Mattiu 6:2 - Tedim Bible

² “Tua ahih ciangin, note in hehpihna na piak uh ciangin mi simtatte in phatna a ngah nop manun, kikhopna inn sung leh lam lai-a a mai-ah peengkul a tumsak uh bangin na hih kei un. Aman takpi kong cih-inah, amau in a phattuamna uh a ngah zo uh hi.

Tedim Bible Revision 2017

² “Tua ahih manin mi cimawhte tungah huhna na piak uh ciangin, mite in a phat ding uh a deihna tawh a kineihkhem mite in kikhopna inn sung le kongzing lakah a kilang theithei-in a hih uh bangin na hih kei un. Tua bangin a hih mite in thaman a ngah khinta ahihna thu limtakin na phawk un.

Mattiu 6:2 Referans Kwoze

Mattiu 6:5

“Thu na nget uh ciangin mi simtatte bangin na hih kei un. Bang hang hiam na cih uh leh, mi muh nadingin a ut manun kikhopna inn sung leh lamka bomah dingin thu a ngen nuam uh hi. Aman takpi kong cih-inah, amau in a phattuamna uh a ngah zo uh hi.

Mattiu 6:16

“Note in an na tan’ uh ciangin, mi simtatte bangin na mai uh vulsak kei un. Bang hang hiam na cih uh leh, amau in antang ahih uh mite theih ding a ut manun a mai a siasak uh hi. Ke’n aman takpi kong cih-inah, amau in a phattuamna uh a ngah zo uh hi.

Johan 5:41

Mite piak minthan’na ka sang kei hi.

Hebru 13:16

Thupha bawlna, sum hawmnate na mangngilh kei un. Bang hang hiam na cih uh leh, Pasian in hih bang biaknate ah a lungdam hi.

Luka 20:46

“Laitheite na kikeem un. Amaute in puantual silhin a vak nuam uh hi. Sumbukah zahtakna tawh hopih ahi zongin, pawikhamna sungah tutna phabel ahi zongin a deih uh hi.

Johan 7:18

Ama utthu bang a hihpa in ama minthan’na a zong hi. A hong sawlpa minthan’na a zong mi ahih leh, thuman thutak mi hi a, ama sungah diklohna a om kei hi.

1 PETER MASA 4:11

Pasian in na khempeuhah Topa Zeisu hangin phatna a ngah theih nadingin, mi khatpeuh in thu a hilh leh, Pasian’ thupiak bangin hilh ta hen; mi khatpeuh in na a sep leh, Pasian piak tha bangin sem ta hen. Tua Pasian in a tawntungin minthan’na leh vangliatna nei ta hen. Amen.

Late 37:21

Migilo in leitawi a, lohkik zo lo hi, thuman mi ahih leh cingh-a mi pia hi;

Efesa 4:28

Nidang lai-a guta mi in gu nawn loin, sapna neite a hop zawh, a piak zawh nadingin ama khut tawh nasepna a hoih hahkatin sem ta hen.

Galati 2:10

komau in mizawngte ka ngaihsut nadingun amaute’ deihna khat bek a om hi. Tua na zong kei in sep ding hahkatna lungsim ka nei hi.

Sawltak 10:4

Amah in entel a, lau mahmah ahih ciangin, “Topa aw, bang ahi hiam?” a ci hi. Vantungmi in, “Na thungetna leh hehpihna na piak teng Pasian in a ngaihsut nadingin hong kahto zo hi.

Hosea 8:1

Patau kohna peengkul tum in. Muvanlai bangin galte in ka gam tunga len’ vat dingin hong kithawi uh hi. Bang hang hiam cih leh ka mite in ka thuciamna uh pelhin, ka thuhilhnate hong nial uh hi.

ROM (Romans) 12:8

Hansuah mi in mi hansuah na sem ta hen. Hehpihna a pia mi in lungkimin pia ta hen. A uk mi in hahkatin uk ta hen. Midang a hehpih mi in hehpihna lungsim tawh pia ta hen.

