Mattiu 6:13 - Tedim Bible

¹³ Kheemna hong thuaksak kei in. Gilopa kiang pan hong honkhia in,” ci-in tua bangin thu na ngen un,

Tedim Bible Revision 2017

¹³ Ze-etna lian hong thuaksak keʼn. Giloʼ kiang pan hong hon khia in,’ (Uk zawhna, vangliatna, minthanna, na nei tawntung hi. Amen.) ci-in na ngen ding uh hi.

Mattiu 6:13 Referans Kwoze

1 KORIN MASA 10:13

Mi in a thuak theih loh ze-etna khat beek na thuak kei uh hi. Pasian in thumanna lungsim tawh kidim ahih ciangin na thuak zawh loh uh ze-etna hong tun’ nadingin thu a pia kei ding hi. Note in na thuak ding uh ze-etna a hong tun’sak ciangin na thuak zawh nadingun suahtak nading lampi zong hong bawlsak ding hi.

Johan 17:15

Amaute leitung pan na lakhia in ci-in thu kong ngen kei hi. Gilopa tawh a kipelh nadingun amaute na kep nadingin thu kong ngen hi.

Mattiu 26:41

Kheemna tawh na kipelh theih nadingun thu ngen un la, ngak un. Lungsim a ut hangin pumpi a thazawng hi,” ci-in Piter kiangah a gen hi.

Mangmuhna 19:1

Tua thute khit ciangin vantungah a om mihonpite’ aw tawh kibang aw ka zak in, “Hallelujah! gupna thu-a kipan vangliatna leh minthan’na in i Pasian tawh kipawl hi.

2 THESALONIKA NIHNA 3:3

Ahih hangin Topa in midik hi a, note hong kipsakin thu hoih lote tawh hong kipelhsak ding hi.

Mattiu 6:10

Na Gam hong piang ta hen. Vantungah na deihna a kicin’mah bangin, leitungah kicing ta hen.

Jeremiah 15:21

Mi gilote’ khut sungpan nang kong suahtak ding-a mi lauhuaite’ khut kol pan nang kong tankhia ding hi,” hong ci hi.

2 PETER NIHNA 2:9

Tua ahih ciangin Topa in Pasian a biate ze-etna sung pan gumkhia ding ahi zongin,

Late 47:7

Bang hang hiam cih leh Pasian in leitung khempeuhte’ Kumpi ahi hi; lasakna tawh amah phat un!

1 KHANG TANGTHU MASATE 29:11

Topa aw, liatna, leh vangliatna, leh minthan’na, leh gualzawhna, leh min liatna in nangma’ aa ahi hi; bang hang hiam cih leh vantung leh leitungah a om khempeuh in nangma’ aa ahi hi; Topa aw, kumpigam in nangma’ aa hi a, tuate khempeuh tungah nang a lutangin hong kisangsak hi.

Mangmuhna 21:4

Amaute mittang uh pan khitui khempeuh a nul siang ding hi. Sihna zong a nung ciangin a om nawn kei ding hi. Tua tham loin, thuumna, kahna, natna zong a om kei ding hi. A masa nate mangthang khin zo uh hi,” ci-in nakpi-in aw tawh kiko ka za hi.

Late 10:16

Topa in a tawntungin Kumpi hi a, ama leitang panin minamte beimang ding hi.

Mangmuhna 3:10

Nangmah in kei thuakzawhna tawh kipawl thute na zui zo ahih ciangin, leitungah a om mite thu dong dingin leitung khempeuhah a tung ding ze-etna hun panin nang kong liah ding hi.

1 JOHAN MASA 3:8

Mawhna a bawl mi in Dawimangpa tawh a kipawl hi. Bang hang hiam na cih uh leh, a cil panin Dawimangpa in mawhna a bawl zo hi. Dawimangpa’ bawl nate a siasak dingin Pasian’ Tapa hong kilang zo hi.

1 PETER MASA 5:8

Kipin kikeem un. Kikepna tawh na ngak un. Bang hang hiam na cih uh leh, na gal uh ahi Dawimangpa in a hawk thei humpinelkai bangin kua mi ka ne ding hiam ci-in zong kawikawi-in a om hi.

Late 41:13

Israel Pasian, Topa in khang tawntungin thupha ngah ta hen! Amen, Amen.

1 KHANG TANGTHU MASATE 16:36

Israel Pasian, Topa in thupha ngah ta hen, a tawntung pan a tawntung dongin!” zong ci lai un, a ci hi. Tua ciangin mi khempeuh in, “Amen!” ci-in Topa phat uh hi.

1 KHANG TANGTHU MASATE 4:10

Jabez in Israel Pasian tungah thu ngen a, “Kei thupha hong pia-in ka gamgi hong keeksak in. Kei hong ompih in la, kei hong gimsak loh nadingin siatna panin hong kem in!” a ci hi. Tua ciangin Pasian in ama ngetna pia hi.

Thu-hilhkikna 8:16

a tawpna ah a hoih-in na gamtat theih nading uh deihna-in note hong niamkhiatin hong ze-et theih nadingin na pu na pate un a theih loh manna tawh gamlakah hong vaak ahi Topa na Pasian uh na mangngilh kha ding uh hi.

Paikhiatna 15:18

Topa in uk tawntung ding hi,” a ci uh hi.

Piancilna 22:1

Hih thute khit ciangin Pasian in Abraham ze-et a, ama kiangah, “Abraham!” ci hi. Amah in, “Hiah om ing,” ci hi.

Galati 1:4

Tua Zeisu in Pasian’ deihna tawh kituakin a gilo ahi hih leitung pan eite hong gumkhia dingin ah eite khialhna ading ama pumpi kipia hi.

