Micah 7:9 - Tedim Bible

⁹ Amah in ka thu hong sun’sakin, kei adingin thu hong khensak mateng Topa’ hehna ka thuak ding hi; bang hang hiam cih leh ama’ tungah ka mawh khin zo hi. Amah in khuavak ah hong paipih ding a, ama’ hotkhiatna ka mu ding hi.

Tedim Bible Revision 2017

⁹ Topa tungah khial khin ka hih manin ama hehna tawl khat ka thuak ding hi. Ahi zongin a tawpna ah kei hong huh dinga, a man lopi-in a hong kibawlna teng hong bawl phatsakin, amah in hong hon khia ding hi.

Micah 7:9 Referans Kwoze

1 KORIN MASA 4:5

Tua ahih ciangin khuamial lakah a kiselte leh lungsim sungah hanciamnate a kilangsak ding, Pasian hong pai dong matengin, a hun hong tun’ ma-in thu na khen kei un. Tua hun ciangin Pasian kiang pan phatna thu a ngah ciat ding uh hi.

Late 37:6

Amah in na dikna khuavak bangin, na thumanna sun ni taang bangin hong lang sak ding hi.

1 SAMUEL MASA 24:15

Tua ahih ciangin Topa in thukhen hong hi-in, kei leh nang kikalah thukhenna hong pia hen la, hih thu thei-in ka thu-ah hong pang hen la, na khutsung panin kei hong honkhia hen,” a ci hi.

2 TIMOTI NIHNA 4:8

Tu-a kipanin dikna lukhu, keimah ading a kikoih khol zo hi. Tua Ni ciangin thuman tawh a khenpa in tua lukhu kei hong pia ding hi. Keimah bek hong pia kei ding hi, ama kilat ding thu a lamente khempeuh zong a pia ding hi.

Malakhi 3:18

Tua ciangin, midikte leh migilote, leh keima na hong semte leh hong sem lote a kilamdan’na na mu kik ding uh hi,” a ci hi.

Mangmuhna 18:20

Vantung-a kipan misiangthote, sawltakte, kamsangte aw, tua khuapi hangin nuam un! Bang hang hiam na cih uh leh, Pasian in note tawh kipawlin ama tungah thu a khen zo hi!” a ci hi.

Isaiah 46:13

Ka dikna kong tungsak ta a, gamla nawn lo hi; ka hotkhiatna zekai lo ding hi; keima minthan’na ahi Israel adingin, Jerusalem ka honkhia ding hi.”

Late 43:1

Pasian aw, ka dikna hong langsak in la, migilote tawh ka thu-ah hong panpih in; mi kheemte leh thutang lote kiang panin kei hong honkhia in!

Late 7:6

Tho in, Topa, hehsa-in thasaan in la, ka galte’ hehna hong dal in; khanglo in, ka Pasian aw, thukhen nading khat na seh khin zo hi.

JOB (Job) 23:10

Ahi zongin Pasian in ka kalsuanna khempeuh thei a, kei hong ze-et khit ciangin kham bangin ka sian’thona a mu ding hi.

2 SAMUEL NIHNA 24:17

Tua ciangin mite a vat vantungmi a muh ciangin David in Topa tungah thu gen a, “En in, ka mawh hi, a khialpa in kei ka hi hi; ahih hangin hih tuute in bang hih uh hiam? Kong thum hi, kei leh ka innkuante bek daan hong pia in,” a ci hi.

1 SAMUEL MASA 26:10

David in, “Topa in a nungta ahih mah bangin Topa in amah vat ding hi; tua ahih kei leh zong a sih hun hong tung ding hi; tua ahih kei leh gal kikapna sungah amah paisukin si ding hi.

1 SAMUEL MASA 25:39

Nabal a sihna thu David in a zak ciangin amah in, “Nabal’ khut tung panin ka ngah zahkona hong thuk sakin, siatna panin a nasempa a lenkik Topa in thupha ngah ta hen; Topa in Nabal’ gamtat siatna ama lu tung mah ah tung kiksak hi,” a ci hi. Tua ciangin David in mi sawlin ama zi dingin Abigail helsak hi.

1 SAMUEL MASA 3:18

Tua ahih ciangin Samuel in ama kiangah a vekpi-in genin bangmah iim lo hi. Tua ciangin amah in, “Amah in Topa ahi hi; amah in hoih a sak bangin amah hih sak in,” a ci hi.

Siampi Laibu 26:41

“Ahih hangin kei tungah khemna tawh hong gamtatnasa uh leh kei tawh kilehngatin a paina uh hangin amaute tawh kilehngatin pai-in, amau galte’ leitangah amaute ka paipihna thu ahi, amau’ mawhna leh, a pu a pate’ mawhna pulakin a lungsim uh niamkhiatin, amaute in a mawhna a kipuahphat uh leh;

Kah la 1:18

Topa in a thutang ahi hi. Bang hang hiam cih leh keimah in ama thu a mang lo ka hi hi. Mun khempeuh-a a om mite aw ka thu genna hong ngai un. Ka thuaknate hong mu dih un. Ka khangno numei pasalte sal-in a kipua khia hi.

Late 94:15

bang hang hiam cih leh thutang pen thumante tungah hong tungkik ding a, lungsim thutang khempeuh in amah zui ding uh hi.

Late 119:154

Ka thu-ah hong pang in la, kei hong suaktasak in; na ciamsa bangin kei hong honkhia in!

Isaiah 42:16

Amau’ theih loh lampi ah mittawte ka paipih ding a, amau’ theih ngei loh sul zuihpih-in ka kha ding hi. Amau’ mai-ah khuamial pen khuavak suaksakin, a phokna munte a tam-in ka bawl ding hi. Hihte pen keima hih ding nate hi a, tuate sem loin ka nusia kei ding hi.

Isaiah 56:1

Topa in hih bangin ci hi: “Sawt loin note hong honkhia ding a, ka dikna hong lakkhia ding ka hih manin thutang un la, thumanin gamta un.

Jeremiah 10:19

Ka thuakna hangin ka gim hi! Ka liamna nasia mahmah hi. Ahih hangin, “Hih gimna ka thuak ding mah hi,” ka ci hi.

Jeremiah 51:10

Topa in thuman i hihna hong kilangkhia sak zo hi. Hong pai un, Topa i Pasian’ nasepna Zion khua-ah va tangko ni.

JOB (Job) 35:14

Job aw, nang in, Pasian ka mu thei kei a, ahi zongin ka thu ama khut sungah om a, lungduai takin ka ngak niloh hi, na ci hi.

Isaiah 51:22

Ama mite’ a hu Topa, Topa ahi, na Pasian in hih bangin ci hi: “En un, note’ khut sung panin hoina hai ka lakhia khin hi; ka hehna haipi na dawn nawn kei ding uh hi;

Jeremiah 14:7

Ka mite in kei tungah, “Topa aw, ka mawhna-un in kote’ lang khatah hong pang ahi ta zongin, nangma’ min hangin hong hehpih in. Kote in tam veipi kong nungngat uh a, nang tungah kong khial zo uh hi.