Sawltak 24:17

Tu-in kum sawtpi khit ciangin keima pawlte hehpihna leh lungdamna letsong pia dingin kong pai hi.

Sawltak 10:31

Kornelias aw, na thungetna teng ka za zo hi. Na hehpihna na piak teng Pasian in a ngaihsun zo hi.

Sawltak 10:2

Tua mi in a diktat mi hi a, a innkuanpihte tawh Pasian kihta a, mite tungah hehpihna tampi pia a, Pasian kiangah thungen nilohin a om hi.

Sawltak 9:36

Joppa khua-ah Dorkas a cihnopna ahi Tabitha min nei, nungzui a suak numei khat a om hi. Tua numei in a pha gamtatna leh mi hehpihna lungsim a nei hi.

Johan 13:29

Bang hang hiam i cih leh, mi kimkhat in Judas in dangka-ip tawi ahih ciangin, “Pawikhamna-ah i zat ding na khatpeuh peuh lei in,” ci ahih kei leh, “Mizawngte na khatpeuh na pia in,” a ci hi ci-in a ngaihsun uh hi.

Johan 5:44

Khat leh khat kipiak minthan’na na ngah uh a, Pasian khat bek’ piak theih minthan’na a zong lo note in bangci up theih ding na hi uh hiam?

Luka 6:42

Na mit sungah singluang om napi-in na u na nau kiangah, ‘Unau aw, na mittang sungah a om ninneng tang hong paaikhiasak in,’ bang hangin ci na hi hiam? Nang mi simtatpa aw, na mit sungah a om singluang paaikhia masa in. Tua khit ciangin, na u na nau’ mit sunga ninneng tang paihkhiat ding na tel muh thei ding hi.”

Marka 12:39

Sumbuk ah zahtakna tawh hopihna, kikhopna inn sungah tokhom phabel, pawikhamna sungah tutna phabel a deih uh hi.

Paunak 20:6

Mi khempeuh in mi citakin kigen kim uh hi; ahi zongin a citak takpi ding mi kimu zo ding ahi hiam?

Paunak 19:17

Mizawngte tungah a piate in Topa’ tungah a pia hi a, Topa in a cingin amaute tungah lohkik ding hi.

Late 112:9

Amah in hawmkhia zuahzuah a, mizawngte tungah pia khin hi; ama migitna kip tawntung a, amah vanglianin, kipahtawi ding hi.

Filemon 1:7

Sanggam aw, nangma hangin misiangthote in lungsim thaksuahna a ngah uh ahih ciangin nangma itna ngaihsunin lungdam mahmahin ka nuam zo hi.

1 THESALONIKA MASA 2:6

Tua tham loin, Khazih’ sawltak ka hi uh ahih ciangin vangik a suan thei mi ka hi uh napi-in, mite’ piak minthan’na note kiangah ahi zongin, midangte kiangah ahi zongin zong loin, note lakah dam damin ka sem uh hi.

Sawltak 11:29

Nungzuite in a hih theih zah ciat bangun Judah gamah a om u leh naute kiangah huhna sum khak dingin a vaihawm uh hi.

Luka 13:15

Ahih hangin Topa in, “Mi simtatte aw, no na vekpi-un Nipi ni-in na bawng ahi zongin, na la ahi zongin, buk sung pan khahkhia-in tui ne dingin paipih hilo na hi uh hiam?

Luka 12:56

Mi simtatte aw, note in van leh lei maitang na khen thei uh hi. Tu lai tak hun bang hangin khen thei lo na hi uh hiam?”

Luka 12:33

Na neihsa teng zuak un la, hehpihna na pia un. A lui thei lo dangka-ip na bawl un. Gutate’n naih zo lo a, nget in a suksiat theih lohna vantungah a bei thei lo sum na khol un.

Luka 11:43

Farisaite aw, note in gimna na thuak ding uh hi. Bang hang hiam na cih uh leh, kikhopna inn sungah tokhom sang bel ahi zongin, sumbuk ah zahtakna tawh hopihna ahi zongin na deih uh hi.

