Micah 2:13 - Tedim Bible

¹³ Pasian in lampi hong hon’sakin, na maiah hong paikhiatpih ding hi, Salsuahna khuapi kulh kongpi panin paikhia-in na suakta ding uh hi. Kumpi ahi Topa mahmah in hong makaih ding hi.

Tedim Bible Revision 2017

¹³ Pasian in note ading lampi hong honsakin hong paikhiatpih ding hi. Salsuahna khuapi kulh panin pai khia-in na suakta ding uh hi. Kumpi ahi Topa mahmah in note hong makai ding hi.

Micah 2:13 Referans Kwoze

Isaiah 52:12

Note’ mai-ah Topa pai ding a, Israel Pasian pen note’ nungah hong cingpa hi ding ahih manin, note pen galtai-in paikhia loin, kinawhsa-in na paikhia kei ding uh hi.

Mangmuhna 17:14

Amaute in Tuuno tawh a kido uh ciangin Tuuno in amau a zo gawp ding hi. Bang hang hiam na cih uh leh, amah in topate’ Topa, kumpite’ Kumpipa ahi hi. Kiteelkhia, kisamin, thuman mi ahi Topa tawh a omkhawm mite in zong a zo gawp ding uh hi,” ci-in kei kiangah hong gen hi.

Mangmuhna 7:17

Bang hang hiam na cih uh leh, tokhom laizangah a om Tuuno in amaute’ tuucing suak a, amaute nuntakna ciktui omna-ah lam a hilh ding hi. Pasian in zong amaute mittang pan khitui khempeuh a nul siang ding hi,” ci-in hong gen hi.

Hebru 6:20

Tua sungah Zeisu in Melkhizedek’ pawl ahi, a kip tawntung Siampi Ukpa a suah khit ciangin eite taang dingin a masa in a tum hi.

Zekhariah 10:12

Ka mite ka thahatsak ding a, amaute in kei hong bia-in ka thu hong mang ding uh hi, Topa in ci hi.

Hosea 1:11

Judah mite leh Israel mite kigawm kik ding uh a, amaute a makai dingin mi khat seh ding uh hi; amaute khangin ci-thei kik ding uh a, tua Jezre-el hun pen a nuam mahmah hun hi ding hi.

Daniel 2:44

Tua kumpite a maan’ lai takun, vantung Pasian in a bei thei ngei lo ding kumpigam a hong phut ding hi. Tua kumpigam kuamah in zo zo lo ding a, tua gam in gam dang khempeuhte zo gawpin, a kip tawntung ding hi.

Isaiah 55:4

En un, amah pen mite tungah teci ding, mite a makai ding leh a ukpa dingin ka koih hi.

Hosea 13:14

Leinuai-a misite’ omna-ah a pai nading uh panin honin, sihna panin tankhia ding ka hi hiam? Sihna aw, gimna na piakna-ah amaute ka hehpih kei hi. Leinuai-a mi site gam aw, na suksiatna-ah amaute ka khasiat kei hi.

Hosea 3:5

Tua khit ciangin Israel mite in Topa amau’ Pasian leh a kumpipa uh David lamah hong kihei kik ding uh hi. Tua hun ciangin amaute in Topa zahtakin, ama letsongte sang ding uh hi.

Isaiah 51:12

“Kei, keimah in note hong hehnempa ka hi hi; lopa bang ahi, a si thei mi, mihing tate lellelte bang hangin kihta na hi uh hiam?

Micah 2:12

Ahi zongin no Israel mi a om laite khempeuh pel loin kong kaikhawm kik taktak ding hi. Tuubuk sunga tuu khum bangin, gankhawk sunga tuuhon kaihkhop bangin, note kong kaikhawm kik ding a, na gam sung uh, mi tampite’ husa tawh kidim kik ding hi, ci hi.

Micah 3:1

Israel a uk makaite aw, hih thu ngai un. Note in thutang thuman a deih dinga kilawm hi napi-in,

Paikhiatna 14:19

Tua ciangin Israel honpite' mai-ah a pai Pasian’ vantungmi kikhin-in amaute' nungah pai hi; amaute' mai panin meii khuam kikhinin amaute' nung-ah ding a,

Joshua 3:6

Tua ciangin Joshua in siampite kiangah, “Thuciamna singkuang la un la, mite mai-ah paisuak un,” a ci hi. Amaute in thuciamna singkuang la uh a, mite mai-ah pai uh hi.

Hosea 2:2

Tate aw, na nu uh zol bawl un. Amah in ka zi hi buang a, kei in ama pasal hi buang hilo ka hi hiam? A paktatna leh midang tawh a mawhnate a khawl nadingin zol un.

Micah 4:7

Khebaite ka om sak lai ding a, a kipaikhia mite a thahat minamte ka hisak ding hi. Tua hun akipan a tawntungin, Zion Mual panin amaute ka uk paisuak ding hi.