Sawltak 18:5 - Tedim Bible

⁵ Silas leh Timoti in Makedonia gam panin hong tun’ uh ciangin, Paul in thuhilh bek semin, Zeisu in Khazih hi ci-in Judah mite nakpi-in a hilh hi.

Tedim Bible Revision 2017

⁵ Masedonia gam panin Silas le Timoti hong tun ciangin Paul in a hun neih khempeuh thuhilhna-in zang a, Jesu pen Khris ahi hi, ci-in Jew mite kiangah teltakin a gen hi.

Sawltak 18:5 Referans Kwoze

2 KORIN NIHNA 5:14

Bang hang hiam na cih uh leh, mi khempeuh tang ding mi khat bek si ahih ciangin mi khempeuh a si uh ahi zongin,

Sawltak 18:28

Bang hang hiam i cih leh, Zeisu in Khazih ahi hi cih thu Lai Siangtho tawh tel takin lak a, mite mai-ah Judah mite’ kam a nial hi.

Sawltak 20:21

Pasian mai-ah kisikkikna thu ahi zongin, eite Topa Zeisu Khazih upna ahi zongin, Judah mi leh Grik mite kiangah ka hilh hi cih note’n na thei uh hi.

Sawltak 17:3

Khazih in sihna a thuak khit ciangin sihna pan a thawhkik nading thu om a, “Kong thu hilh Zeisu in Khazih ahi hi,” ci-in a tel takin lakin thu a hilh hi.

Sawltak 9:22

Saul khangto-in siam semsem a, Judah mite’ thugenna hoih takin thukkikin, Zeisu in Khazih ahi takpi hi, ci-in a lak hi.

Ezekiel 3:14

Pasian’ Kha in hong pai khiatpih lai takin ka lungkim het loin ka heh suak mahmah hi. Ahi zongin Topa’ vangliatna in kei hong zo zaw hi.

Jeremiah 20:9

Keimah in, “Ama’ thu ka gen kei ding a, ama’ min ka lo nawn kei ding hi,” ci mah taleng zong, ama’ thu ka lungsim sungah meikuang bangin hong om a, ka guh ka tang sungah kikhum cip ahih manin ka ki-ip ipna-in ka gim lua a, gen loin ka om thei kei hi.

Jeremiah 6:11

Tua ahih ciangin Topa aw, na hehna tawh ka dim a, ka thuak zo nawn kei hi,” ka ci hi. Tua ciangin Topa in hong hopih-a, “Ka hehna kongzing lak-a naupangte’ tungah bua in la, tangvalte’ kikhopna-ah zong bua in. Papite leh nupite zong kilakhia ding a, pitek putekte zong a kipai khiatpih ding hi.

Filippi 1:23

Thu nih kikal ah cih nading meel thei loin ka om hi. Pai-in Khazih tawh ka om ding ka lunggulh hi. Bang hang hiam cih leh, keima adingin a phazaw mahmah ding hi.

Sawltak 2:36

Tua ahih ciangin note in singlamteh tungah na thah uh Zeisu pen Pasian in Topa leh Khazih a suaksak hi ci-in Israel mi khempeuh in a man takpi thei ta uh hen,” a ci hi.

1 PETER MASA 5:12

Keimah in note hong hansuahin, hih thute in Pasian’ hehpihna thupha thu a man takpi ahi ci-in teci pangin hih lai a tomin ka gelh khit ciangin, midik ka sak sanggampa Silvanas’ khut sung pan ka hong pia hi.Tua sungah na kip un.

1 THESALONIKA MASA 3:2

Khazih’ Lungdamna Thu hilhin, i sanggampa Timoti note kiangah ka hong sawl uh hi. Hih gimnate hangin kuamah a lungkiat loh nadingin, note hong kipsak a, na upna uh ah note hong hansuah nadingin amah ka hong sawl uh hi.

Sawltak 16:9

Zan ciangin Paul in mang a mu hi. Tua mang sungah Makedonia mi khat ding-in, “Makedonia gamah galkah in la, kote hong huh in,” ci-in a thuum hi.

Sawltak 16:1

Paul in Derbe khua leh Listra khua-ah a tung hi. Tua Listra khua-ah Timoti min nei nungzui khat a om hi. A nu in thu-um Judah numei ahi hi.