Luka 11:41

Ahih hangin kuang sunglam a om nate mizawngte na pia un. Tua bang na hih uh leh, na khempeuh note mai-ah a siangtho ding hi.”

Luka 6:24

Sumhau note in gimna na thuak ding uh hi. Bang hang hiam na cih uh leh, nopna na ngah zo uh hi.

Marka 7:6

Zeisu in, “Isaiah in mi simtat note tungah a kituakin a genkhol zo hi. Tua Lai Siangtho in: ‘Hih mipawlte in amau kam uh tawh kei hong zahtak uh hangin, A lungsim uh kei tawh kigam la hi.

Mattiu 24:51

tua nasempa vua-in misimtatte tawh a omkhawmsak ding hi. Kahna leh ha gawina a om ding hi.”

Mattiu 23:6

Pawikhamna sungah tutna phabel leh kikhopna inn sungah tokhom a sangbel a deih uh a,

Mattiu 22:18

Zeisu in amaute gitlohna a theih ciangin, “Mi simtatte aw, bang hangin kei hong ze-et na hi uh hiam?

Mattiu 16:3

Zingsang ciangin, ‘Khua nim a, van vom ahih ciangin, tu ni-in huih nung a, guah hong zu ding hi,’ na ci thei uh hi. Note in van maitang na khen theih uh hangin, leitung hunte a lim na khen thei kei uh hi.

Mattiu 15:7

Isaiah in mi simtat note tungah a kituakin a gen khol hi. Isaiah a genna in:

Isaiah 58:7

Na an uh a gilkialte tawh ne khawmin, inn nei lo mi zawngte a buk nading vaihawm sakin; tangguak-a om mi na muh uh ciangin puansilhsak a, na mi pihte uh kiang panin bu lo ding hilo na hi uh hiam?

Isaiah 9:17

Tua ahih ciangin amau’ tangvalte tungah Topa lungdam lo a, pa nei lote leh a meigong numeite uh tungah hehpihna nei lo hi; bang hang hiam cih leh mi khempeuh in Pasian’ thu khual loin siatna a bawl vive hi a, kam khempeuh in haina thu gen uh hi. Hih thute khempeuh hangin ama hehna dam zo nai lo a, ama khut kilamto lai hi.

Thuhilh-sia 11:2

Na neihsate, mun sagih ahi a, mun giat-ah ahi zongin khen kawikawi in. Hih leitungah bang thusia hong piang ding cih na thei khol kei hi.

1 SAMUEL MASA 15:30

Tua ciangin amah in, “Ka khial khin hi; ahi zongin tu-in keima mi upate mai leh Israelte mai-ah kei hong pahtawi in la, Topa na Pasian ka biak theih nadingin kei tawh hong kileh kik in,” a ci hi.

Mattiu 7:5

Nang mi simtatpa aw, na mit sungah a om singluang paaikhia masa in. Tua khit ciangin, na u na nau’ mit sunga a om ninneng tang paihkhiat ding na tel muh thei ding hi.”

Mattiu 5:18

Aman takpi kong cih-inah, van leh lei a mangthang zongin thu khempeuh a kicin’ matengin Pasian’ Thukham a neupen nangawn kisia ngei lo ding hi.

Isaiah 10:6

Pasian thu a ngaihsun lo minam leh keimah hong hehsak mite’ neihsa sutin lak sakin, amaute pen konglak buannawng bangin a tuancil dingin amaute sawlin thu ka pia hi.

Mattiu 6:3

Note in hehpihna na piak uh ciangin a kithei lo dingin na taklam khut’ hihna na veilam khut theisak kei un.

Mattiu 23:5

Amaute gamtatna khempeuh, mi mai-ah a kilat nadingin ahih uh hi. Amaute in a taubuh leh baanbuh liansak uh a, a puan mong teepkai a sausak uh hi.

1 KORIN MASA 13:3

Mizawngte vaak dingin ka sum khempeuh ka hawmsak tham loin, ka pumpi meikhul dingin ka piak hangin itna ka neih kei leh, ka phattuamna om lo hi.