Luka 3:11 - Tedim Bible

¹¹ Johan in, “Puan ak nih a neite in puan ak nei lote tawh hawm ta hen. An nek ding a neite in zong tua bangin hih ta hen,” a ci hi.

Tedim Bible Revision 2017

¹¹ Johan in, “Puanak nih a nei mipa in a nei lote hawm unla, annek ding a neite in a nei lote hawm un,” ci-in a dawng hi.

Luka 3:11 Referans Kwoze

1 JOHAN MASA 3:17

Mi khat in leitung sumte nei-in a u a nau a zawngte a muh hangin hehpihna lungsim a neih kei leh, tua mi sungah Pasian itna bang ci om ahi hiam?

Luka 18:22

Zeisu in tua a zak ciangin, “Na khat na sam lai hi. Na neihsa teng zuak in la, mizawngte kiangah na hawmsak in. Tua hi leh, vantungah sum na nei ding hi.Tua khit ciangin ka nung hong zui in,” a ci hi.

1 JOHAN MASA 4:20

Mi khat peuhmah in, “Pasian ka it hi,” ci napi-in a u a nau a it kei leh, tua mi in thuzuau gen mi ahi hi. Bang hang hiam na cih uh leh, a muh theih a u a nau a it kei leh, a muh theih loh Pasian bang ci a it zo ding hiam?

Jeim 1:27

I Pa Pasian mai-ah a nin lo, a siangtho biakna in pa nei lo naupangte leh meigong numeite a dah lai takun a en a keem thei a, ama pumpi zong leitung kihhuai nitna tawh kipelh nadingin a kikep theihna ahi hi.

Luka 11:41

Ahih hangin kuang sunglam a om nate mizawngte na pia un. Tua bang na hih uh leh, na khempeuh note mai-ah a siangtho ding hi.”

Mattiu 25:40

Kumpipa in, ‘Ke’n aman takpi kong cih-inah, note in ka sanggamte ahi hih mineupen khat tungah na bawl uh ciangin, kei tungah zong hong bawl na hi uh hi,’ a ci ding hi.

Daniel 4:27

Tua ahih ciangin kumpipa aw, kong thuhilhna hong mang in. Mawhna bawl nawn kei in la, dik takin gamta in. Mizawngte hehpih leteh, tua in a sia a na gamtatna sate hong puahsak dinga na nuamsa toto ding hi,” a ci hi.

Hebru 6:10

Bang hang hiam na cih uh leh, nomau nasepna uh akipan nidang lai-in misiangthote na vaak uh tham loin, tu nangawnin na vaak uh ahi zongin, tua bang hihin ama min hangin na lah uh ki-itna ahi zongin Pasian in a mangngilh dingin thumanlo-pa ahi kei hi.

Sawltak 10:31

Kornelias aw, na thungetna teng ka za zo hi. Na hehpihna na piak teng Pasian in a ngaihsun zo hi.

Sawltak 10:4

Amah in entel a, lau mahmah ahih ciangin, “Topa aw, bang ahi hiam?” a ci hi. Vantungmi in, “Na thungetna leh hehpihna na piak teng Pasian in a ngaihsut nadingin hong kahto zo hi.

Sawltak 10:2

Tua mi in a diktat mi hi a, a innkuanpihte tawh Pasian kihta a, mite tungah hehpihna tampi pia a, Pasian kiangah thungen nilohin a om hi.

Johan 13:29

Bang hang hiam i cih leh, mi kimkhat in Judas in dangka-ip tawi ahih ciangin, “Pawikhamna-ah i zat ding na khatpeuh peuh lei in,” ci ahih kei leh, “Mizawngte na khatpeuh na pia in,” a ci hi ci-in a ngaihsun uh hi.

Luka 19:8

Zakkhias ding a, “Topa aw, keimah in ka neihsa kimkhat mizawngte ka pia ding hi. Mi khatpeuh na ka lakkhak leh, a zah li-in ka loh kik ding hi,” a ci hi.

Ezekiel 18:7

Kuamah khem lo a, kuama’ na zong sut lo hi. Sum leitawi a lapa in khapna van a apte zong pia kik hi. Gilkialte an vakin, puan nei lote puan guan hi.

Efesa 4:28

Nidang lai-a guta mi in gu nawn loin, sapna neite a hop zawh, a piak zawh nadingin ama khut tawh nasepna a hoih hahkatin sem ta hen.

1 TIMOTI MASA 6:17

Hih leitungah sum hau mite in lungsim kiliatsakna tawh kipelhin, a kip tawntung thei lo sum hauhna muang loin, eite lungdam nading na khempeuh a kicingin hong pia Pasian muangin, nuntakna taktak ahi nuntakna ngah nadingin, hong tung ding hun ciangin, amau ading a bulpi pha zong kholin, midangte tungah thupha bawlna, gamtat hoihna kicingin, midang hopnopna lungsim nei-in, khat leh khat kipawl nadingin kilemna thu bawl nading thu na pia in.

Jeim 2:14

Ka u ka naute aw, mi khat in, “Upna ka nei hi,” a cih hangin ahoih a gamtat kei leh, bang phattuamna a om hiam? Tua upna in tua mi gumkhia zo ding ahi hiam?