Micah 4:4 - Tedim Bible

⁴ A kuamah peuh lungnuamin, a leenggui phung leh a theikung nuai-ah ta hithiat ding a, kuamah in patausak nawn lo ding hi. Bang hang hiam cih leh Topa’ kam mahmah in hih thu gen khin ta hi.

Tedim Bible Revision 2017

⁴ A kuamah peuh lungnuamin a leenggui phung le a theikung nuai ah tu hithiat dinga, kuamah in patausak nawn lo ding hi. Bang hang hiam cih leh Vanglian Topa mahmah in hih thu hong gen khinta hi.

Micah 4:4 Referans Kwoze

Zekhariah 3:10

Tua ni ciangin note khempeuh in leenggui leh theikungte hau-in nuam na sa ding uh a, na veengte ciat un hong nekpihin hong lungdampih nadingun na sam ding uh hi, Vanglianpen Topa in ci hi,” a ci hi.

1 KUMPI MASATE 4:25

Solomon’ hun sung khempeuh Judah leh Israel lungmuang takin omin, Dan panin Be-ersheba ciang dong nangawn mi khempeuh a leenggui leh a theikung nuai uhah om uh hi.

Ezekiel 39:26

Amaute gam sungah kuamah in su loin lungmuangin a om kik uh hun ciangin, kei hong lehbawlnate uh leh a mindainate uh mangngilh thei ta ding uh hi.

Isaiah 1:20

Ahih hangin note in kei hong nialin nong lehdo uh leh namsau in note hong vatmai ding hi; bang hang hiam cih leh Topa in hih thu gen khin zo hi.”

Isaiah 54:14

Thumanna tawh nang hong kikipsak ding hi; nenniamna tawh na kigamla ding a, nang na lau kei ding hi; kihtakna tawh na kigamla ding a, nang nai-ah hong pai lo ding hi.

Ezekiel 34:28

Gamdang mite in hih gawpgawp nawn lo ding uh a, gamsate in thatin ne nawn lo ding uh hi. Amaute lungmuang takin om ding uh a, kuamah in lausak nawn lo ding uh hi.

Isaiah 58:14

Keimah biakna hangin lungdamna na ngah ding uh a, leitang a sanna munte ah kong tungsak ding hi. Na pu uh Jakob tungah ka piak leitang luahin nuam na sa ding uh hi. Topa ahi keimah in hih thu ka gen khin hi,” a ci hi.

Isaiah 40:5

Topa’ kam in gen khin ahih manin, Topa’ minthan’na hong kilang ding a, mi khempeuh in mu khawm ding uh hi,” a ci hi.

Ezekiel 38:11

A khuapite in gal nan’ nading kulh nei loin, lungmuang takin a om hithiat, a kihu tawm zo lo ding gam khat, simgawp ding na ngaihsun ding hi.

Ezekiel 34:25

Amaute lungmuang takin a om theih nadingun amaute tawh thuciamna khat ka bawl ding hi. Gam sung panin a lauhuai gamsa khempeuh ka beisak ding a, gamlakah nuam takin gamta-in lum thei ding uh hi.

Isaiah 26:16

Topa aw, amaute a cihmawhna uhah nang hong zuan uh a, nangmah in amaute thu na hilh a, a thungetna uh ging zo lo hi.

Siampi Laibu 26:6

Keimah in gam sungah nopsakna hong pia-in, note lungdam takin na lum ding uh a, bangmah in note hong lausak lo ding hi; keimah in gam sung panin ganhing gilote ka hawlkhia ding a, gal kidona in na gam uh hong nawk lo ding hi.

JOB (Job) 11:19

Kuamah kihtak nei loin nuam takin na om ding a, mi tampi in nangma maipha hong zong ding uh hi.

Late 72:3

Mualliante leh mualneute in thumanna tawh na mite’ adingin nopna puak ta hen!

Isaiah 17:2

Ama khuapite ahi Aroer kinusiacip paisuak ding hi; tuuhonte’ omna ding suak ding a, amaute lum hithiatin bangmah in lausak lo ding hi.

Isaiah 22:25

Vanglianpen Topa in, tua ni ciangin mun hoihna a, a kikheen vankhai in lel ding hi; Topa in gen khin ahih ciangin, amah pen kitanin kia ding a, ama tunga vangik teng kisia ding hi,” hong ci hi.

Isaiah 36:16

Hezekiah’ thu ngai kei un; bang hang hiam cih leh Assiria kumpipa in hih bangin ci hi. Kei tawh kilemna bawl un la, kei kiangah hong pai un; kei hong pai-in, note’ gam tawh a kibang gam khat, an leh leenggahzu gam, an leh leenggui gamah kong koih matengin note khempeuh in nomau leenggah ciat, nomau theigah ciat, na tuikhuk panun nomau tui ciat na ne ding uh hi.

Jeremiah 30:10

“Tua ahih manin Topa in kong cih-inah; Ka nasempa Jakob’ suante aw, lau kei un. Israel mite aw, patau kei un. Bang hang hiam cih leh gamlapi gam panin no kong honkhia ding a, na suan na khakte-uh’ saltan’na panin kong honkhia ding hi. Jakob’ suante hong ciahkik ding uh a, nuam takin a teeng kik ding uh hi. Kuamah in amaute a lausak nawn kei ding hi.

1 KUMPI MASATE 5:5

Tua ahih ciangin Topa in ka pa David kiangah, ‘Nangma taangin na kumpi tokhom tungah ka koih ding na tapa in ka min dingin inn lam ding hi,’ a cih mah bangin Topa ka Pasian’ min dingin inn khat lam ka sawm hi.

Paunak 3:25

Migilote tungah huihpi bangin siatna a tun’ ciangin, nang na lunghihmawh nading om lo ding hi.

Isaiah 32:17

Tua ciangin thumanna hangin nopna om ding a, thumanna hangin daihna leh lungmuan’ tawntungna om ding hi.

Jeremiah 23:4

Amaute don ding makaite ka koih ding a, lau nawn lo, lungkham nawn loin khat beek a mangthang nawn kei ding uh hi, Topa in kong ci hi.

Micah 5:3

Tua ahih ciangin, numei naupai nu, a nau a suah khit mateng, amau’ galte khut sungah Topa in amaute pia phot hi. Ama hong khan’ ciangin, sal-a om a gam mite, a mipihte uh tawh hong kigawm kik ding hi.

Zefaniah 3:13

Israel mi a om lai sunte, midang tungah gilo nawn lo ding a, zuauthu gen nawn loin, mi kheem ding zong ngaihsun nawn lo ding uh hi. Amaute cithei-in lungmuangin om ding uh a, kuamah kihta nawn lo ding uh hi,” ci hi.