Malakhi 2:7 - Tedim Bible

⁷ Siampite’ nasep in Pasian a man-a theih nading a hilh ding uh ahi hi. Amaute pen Vanglianpen Topa’ kamtaite ahih manin, mite in keima deihna a theih nadingun amaute tungah thu a dot ding uh ahi hi.

Tedim Bible Revision 2017

⁷ Siampiteʼ nasep pen Pasian a manin theih nading a hilh ding uh ahi hi. Amaute pen, Vanglian Topaʼ kamtaite ahih manun, mite in keima deihna a theih nadingun amauteʼ tungah thu a dot ding uh ahi hi.

Malakhi 2:7 Referans Kwoze

Siampi Laibu 10:11

Topa in Moses’ tung tawnin amaute tunga a gensa thukhamte khempeuh note in Israel mite a hilh ding na hi uh hi,” a ci hi.

Thu-hilhkikna 21:5

Topa na Pasian un Levi mi siampite ama’ na a sem ding leh Topa’ min tawh thupha a pia dingin teel khin ahih manin amaute hong pai ding uh a, ki-thuneihna leh kitotna peuhmah amau’ thu tawh kiveng sak ding hi.

2 KORIN NIHNA 5:20

Tua ahih ciangin kote in Khazih tang ding sawltak ka hi uh hi. Note in Pasian tawh na kilem un ci-in Pasian in kote tungah hong hansuah mah bangin kote in zong Khazih tang ding kong thuum uh hi.

1 THESALONIKA MASA 4:8

Tua ahih ciangin hih thu a nial mi in mi bek nial ahi kei hi, note Kha Siangtho a hong pia Pasian nial ahi hi.

Sawltak 16:17

Tua nungak in Paul leh komau hong zui a, “Hih mite in gupna Lampi eite hong hilh, Sang Pen Pasian’ nasemte ahi uh hi,” ci-in a kiko hi.

Ezra 7:10

Bang hang hiam cih leh Ezra in Topa’ thukham a sin ding, a zui ding, leh Israel mite a hilh dingin amah kipia hi.

2 KHANG TANGTHU NIHNATE 30:22

Tua ciangin Hezekiah in Topa’ nasepna ah a siamna hoih uh a lak Levi mite khempeuh tungah hanthotna thugen hi. Tua ahih ciangin mite in pawi an ni sagih sung ne uh a, thu-nuama biakna pia-in a pu a pate uh Pasian, Topa tungah lungdamna ko uh hi.

Johan 20:21

Zeisu in khatvei, “Nopna na ngah ta un, Pa in kei hong sawl bangin note kong sawl hi,” a ci kik hi.

Johan 13:20

Ke’n aman takpi kong cih-inah, ka sawlpa a ngai mi in kei zong hong ngai hi. Kei hong ngai mi in kei hong sawlpa zong a ngai hi,” a ci hi.

Malakhi 3:1

Hih banga na thu genna uh tawh kisai-in Vanglianpen Topa in hong dawng a, “Ka pai nading lampi a bawl khol dingin ka kamtaipa ka sawl ding hi. Tua ciangin na ngakngak uh Topa a biakinn sungah thakhat thu-in hong pai ding hi. Na muh nop uh kamtaipa hong pai-in ka thuciamna hong taangko ding hi,” a ci hi.

Haggai 1:13

Tua ciangin Topa’ kamtai Haggai in mite tungah Topa’ thugente gensawn a, “Topa in note kong ompih hi, ci hi,” ci-in gen hi.

Jeremiah 18:18

Tua ciangin amaute in, “Hong pai un, Jeremiah sawm ni. Bang hang hiam cih leh eite hong hilh dingin siampite ahi zongin, i dot dingin mipilte ahi zongin, Pasian’ thu hong gen dingin kamsangte ahi zongin i nei hi. Hong pai un, amah mawhsakin ama’ thu peuhmah mal khat zong i mang kei ding hi,” a ci uh hi.

Jeremiah 15:19

Tua ahih manin Topa in, “Nong kilehkik leh kong koihna ngei ah kong koih ding a, ka na na semkik ding hi. Thu manpha lo gen loin thu manpha na gen leh, ka kamsang-in kong zang ding hi. Amaute nang kiangah hong pai ding uh a, nang na hih leh amau’ kiangah na pai kei ding hi.

Isaiah 44:26

a nasempa’ thu kip sakin, a kamtaite’ thugente a tangtungsak; ‘Jerusalem khua-ah mi teengin, Judah khuapite kilamkik ding a,, a kisia khuate ka lamkik ding hi’;

Thu-hilhkikna 24:8

“Phak natna hong tun’ ciangin Levi siampite in hong gen bangin na gamtat ding uh ngaihsun un; amaute ka thupiakna bangin na gamtat nadingun na kingaihsun ding uh hi.

