Luka 6:49 - Tedim Bible

⁴⁹ Ka thu a zak ciangin a zui lo mi in, khuam phut lo lei tungah inn a lam mi tawh kibang hi. Hawktui in tua inn a nawk ciangin thakhatin a puk hi. Tua inn siatna in siatna lian ahi hi,” ci-in a gen hi.

Tedim Bible Revision 2017

⁴⁹ Ahi zongin ka thuhilhna za napi-in a zui lote pen bulkip a nei lo, leilak mawkmawk ah inn a lam pa tawh kibang hi. Tuikhang in tua inn a nawk ciangin thakhat thu-in sia gawp pah a, tua inn pen naksiat mahmah hi,” a ci hi.

Luka 6:49 Referans Kwoze

Ezekiel 33:31

Tua ahih ciangin nangma thugen a za dingin ka mite hong kisutuah uh a, ahi zongin nangma gen bangin amaute gamta lo uh hi. Amaute a kam-un hoih khem napi-in, a lungsim uhah amau’ meet nading bek ngaihsun uh hi.

Mattiu 23:3

Tua ahih ciangin, amau thukham khempeuh na zui un la, na tang un. Ahih hangin a gamtat uh bangin na ta kei un. Bang hang hiam na cih uh leh, amaute in a hilh bangun a gamta kei uh hi.

Paunak 28:18

Thuman-a gamta mite lung muangin om ding uh a, a zuautat mite ahih leh puk ding uh hi.

1 JOHAN MASA 2:19

Tua mite in eite kiang pan a paikhiat uh hangin nidang lai-inah eite tawh a kipawl kei uh hi. Bang hang hiam na cih uh leh, eite tawh kipawl uh hi leh, eite tawh a omkhawm ding uh hi. Tua mite in eite tawh a kipawl loh thu a kilat nading eite kiang pan a paikhia uh hi.

Johan 15:2

Kei tungah a gahlo hiangte khempeuh a sattan ding hi. A gah thei hiang khempeuh in a gah semsem nadingin a hahsiang ding hi.

Luka 12:47

“Nasempa in ama topa’ deihna thei napi-in kiging khol lo a, a topa’ deihna bangin na sem kei leh, nakpi satna a thuak ding hi.

Luka 6:46

“Keima thu ngai loin, ‘Topa aw, Topa aw,’ ci-in bang hangin hong ci na hi uh hiam?

Marka 4:17

Amaute sungah zung kha lo uh ahih ciangin, tawlkhat kikal bek a kip uh hi. A thu hangah gimna ahi zongin, bawlsiatna ahi zongin a thuak uh ciangin thakhatin a puk uh hi.

2 PETER NIHNA 2:20

I Topa leh Honpa Zeisu Khazih theihtelna hangin leitung kihhuaina tawh a suahtak khit uh ciangin, khat vei awk kikin a lelh uh leh, a nung ciangin a pian’ in a pian’masak sangin a gilo zaw hi.

1 THESALONIKA MASA 3:5

Tua ahih ciangin a ze-et thei, a zol theipa in no hong ze-et a, ka sepna un a mawkna a suak kha ding hi ci-in lunghimawhin ka thuak zawh nawn loh ciangin, note upna ka theih nadingin ka hong sawl hi.

Sawltak 26:11

Mite in Pasian tungah a pau khialh nadingin thatang hat thu-in hanciamin, kikhopna inn khat pan khat ah tamveipi ka pai hi. Nakpi-in ka heh maninah gamdangte khua dongin amaute ka bawlsia hi.

Sawltak 20:29

Ka pai khit ciangin gilo ngiate in nomau lakah lutin, a tuute a hehpih kei ding uh hi.

Luka 19:27

Tua tham loin kei uk ding a ut lo ka galte hong paipih un la, keima mai-ah na that un,’ ci-in thu a pia hi,” a ci hi.

Luka 19:14

A gam mite in amah mudah uh a, ‘Hih mi in eite kumpi dingin ka deih kei uh hi,’ ci-in ama kiangah mi a sawl uh hi.

Mattiu 24:10

Tua lai takin mi tampi a puk ding uh a, khat leh khat a kiheek ding uh hi, khat leh khat a kimudah ding uh hi.

Hosea 4:14

Na tanute uh a paktat manun daan ka pia kei ding a, na mote uh midang tawh a mawh manin zong daan ka pia tuan kei ding hi; bang hang hiam cih leh note mahmah numei paktatte tawh na mawh uh a, biakinn numeite tawh nu-le-pa mawhna biakna na bawl uh hi. Paunak-ah, “Thu hoih phawk theihna a nei lo mite in siatna thuak ding hi,” kici hi.

Luka 6:48

Amah in inn a lam ciangin, thukpi-in to a, suang tungah khuam a phut mi tawh kibang hi. Tui a khan’ ciangin hawktui in tua inn a nawt hangin, pha takin kilam ahih ciangin a liingsak zo kei hi.

Luka 7:1

Zeisu in thu khempeuh mihonpite zak dingin a hilh khit ciangin, Kapernaum khua-ah a lut hi.