Marka 8:38 - Tedim Bible

³⁸ Mi paktat leh gilo hih khang mite lakah, kei ahi zongin, ka thu ahi zongin a daisak peuhmah Mihing Tapa in zong a Pa minthan’na leh a siangtho vantungmite tawh hong paikhawm uh ciangin, tua mite a daisak ding hi.”

Tedim Bible Revision 2017

³⁸ Pasian thei loin a gilo hih mite lakah keima hang le ka thuhilhte hangin maizumin kei hong pulak ngam lo mi peuhmah, a Paʼ minthanna vang le a siangtho vantung mite tawh a minthangin hong paikik ciangin Mihing Tapa zong ama hangin maizumin pulak ngam lo ding hi,” a ci hi.

Marka 8:38 Referans Kwoze

ROM (Romans) 1:16

Khazih’ Lungdamna Thu hangin ka maizum kei hi. Bang hang hiam na cih uh leh, tua thu in a masa-in Judah mite, a nung ciangin Grik mite akipan a um mi khempeuh in gupna a ngah nading Pasian’ vangliatna ahi hi.

1 JOHAN MASA 2:23

Ta a nial mi in Pa a nei kei hi. Ta a mang mi in Pa zong a nei hi.

Jeim 4:4

Apangtatte aw, leitung tawh kipawlna in Pasian tawh kilem lohna ahih lam thei lo na hi uh hiam? Tua ahih leh, leitung tawh a kipawl mi peuhmah in Pasian’ gal a suak hi.

Luka 9:26

Keimah hang ahi zongin, ka thu hang ahi zongin a maizum peuhmah, Mihing Tapa in ama phatna, Pa phatna leh a siangtho vantungmite’ phatna tawh hong pai ciangin, tua mi a maizumsak ding hi.

2 TIMOTI NIHNA 1:8

Tua ahih ciangin Topa teci pan’na ahi zongin, tua Topa’ thongkiapa ahi keimah ah ahi zongin zum kei in. Pasian hong piak a vangliatna bangin Lungdamna Thu tawh kizomin gimna na thuak in.

Mattiu 26:64

Zeisu in, “Nang gen bangin ka hi hi. Tua tham loin, ke’n kong cih-inah, tunung ciangin Mihing Tapa in Vanglian Pa’ ziat lamah tu a, meii tungah hong tuangsuk note in na mu ding uh hi,” a ci hi.

Mattiu 16:27

Mihing Tapa in, a Pa vangliatna nei-in, vantungmite tawh hong paikhawm ding hi. Tua ciangin mi khempeuh a gamtatna ciat uh bangin a thuksak ding hi.

Hebru 11:16

Ahih hangin amaute in vantung gam ahi, tua sangin a phazaw gam a deih uh hi. Tua ahih ciangin Pasian in amau Pasian a kicihna maizum loin, amau om nading khuapi a bawlkhol hi.

2 TIMOTI NIHNA 1:12

Tua thu hangah hih gimnate zong ka thuak hi. Ahih hangin ka zum kei hi. Bang hang hiam cih leh, ka uppa ka thei a, ama kiangah ka piak nate zong tua Ni dongin a kem zo ding hi ci-in ka um hi.

Mattiu 12:39

Zeisu in, “Mipaktat leh mi gilo khang mite in lim a nget uh hangin, Jonah lim longal lim dang amau tungah a kilak kei ding hi.

Johan 1:51

Ke’n aman takpi kong cih-inah, van kihongin Pasian’ vantungmite in Mihing Tapa tungah kahsuk kahto a, om na mu ding hi,” a ci hi.

Mattiu 25:31

“Mihing Tapa in a minthan’na tawh, vantungmite tawh hong paikhop ciangin, minthan’na tokhom tungah hong tu ding hi.

Mattiu 24:30

Tua lai takin van panin Mihing Tapa’ lim a kilang ding hi. Leitung minam khempeuh a kap ding uh a; vangliatna leh minthan’na tawh, Mihing Tapa in meii tungah tuanga hong kumsuk a mu ding uh hi.

Luka 19:26

‘Ke’n kong cih-inah, a neite khempeuh a kipiak beh ding hi. A nei lote kiang pan a neihsa nangawn a kilakhia ding hi.

Mattiu 13:41

Mihing Tapa in ama vantungmite sawl ding a, a khialte leh a puksakte khempeuh a Gam sung pan nilkhia-in,

Daniel 7:13

Zan ka mangmuh hun sungin ka khuadak leh mihing tapa tawh a kibang mi khat meii tunga hong pai ka mu hi. A nungta tawnung mipa’ kiangah pai-in, ama kiangah a kipia hi.

