Marka 5:13 - Tedim Bible

¹³ Zeisu in thu a piak ciangin kihhuai dawite paikhia uh a, vokte sungah a lut uh leh, vok honpite kensang tung pan taisukin tuili sungah a si khin uh hi. Vokte kisim leh, tulnih bang pha ding hi.

Tedim Bible Revision 2017

¹³ Tua ahih manin Jesu in dawite a pai nading uh thu pia a, dawite zong mipa sung panin pai khia-in vokte sungah a lut uh hi. Tua vok honpite a vekpi-in tul nih bang pha hi. Mual tung panin tai suk henhan uh a, tuili sung kidenna-in tui kia mang khin uh hi.

Marka 5:13 Referans Kwoze

JOB (Job) 2:6

Tua ciangin Topa in Satan kiangah, “En in, na khut sungah amah kong ap hi; ahi zongin amah sisak kei in,” a ci hi.

Mangmuhna 20:7

Kum tul a cin’ khit ciangin Satan in a kikhumna pan kikhahin,

Mangmuhna 9:11

Amau tunga kumpipa in Hebru kam-in Abaddon kici, ahi zongin, Grik kam in Apollion kici ahi zongin kiphuak a, kuam thukpi’ sawltak ahi hi.

1 PETER MASA 3:22

Tua Topa vantungah kahto a, Pasian’ ziat lamah a tu hi. Vantungmite akipan, a ukte leh vangliatnate in ama nuai-ah kikoihin a om hi.

Johan 8:44

Note in na pa uh dawimangpa’ suan na hi uh hi. A gilo na pa uh deihna bangin na gamta nuam uh hi. Amah in a cil panin mi thatpa hi a, thumanna nei lo ahih ciangin thuman thutak sungah a kip kei ding hi. Amah in thuzuau a gen ciangin ama thu a gen hi. Bang hang hiam na cih uh leh, amah in zuauthu gen leh thuzuaupa lah ahi hi.

Mattiu 8:32

“Pai ta un,” a cih ciangin dawite a paikhia uh a, vokte sungah a lut uh leh, vok hon in keen sang tung pan nakpi-in taisuk uh a, tui sungah a si khin uh hi.

JOB (Job) 1:12

Tua ciangin Topa in Satan kiangah, “En in, ama neihsa khempeuh na khut sungah kong ap hi; ahi zongin ama pumpi ahih leh na sukha kei ding hi,” a ci hi. Tua ciangin Topa’ omna panin Satan paikhia hi.

1 KUMPI MASATE 22:22

Topa in ama kiangah, ‘Bang lam tawh zol ding na hi hiam?’ a ci hi. Amah in, ‘Keimah paikhia-in, ama kamsangte khempeuh’ kam sungah zuau thei kha ka va hi ding hi,’ a ci hi. Tua ciangin amah in, ‘Nangmah in amah a va zol ding na hi a, nangmah in na zo ding hi; paikhia in la, tua bangin hih in,’ a ci hi.

Mattiu 7:6

“Na a siangthote uite na pia kei un. Vok mai-ah suangmanphate na paai kei un. Tuate in a khe uh tawh a sikgawp khit uh ciangin, kihei-in hong pet kha ding uh hi.”

Marka 5:12

Dawite in, “Kote tua vokte sungah ka lut nadingun vok hon lakah hong paisak in,” ci-in a ngen uh hi.

Marka 5:14

Vokcingte tai uh a, khua sung leh gam sungah hih thu a gen uh ciangin, mite in bang thu a piang hiam ci-in en dingin a kuankhia uh hi.