Micah 4:10 - Tedim Bible

¹⁰ Jerusalem khuamite aw, numei nausuak ding bangin tha saan un. Tu-in khuapi nusia-in, gam sung khua-ah a teeng ding na hi ta uh a, Babilon khuapi a zuan ta ding na hi uh hi. Ahi zongin tua lai-ah note hong kihonkhia-in, na galte uh khut sung panin Topa in hong tankhia ding hi.

Tedim Bible Revision 2017

¹⁰ Jerusalem khua mite aw, numei nausuak ding bangin na tha uh san un. Tu-in kumpi khuapi nusia-in, gam sung khua ah a teeng ding na hi ta uh a, Babylon khuapi a zuan ta ding na hi uh hi. Ahi zongin tua lai panin note hong kihon khia-in, na galte uh khut sung panin Topa in hong khah khia ding hi.

Micah 4:10 Referans Kwoze

Isaiah 48:20

Babilon panin paikhia-in, Khaldea gam panin tai in la, lungdamna tawh hih thu gen in la, tangko-in leimong dongin puak in; “Topa in ama nasem Jakob tankhia khin zo!” ci-in gen in.

Hosea 13:13

Israel mite, naungeek bangin a suah khiat hun tung khin napi-in, a hai luat manin suak khia loin a nu sung mahah omom lai hi.

Hosea 2:14

Tua ahih ciangin gamlakah amah ka paipih kik ding a, itna kam tawh amah hopihin ka zol kik ding hi.

Isaiah 45:13

Thumanna sungah amah khua ka phawksak a, keimah in ama lampi khempeuh ka mamsak ding hi; amah in nasep thaman ahi a, letsong ahi zongin ngaihsun loin keima khuapi lamin sal-a om ka mite khahkhia ding hi,” Vanglianpen Topa in ci hi.

Isaiah 43:14

Israelte’ Siangtho Pa, note hong Honpa, Topa in hih bangin ci hi: “Note’ hangin Babilon ah puakin, Babilon mite galtaite bangin a kisak theihpih a teembawte sungah Khaldea mite’ kikona ka guangsuk ding hi.

2 KUMPI NIHNATE 20:18

Nangma sung pan a suak na tapate pawlkhat kilakhia ding hi; amaute in Babilon kumpipa’ inn sungah innsung maangte hi ding uh hi,” a ci hi.

Mangmuhna 12:14

Hun khat, hun nih leh hun lang sung teng amah vak nadingin ama omna gamlakah, tua gulpi kiang pan a suakta dingin leengin a tai theih nading muvanlai gol kha lang nih tua numei a kipia hi.

Hosea 1:10

Ahi zongin, teh zawh loh, sim zawh loh zah dongin tuipi sehnel bangin Israel mite tampi pha ding uh a, tu hunin, “Note ka mi hi lo,” a kicih hangin ni khat ni ciangin, “A nungta Pasian’ tate,” kici ding hi.

Jeremiah 15:21

Mi gilote’ khut sungpan nang kong suahtak ding-a mi lauhuaite’ khut kol pan nang kong tankhia ding hi,” hong ci hi.

Late 106:10

Tua ahih ciangin amah in, galte khut sung panin amaute hon a, a langpangte’ vangliatna panin amaute khahkhia hi.

2 KHANG TANGTHU NIHNATE 36:20

Amah in namsau panin a suakta mite Babilon ah salin la a, Persia kumpi in a uk hun mateng amah leh a suan leh khakte’ nasem a suak uh hi.

2 KHANG TANGTHU NIHNATE 33:11

Tua ciangin Topa in Assiria kumpipa’ galkap ukte amau kiangah paipih a, amaute in sikkawite tawh Manasseh manin sumngo khau tawh khihin Babilon ah paipih uh hi.

2 KUMPI NIHNATE 25:4

Tua ciangin khuapi kulh sulet uh hi; Khaldea mite khuapi kiimah a ompi mahin, kumpipa’ huan kiang lam kulhpi nih kikal kulh kongpi lampi zui-in kumpipa leh a galhang mi khempeuh zanin tai uh hi. Amaute Arabah lam manawhin pai uh hi.

Jeremiah 29:20

Jerusalem khua pana Babilon khua-a kong puakkhiat, no sal tangte khempeuh aw, Topa kammal ngai dih un:

Jeremiah 48:41

Khuapite kila-in kulhpite zong kila ding hi. Tua ni ciangin Moab galkapte in nupi nausuak dingte bangin a lau ding uh hi.

Jeremiah 52:27

Babilon kumpipa in zong Hamath gam Riblah khua-ah amaute sat-in a thatlum hi. Tu-a bangin Judah mite a gam panun sal dingin a kila khia hi.

Micah 5:3

Tua ahih ciangin, numei naupai nu, a nau a suah khit mateng, amau’ galte khut sungah Topa in amaute pia phot hi. Ama hong khan’ ciangin, sal-a om a gam mite, a mipihte uh tawh hong kigawm kik ding hi.

2 KHANG TANGTHU NIHNATE 36:23

“Persia kumpipa Sairas in hih bangin ci hi, ‘Vantung Pasian, Topa in leitung kumpi gam khempeuh kei hong pia khin a, Judah gam sung Jerusalem khua ah ama adingin inn khat ka lamsak ding hong sawl hi. Note lakah ama mi ahi khempeuh, Topa a Pasian uh in ompih ta hen. Inn lam dingin Jerusalem ah amaute paito sak un,’ ci hi,” a ci hi.

Jeremiah 4:31

Nau suak ding numei kiko bang khat ka za hi, tacil a suak numei khat’ tauna tawh kibang hi. Zion’ tanu husam liang-a a kikona aw hi a, a khut tegel zakin, “Gimna ka thuak ding hi! Kei hong that ding uh hi!” a ci hi.

Jeremiah 13:4

“Na kawng-a na teen’na dialkaih lui la in. Tho in la, Eufrates gunah pai in. Tua lai-ah suang hawm sungah va seel in,” hong ci leuleu hi.

Micah 5:2

Bethlehem Efrathah khua aw, nang in Judah gamah khuaneupen khat na hi a, ahi zongin nang’ sung panin Israel a uk ding khat ka piangsak ding hi. Ama gui in nidang lai, taangtawng pek tawh kizom hi.