Daniel 7:10

tua sung panin meikuang gunpi a hong luangkhia hi. Ama nasem ding mihing tulza om a, a mai-ah mihing tul zasawm a ding uh hi. Thukhen nading hun kipana laibute a kiphen hi.

Thu-hilhkikna 33:2

Amah in, “Sinai panin Topa hong pai a, Seir panin eite ading hong suakkhia hi; Paran Mual panin hong taangkhia a, a taklam khutah meikuang tawi-in, misiangtho tul sawmte kiang panin hong pai hi.

Hebru 13:13

Tua ahih ciangin eite in Topa tawh kosiatna thuakin giahbuk pualam ama kiangah nai ni.

2 TIMOTI NIHNA 1:16

Topa in Onesiforas’ innkuanpihte tungah hehpihna tungsak ta hen. Bang hang hiam cih leh, amah in kei tam veipi hong thakhauh sak hi. Keima sikkhau hangin zong zum loin,

Galati 6:14

Kei ka hih leh, eite Topa Zeisu Khazih’ singlamteh sim loh, bangmah dangah ka kisathei het kei ding hi. Tua singlamteh ah hih leitung in kei ading kikhenin a om hi. Keimah in zong leitung ading kikhenin ka om hi.

Sawltak 5:41

Tua ciangin sawltakte in Zeisu’ min hanga zumhuaina thuak dinga kilawm a kisak manun ah lungdamin, upa vaihawmna pan a paikhia uh hi.

Johan 12:34

Tua hi a, mihonpite in, “Khazih a om tawntung ding hi,’ ci-in Thukhamna sungah ka za zo uh hi. Tua bang ahih leh, ‘Mihing Tapa in kikhaina a thuak ding hi,’ bang hangin ci na hi hiam? Hih Mihing Tapa kua mi ahi hiam?” ci-in a dong uh hi.

Johan 5:27

Tapa in Mihing Tapa ahih maninah thukhen dingin Pa in thu a pia hi.

Johan 1:14

Thu in mi bangin hong suak a, hehpihna leh thuman thutak tawh kidimin eite lakah a om hi. Pa in a Ta khat bek a piaksa minthan’na bangin ama minthan’na ka mu uh hi.

Marka 14:62

Zeisu in, “Ka hi hi. Mihing Tapa in vangliatna ziatlam ah tu a, meii tungah hong kumsuk note in na mu ding uh hi,” a ci hi.

Mattiu 16:4

Gilo a pangtat khang mite in lim a nget uh hangin, Pasian’ kamsangpa Jonah lim longal lim dang a kilak kei ding hi,” a cih khit ciangin tua mite’ omna pan a paikhia hi.

Zekhariah 14:5

Hinnom kuam sung kivukcip ding a, Judah kumpi Uzziah’ hun lai-a zin lin-a kivukcip mah bang ding hi. Tua ciangin Topa ka Pasian hong pai ding a, a mi siangthote khempeuh hong tonpih ding hi.

Mattiu 8:20

Zeisu in, “Ngiate in kua nei uh hi. Vasate in zong bu a nei uh hi. Ahih hangin Mihing Tapa in ahih leh, a lutang ngak nading mun a nei kei hi,” a ci hi.

Mattiu 16:28

Ke’n aman takpi kong cih-inah, Mihing Tapa, ama Gam sungah hong pai kik, hih san takah a ding mi kimkhat in a muh matengun a si kei ding uh hi,” ci-in a nungzuite kiangah a gen hi.

Marka 8:37

Mi khatpeuh in ama nuntakna bang sum tawh lei kik thei ding ahi hiam?

Marka 13:26

Tua lai takin, vangliatna leh minthan’na tawh Mihing Tapa meii tungah hong kumsuk a mu ding uh hi.

Sawltak 10:22

amaute in, “Pasian a kihta, Judah mi khempeuh in a zahtak, midik, galkap mangpa Kornelias in nangmah hong sam a, nangmah kiang pan thu a zak nading, vantungmi siangtho khat in thu a pia hi,” a ci uh hi.

1 THESALONIKA MASA 2:19

I Topa Zeisu hong kum ciangin a mai-ah kote lametna, lungdamna leh kisaktheihna lukhu in bang ahi hiam? Note hilo na hi uh hiam?

1 JOHAN MASA 2:28

Ka ta neute aw, Tapa hong pai a, hong kilat ciangin eite in maizumna om loin, lungmuan’na tawh ama kiangah i om theih nadingin ama sungah kipin om un.

Mangmuhna 14:10

Pasian’ hehna hai-ah a kihel khawm lo-a kikoih hehna leenggahzu tua mi in a dawn ding hi. Tua tham loin a siangtho vantungmite mai leh Tuuno’ mai-ah tua mi in mei leh kat tawh bawlsiatna a thuak ding hi.