2 KORIN NIHNA 1:20

Thuciamnate in bang zahin a tam hangin Pasian’ minthan’na kilatsak nadingin, “Ahi hi,” cih ding ahi zongin, kote hangin, “Amen,” cih ding ahi zongin ahi hi.

Late 47:2

Bang hang hiam cih leh Topa, a Sang Penpa, dipkuat-huai-a, leitung khempeuhah kumpi lian khat ahi hi.

Gamlak-vakna 5:22

hih tuisia in na gil sung zui hen la, na pumpi pawm sakin na pheipi teem sak hen,’ ci ding hi. Tua ciangin numei in, ‘Amen, Amen,’ ci ding hi.

Mangmuhna 2:10

Nang in na thuak ding lai takte kihta kei in. Ze-etna na thuak nadingun note kimkhat Dawimangpa in thong sungah hong khia-in, note in nisawm sung gimna na thuak ding uh hi. Nangmah in sihna na thuak dongin thumanin om in. Tua hi leh, nuntakna kumpilukhu nang kong pia ding hi.

Mangmuhna 1:18

Nidang lai-in ka sih ngei hangin tu-in en in, a tawntungin ka nungta a,! sihna leh sihna gam konghon’na ka nei hi.

Mattiu 5:37

A hite ‘A hi mah hi’, a hi lote, ‘A hi lo mah hi,’ na ci un. Tua sang a kan zawk leh, a gilo mi’ sung pan a piang hi.”

Daniel 4:25

Mite sung panin hong kihawlkhia ding a, gamsate tawh na teeng khawm ding hi. Bawngtal bangin lopa na ne ding a, pua lamah lumin, kumsagih sung na tungah daitui a hong kia ding hi. Tua ciangin Sangpen Pasian in mihingte’ kumpigam uk a, a teel mi peuhpeuh kumpi a suaksak thei hi na ci ding hi.

Paunak 30:8

Zuauna leh khemna ka zat loh nadingin hong huh in la, a hau lua lo, a zawng lua loin hong bawl in la, ka khamkhop zah lian bek an hong pia in.

Thu-hilhkikna 8:2

A thupiakte na zui uh hiam na zui kei uh hiam cih a theih nadingin note hong niamkhiatin na lungsim uhah bang om hiam cih a theih nadingin Topa na Pasian un gamlakah hih kum sawmli sung note hong paipihna lampi khempeuh na ciamteh ding uh hi.

1 KORIN MASA 14:16

Ahih kei leh, kha tawh hehpihna na phat ciangin a siam lo mi in na kam thei lo ahih ciangin hehpihna phatna-ah zui-in, “Amen” bang ci-a ci thei ding hiam?

Mattiu 28:20

Keimah in note kong piak thukham khempeuh a tan’ dingun na hilh ta un. Keimah in leitung a bei dongin note tawh ka omkhawm tawntung ding hi,” ci-in a vaikhak hi.

Daniel 7:18

Ahih hangin Sangpen Pasian’ mite in kumpi za a ngah ding uh a, a tawntungin a nei tawntung ding uh hi,” a ci hi.

Late 106:48

Topa, Israel Pasian in, a tawntung a kipan a tawntung dongin thupha ngah ta hen! Mi khempeuh in, “Amen” ci ta uh hen! Topa phat un!

Late 89:52

Topa in thupha ngah tawntung ta hen; Amen, Amen.

Late 72:19

A minthang ama min in thupha ngah tawntung hen la, ama minthan’na in leitung khempeuh dim ta hen! Amen, Amen.

1 KUMPI MASATE 1:36

Tua ciangin Jehoiada’ tapa Benaiah in dawngin, “Hi ta hen! Topa, ka to kumpipa’ Pasian in tua bangin kipsak ta hen.

Mangmuhna 19:4

Upa sawm nih leh lite tawh ganhing lite in, tokhom tungah tu-a a om Pasian mai-ah bokin bia-in, “Amen, Hallelujah!” a ci uh hi.

Mangmuhna 5:13

Vantung, leitung, leinuai leh tui tungah a om a bawlsa ganhing khempeuhte akipan, tua vantung, leitung, lei nuai leh tui tungah a om na khempeuh in zong: “Tokhom tungah a tu mi leh Tuuno tungah, phatna, pahtawina, minthan’na leh vangliatnate a tawntung pan a tawntung dongin om ta hen,” ci-in a phat uh hi.

Mangmuhna 3:14

“Laodikia khua-ah a om pawlpi’ vantungmi kiangah hih bangin gelh in. ‘Amen ahi mi, a dik a man teci a pang, Pasian’ piancilna kipatna bulpi ahi pa’ thupiakna in:

Hebru 11:36

Kim khatte in kosiatna, satgawpna tham loin, leh-henna, thongkiatnate tawh ze-etna a thuak uh hi.

1 TIMOTI MASA 1:17

A om tawntung Kumpipa ahi, a si thei lo, mit in a muh theih loh, khat bek a om Pasian in a tawntungin pahtawina leh minthan’na ngah ta hen. Amen.

Jeremiah 28:6

“Amen! Topa in tua bangin sem ta hen. Topa in na thu bangin sem ta hen. Topa in na thu genkholhna bangin hong tangtung sak hen la, Babilon khua panin Topa’ biakinnpi sunga beelte leh sal-a kimante khempeuh hih munah hong la kik tapeuh hen.

Late 22:28

Bang hang hiam cih leh ukna in Topa aa hi a, minamte tungah amah in uk hi.