Mattiu 5:15 - Tedim Bible

¹⁵ Mite in meivak a vak khit uh ciangin seeng a khuh kei uh hi. Inn sungah mi khempeuh in meivak a muh nadingun, a kho sangah a vaak uh hi.

Tedim Bible Revision 2017

¹⁵ Mei a vak khit ciangin kuamah in lawh khuh lo hi. Meivakna mun sangah koih zaw a, inn sung khempeuh a taangsak hi.

Mattiu 5:15 Referans Kwoze

Marka 4:21

Zeisu in, “Meivak kho sangah vak loin, seeng khuh ding ahi zongin, lupna nuai-ah koih ding ahi zongin hong kitawi ahi hiam?

Luka 11:33

“Kuamah in mei a vak khit uh ciangin buliahna-ah a koih kei a; seeng zong a khuh kei hi. A lut mite in meivak a muh nadingun kho sangah a vak hi.

Luka 8:16

“Meivak a vak khit ciangin beel a khuh ahi zongin, lupna nuai-ah a koih ahi zongin kuamah a om kei hi. A lut mite in meivak taang a muh nadingun kho sangah a vak uh hi.

Gamlak-vakna 8:2

“Aaron tungah hih bangin gen in. Meivakte na koih ciangin, meivak sagihte in meivakkhuam mai teng a taan dingin koih-in, ci-in gen in,” a ci hi.

Paikhiatna 25:37

Nangmah in ama' adingin meivak sagihte na bawl ding hi; ama' omna mai teng khua a vaksak dingin meivakte kikoih ding hi.

Zekhariah 4:2

Amah in, “Bang na mu hiam?” ci-in hong dong hi. Kei zong, “Kham tawh a kibawl meivakkhuam khat ka mu hi. Tua meivakkhuam in meivak sagih nei a, meivak tui koih nading hai khat zong a khuam dawnah om hi. Tua meivak sagihte in meivakkhau nei ciat uh hi.

Luka 11:36

Tua ahih ciangin, mun khat beek mial loin, na pumpi a vak leh, meivak’ vang tang in nang khuavak a hong pia bangin, na pumpi in khuavak tawh a kidim ding hi,” a ci hi.

Filippi 2:15

Tua bangin na hih uh leh, mawhsak nading om loin, kuama tungah khialhna om loin, lungkawi-a kisia mi pawlte lakah mawhna neu kha beek a nei lo Pasian’ tate na suak ding uh hi. Nuntakna tawh kipawl thu hilhin, vantunga aksite bangin tua mi pawlte lakah na taang ding uh hi.

Hebru 9:2

Bang hang hiam na cih uh leh, puanbuk khat a kibawl hi. A masa dei sungah meivakna, sabuai leh Pasian mai-ah a kikoih khomunte a om uh hi. Hih mun in Siangtho Mun a kici hi.

Mangmuhna 2:5

Tua ahih ciangin nang in bangci omna pan na kiam zawh thu na phawk kik khit ciangin na kisikkik in la, a cil-a na gamtat ngei na gamta kik in. Tua bang na hih kei leh, na kiangah ka hong pai ding a, na kisikkik kei leh, na meivakna a omna pan ka khin ding hi.