Sawltak 15:22

Tua ciangin sawltakte leh upate leh pawlpi khempeuh in amaute lakah, unaute lakah milian ahi uh Barsabbas, a min thak Judah leh Silas teelin, Antiok khua-ah Paul leh Barnabas tawh pai khawmsak leng a hoih hi ci-in a ki-awi uh hi.

Sawltak 10:42

Amah in ‘Mi khempeuh kiangah thuhilh un la, mi nungta leh misite thu khen dingin Pasian’ koihsa mi in tua mi ahi hi ci-in teci na pang un,’ ci-in kote thu hong pia hi.

Sawltak 4:20

Kote ka hih uh leh, ka muhsa uh, ka theihsa uh thute gen loin ka om thei kei ding uh hi,” ci-in a dawng uh hi.

Johan 15:27

Note in zong a cil pan akipan kei tawh omkhawm na hih uh ciangin, teci na pang ding uh hi.”

Johan 10:24

Tua lai takin Judah mite in Zeisu kimkotin hong kikhawm uh a, “Bang tanvei ko hong lungkhamsak ding na hi hiam? Nang Khazih na hih leh, tangtakpi-in hong gen in,” a ci uh hi.

Johan 3:28

Keimah in Khazih ka hi kei hi. Khazih mai-ah hong paipa ka hi hi ke’n kong ci zo a, note zong ka teci na hi uh hi.

Johan 1:41

Amah in a u Simon zong masa a, “Messiah ka mu zo uh hi,” ci-in Zeisu kiangah a paipih hi. Messiah a khiatna in ‘Khazih’ cihnopna ahi hi.

Luka 12:50

Ahih hangin, baptaizna khat thuak ding ka nei hi. Tua baptaizna ka thuak matengin ka lungkim lo ding hi.

Micah 3:8

Ahi zongin kei ka hih leh, Israel mite tungah a mawhna uh a gen khia dingin, Topa’ Kha vangliatna tawh kidimin, thutang gen ngamna lungsim ka nei hi.

Luka 16:28

Amaute in hih gimna sungah a tun’ loh nading thu a hilh dingin ka pa’ innah Lazaras nong sawlsak nadingin kong ngen hi,’ a ci hi.

Sawltak 16:12

Tua khua panin paikhia-in Rom khua kici Makedonia gam sungah a lianbel khua ahi, Filippi khua ka tung uh a, sawt veipi ka tam uh hi.

Sawltak 20:23

Ahih hangin kihenna leh thong sung khiat nadingte in kei hong ngak hi ci-in Kha Siangtho in khua khempeuh ah kei hong hilh hi.

Sawltak 20:24

Ahih hangin Pasian’ hehpihna Lungdamna Thu hilh nading Topa Zeisu’ khut sung pan ka ngah za ahi, ka nasepna ka zawh theih nadingin ka nuntakna keimah ading phamawh ka sa kei hi.

2 KORIN NIHNA 1:19

Bang hang hiam na cih uh leh, keimah-a kipan Silvanas leh Timoti-te in note kiangah kong hilh uh Pasian’ Tapa Zeisu Khazih in, “Ahi hi,” ci ding ahi zongin, “Ahi kei hi,” ci ding ahi zongin ahi kei hi; “Ahi hi,” a cihna bek ahi den hi.

2 KORIN NIHNA 11:9

No tawh ka omkhawm lai takin na khat peuhpeuh ka deih ciangin kuamah tungah vangik ka guan’ kei hi. Bang hang hiam na cih uh leh, Makedonia gam pan a hong pai ute naute in ka deihna khempeuh hong pia hi. Note tungah gimna khat ka suah loh nadingin kei in na khempeuhah ka kikem hi. A nung ciangin zong ka kikem lai ding hi.

1 THESALONIKA MASA 3:6

Tu-in ahih leh, Timoti in note kiang pan hong ciahkik a, note upna leh ki-itna uh a kip hi ci-in ahi zongin, kote in note kong ngaih uh mah bangin note in kote hang ngai-in, ni simin hong ngaihsun a, hong phawk uh hi ci-in ahi zongin, lungdam thu hong zasak ahih ciangin,