Galati 4:14

Keima sungah a om note thuak ze-etna note in ngaihsun loin, nial loin Pasian’ vantungmi bang ka hi zongin, Khazih Zeisu bang ka hi zongin, na hong sang uh hi.

Isaiah 42:19

Ka nasempa bangin kua a mit taw a, keima sawl ka kamtaipa bangin kua a bil ngong ahi hiam? Keima thuciampihpa bangin kua a mit taw a, Topa’ nasempa bangin kua a mit taw ahi hiam?

Gamlak-vakna 27:21

Siampi Eleazar’ mai-ah amah ding ding a, amah in Topa mai-ah Urim thukhenna tawh thu dotsak ding hi; amah leh amah tawh a om Israel mi khempeuh, mihon buppi, ama thu tawh pusuak ding uh a, ama thu mah tawh sungtum ding uh hi,” a ci hi.

1 SAMUEL MASA 2:17

Tua ahih ciangin Topa muhna-ah tangvalte’ khialhna lian mahmah hi; bang hang hiam cih leh mite in thusim lohna tawh Topa tungah biakpiaknate hih uh hi.

2 KHANG TANGTHU NIHNATE 31:4

Tua ciangin Topa’ thukham sepna ah siampite leh Levi mite a kibup piak theih nadingun amau’ ngah ding a kilawm nate, Jerusalem a, teeng mite in amaute tungah a piak nadingun amah in sawl hi.

Ezra 7:25

“Tua hi a, nang Ezra in nang tungah hong kipia na Pasian’ pilna tawh kizui-in Eufrates Gungal gam sunga mite thu a khen dingin na Pasian’ thukham a thei mite seh in; nang leh amaute in na Pasian’ thukham a thei lote na hilh ding uh hi.

Paunak 5:2

Tua hi leh, a kilawmin na gamtat nading zia na thei ding a, na kampaunate in na pil lam tak hong kilangsak ding hi.

Jeremiah 2:8

Siampite in, ‘Topa koi-ah a om hiam?’ ci-in dong lo uh hi. Thukham theite nangawn in kei hong thei lo uh hi. Kumpi uliante kei’ tungah hong khial khin uh a, kamsangte in Baal min tawh thu genin, kiman’na nei lo nate’ nung a zui uh hi.

Ezekiel 7:26

Lungkhamna khat khit khat a ban banin na tuak ding uh a, thusia bekbek na za za ding uh hi. Kamsangte kiangah thu na dong ding uh hi. Siampite in mite tungah hong hilh ding thu thei lo ding uh a, upate in hong gen ding mel thei lo ding uh hi.

Daniel 11:33

Pilna a nei mite in a pilna uh midang tampite a hilh ding uh hi. Ahih hangin tawl khat sung mi pawlkhat in gal sunga sihna leh meikuang sunga thahna a thuak ding uh hi. Mi kim khatte in lawkgawpna leh thongkiatna thuak ding uh hi.

Hosea 4:6

Ka mite in kei hong phawk lo uh ahih manin ka susia ding hi. No siampite in kei hong phawk nuam loin, ka thuhilhnate nial na hih manun ka siampi dingin kong deih nawn kei a, na tate uh zong siampi-in ka zang kei ding hi.

Zefaniah 3:4

A kamsangte kihisak uh a, kamsang citak hi lo uh hi. A siampite in a siangtho nate ninsak a, amau’ angsung ding bek khualna-in Pasian’ thukham lehhei uh hi.

2 KUMPI NIHNATE 16:11

Tua ciangin siampi Urijah in biakna tau bawl hi; Damaskas panin kumpi Ahaz hong tun’ ma-in kumpi Ahaz in Damaskas panin a khakna tawh kizui-in siampi Urijah in a bawl hi.

2 KUMPI NIHNATE 16:16

Kumpi Ahaz’ thupiak bangin siampi Urijah in hih thu khempeuh hih hi.

Thuhilh-sia 5:5

Na thuciamna bangin na tunsak loh ding sangin thuciamna neih vet loh ding hoihzaw hi.

Ezekiel 22:26

A siampite un ka thukham palsatin, a siangtho biakna nate ninsak uh hi. A siangtho biakna nate leh a mawkmawk nate khenna mel nei lo uh a, a tate uh tungah a siang leh a nin a kilamdan’na zong hilh lo uh hi. Sabbathte zong donin nei lo uh hi. Tuate khempeuh hangin Israel mite in kei hong zahtak lo uh hi.