Micah 4:3 - Tedim Bible

³ Amah in minam tampite’ thu khensak ding a, Israel gam panin a gamla peka om, minam vangliante’ thu khensak ding hi. Amaute in a namsaute uh lo khawhna tu-in seek ding uh a, a teipite uh singhiang heuhna temkawi-in seek ding uh hi. Minam khat leh khat kido nawn lo ding uh a, gal kidona thei kha nawn lo ding uh hi.

Tedim Bible Revision 2017

³ Amah in minam tampiteʼ thu khensak dinga, Israel gam panin a gamla pekah a om, minam vanglianteʼ thu khensak ding hi. Amaute in a namsaute uh lokhawhna tu-in seek ding uh a, a teipite uh singhiang heuhna temkawi-in seek ding uh hi. Minam khatlekhat kido nawn lo ding uh a, gal kidona thei kha nawn lo ding uh hi.

Micah 4:3 Referans Kwoze

Isaiah 2:4

Amah in minamte khat leh khat kikal ah thukhenin, mi tampite’ thu khentat sak ding hi; amaute in a namsaute uh lo khawh na tu, a teipite uh singhiang heuhna temkawi-in seek ding uh hi; Minam khat leh minam khat kido nawn lo ding a, galdo dingin kithawi nawn lo ding uh hi.

Hosea 2:18

Tua ciangin, ka mite a suksiat loh nadingun gamlaka om gamsate, huih laka leeng vasate, leh leitung a bokvak ganhingte tawh thuciamna ka bawl ding a, thalte, namsaute, galhiam khempeuh, leitung panin ka phiat khia ding hi. A lungnuam, lungmuang hithiatin ka mite ka om sak ding hi.

Sawltak 17:31

Bang hang hiam na cih uh leh, amah in a sehkholhpa tawh leitung mite, thuman tawh thukhen nading ni a genkhol zo hi. Tua pa sihna pan a thawhkik ciangin a kitel zo hi ci-in mi khempeuh a thei sak zo hi,” ci-in Paul in a gen hi.

Isaiah 65:25

Keivom leh tuuno in an ne khawm ding uh a, humpinelkai in bawngtal bangin buhkung ne ding hi; leivui pen gulpi’ an hi ding hi. Keima mual siangtho tung tengah amaute kiliamsak lo, kisusia lo ding uh hi, Topa in ci hi, a ci hi.

Mangmuhna 19:11

Tua khit ciangin vantung kihongin ka et leh, sakol kaang khat ka mu hi. Tua sakol tung tuang mi in Dikna leh Thuman kici hi. Tua mi in dik takin thu a khen thei, gal a do thei hi.

Zekhariah 14:3

Tua ciangin Topa hong kuankhia ding a, a beisa hun-a a sim ngei bangin hih minam dangte hong sim ding hi.

Zekhariah 9:10

Gal kidona leengte, Israel gam pan beisakin, sakol galkapte, Judah gam pan ka la khia ding a, galdona-a kizang thalte, kisusia ding hi. Na kumpipa un, minamte lakah kilemna thu gen ding a, amah in, tuipi mong khat pan tuipi mong khat dong, Eufrates gunpi panin leimong dongin uk ding hi.

Micah 5:15

Ka thu hong mang lo minamte tungah hehna tawh phu ka la ding hi.

Joel 3:2

Minam khempeuhte kaikhawmin, Jehoshafat Kuam-ah ka paipih ding hi. Ka mihingte tungah a bawlnasa hangun, tua munah amaute thu ka khen ding hi. Amaute in Israel mite, gamdangah thehthang uh a, ka gamsung teng phelhawm uh hi.

Daniel 2:44

Tua kumpite a maan’ lai takun, vantung Pasian in a bei thei ngei lo ding kumpigam a hong phut ding hi. Tua kumpigam kuamah in zo zo lo ding a, tua gam in gam dang khempeuhte zo gawpin, a kip tawntung ding hi.

Isaiah 60:12

Bang hang hiam cih leh nangma na hong sem lo minam leh kumpi gam beimang ding hi; tua minamte kisia maimang ding hi.

Isaiah 51:5

Manlangin hong pai-in amaute ka honkhia ding hi. Ka gualzawh ding hun hong naita hi. Keimah in minamte ka uk ding hi. Tuipi gei-a gamte in kei hong muang uh a, amaute in keima hotkhiat ding hong ngak uh hi.

Isaiah 25:3

Tua ahih ciangin mi thahatte in nang hong minthang sak ding a, thukhual lo minamte’ khuapite in nang hong zahtak ding uh hi.

Isaiah 9:7

Tua huna kipanin a tawntungin David kumpi tokhom tungah maangin ama gam sungah thutan’na leh thumanna phutin a kipsak nadingin, alian semsem ama ukna leh nopsakna in mong nei lo ding hi. Vanglianpen Topa’ deih luatna in hih thu hong tungsak ding hi.

Late 82:8

Pasian aw, tho in, leitung thu khen in; bang hang hiam cih leh minam khempeuh nangma’ aa ahi hi.

Late 72:7

Ama hun sungin thumanna pung hen la, khapi a bei mateng nopna om ta hen!

Late 46:9

Amah in leimong dong ah gal beisak hi; amah in thalpi kuaitanin, teipi susia a, leengte mei tawh haltum hi.

1 SAMUEL MASA 2:10

Topa’ langte tamkham ding a, amah in amaute do-in vantungah van gingsak ding hi. Topa in lei mong dongah thukhen ding hi; amah in ama kumpipa tungah thahatna pia ding a, a sathau nilhpa’ vangliatna sangsak ding hi,” a ci hi.

Late 72:3

Mualliante leh mualneute in thumanna tawh na mite’ adingin nopna puak ta hen!

Zekhariah 8:20

Vanglianpen Topa in hih bangin ci hi: “Minam liante leh khuapi liante panin Jerusalem ah mi hong pai hun hong tung ding hi.

Late 46:10

“Om hit-hiat un la, Pasian ka hihna thei un. Minamte lakah keimah hong kisangsak a, leitungah ka min hong kithangsak hi!”

Hosea 2:20

Kei’ aa ahi tawntung dingin nang kong la ding hi. Tua ciangin Topa ka hih lam tak nong thei ding hi.