hanciamin, kikhopna inn khat pan khat ah tamveipi ka pai hi. Nakpi-in ka heh maninah gamdangte khua dongin amaute ka bawlsia hi.

Mattiu 22:10

A nasemte in lampi-ah paikhia uh a, a gi, a gilote, a muh khempeuh a kikhawmsak uh a, mopina pawi sungah mi a dim hi.

Mattiu 10:14

Mi khatpeuh mah in no hong nolh a, na thu uh a ngaih nop kei leh, tuapa’ inn pan ahi zongin, a khua pan ahi zongin na paikhiat uh ciangin, na khepeek uhah leivuite na singkhia un.

Luka 22:65

Kam dang tampi tawh Zeisu lang pangin a zahko uh hi.

Mattiu 21:43

Tua ahih ciangin, ke’n kong cih-inah Pasian Gam note kiang pan kilakhia ding a, tampi gah a gahsak thei mipawl dangte kipia ding hi.

Mattiu 8:11

Ke’n kong cih-inah, mi tampi in nisuahna lam, nitumna lam panin hong pai-in, Abraham, Isaak leh Jakobte tawh Vantung Gam sungah a tukhawm ding uh hi.

Siampi Laibu 20:9

Bang hang hiam cih leh a nu ahih kei leh a pa a samsia mi peuhmah kithat ding hi; amah in a nu ahih kei leh a pa samsia khin a, ama sihna ah amahmah ngawh ding ahi hi.

1 TIMOTI MASA 5:22

Thu ngaihsun masa loin kuama tungah a manlangin khutngakna nei kei in. Midangte mawhna tawh na kikum kei in, nangma nuntakna siangtho sak in.

1 KUMPI MASATE 2:33

Tua ahih ciangin mi thahna hangin dantahna in Joab’ lu tung leh ama suan leh khakte’ lu tungah a tawntungin hong tungkik ding hi; ahih hangin David tung, leh ama suan leh khakte tung, leh ama innkuan tung, leh ama kumpi tokhom tungah Topa kiang panin a tawntung nopna om ding hi,” a ci hi.

Ezekiel 33:6

Ahi zongin galvilpa in galte hong pai mu napi-in patau kohna peengkul a tum kei a, galte hong pai-in mi a thah leh, tua a site amau’ mawhna hangin a si ahi hi. Ahi zongin amaute’ sihna sisan pen galvilpa ka ngawh ding hi.

Mattiu 21:41

‘Tua migilote sugawp ding a, a gah a tun’ ciangin a gah a pia ding lo kho dangte a khawh lawhsak ding hi,” ci-in a gen uh hi.