Luka 13:34 - Tedim Bible

³⁴ “Pasian’ kamsangte that a, na kiangah hong kisawlte zong suang tawh a deeng Jerusalem, Jerusalem khuapi aw, akpi in a nongeekte a kha nuai-ah a khop bangin, na tate tamveipi ka khawm nuam zo a; nang na ut kei hi.

Tedim Bible Revision 2017

³⁴ “Jerusalem, Jerusalem aw, kamsangte na that a, Pasianʼ hong sawl kamtaite na deng lum hi. Akpi in a kha tawh a note a huai mah bangin na mite ka huai nuam tawntung a, ahi zongin na ut kei hi.

Luka 13:34 Referans Kwoze

Sawltak 7:52

No na pute na pate un a bawlsiat loh kamsang kua ahi hiam? ‘Midik Pa hong pai ding ci-a a genkholh mite a that uh hi. Tu-in tua Midik Pa a heekte, a thatte na suak zo uh hi.

Isaiah 30:15

Bang hang hiam cih leh Israelte’ Siangtho Pa, alian Pasian in, “Kihei kikna leh khawlna bek tawh note in suahtakna na ngah ding uh hi; daii tak-a omna leh muanna in nomau’ thahatna hi ding hi,” a ci hi. Ahih hangin note na tuaci kei uh a,

Luka 23:28

Zeisu in kihei a, “Jerusalem’ tanute aw, kei adingin kap kei un. No ading leh na tate uh ading na kap zaw un.

Luka 19:44

Nang akipan na sunga om na tate leitungah a kipuksak ding ni a hong tung ding a; na sunga suang khat tungah suang kiciang khat beek a omsak kei ding uh hi. Bang hang hiam na cih leh, Pasian hong hawhna hun na thei kei hi,” a ci hi.

Zekhariah 1:4

Na pu na pate uh bang nawn kei un. Nidanga kamsangte in amaute kiangah ka thu gen uh a, gamtatsia gamta loin, a mawh nawn lohna ding uh hilh uh hi. Ahi zongin amaute in ka thu ngai nuam loin, ka thu hong mang lo uh hi.

Hosea 11:7

Ka mite in kei kiang panin pial ding ngaihsun tawntung ahih manin amaute in kol bulhna thuak ding uh a, kuamah in a kol sutsak lo ding hi.

Hosea 11:2

Ahi zongin tapa bangin limbawl semsem leng, kei kiang panin gamla pai semsem hi. Ka mite in Baal tungah biakna pia uh a, milim biakna-in paknamtui hal uh hi.

Jeremiah 6:16

Topa in mite tungah, “Lamka bomah ding un la, khuadak un. Lam hoih ahi, lampi luite dong un la, tawn un. Na kha uh ading tawldamna na mu ding uh hi,” a ci hi. Ahih hangin amau in, “Ka tawn kei ding uh hi,” a ci uh hi.

Jeremiah 2:30

Na tate uh thu hilh-in ka sat hangin a mawkna suak zo hi, amaute kibawlpha tuan lo uh hi; na namsaute un humpi an zong bangin na kamsangte uh a that khin zo uh hi.

Late 36:7

Pasian aw, na itna kip bangzahta in manpha! Mihing tate na kha lim-ah bu uh hi.

Ruth 2:12

Topa in na gamtatna sate apha tawh hong thuk a, a lim nuai beel dinga na paina Israelte’ Pasian, Topa in thaman a cingin hong pia ding hi,” a ci hi.

Mattiu 22:6

A om laite in a nasemte manin, bawlsia-in a that uh hi.

Mattiu 22:3

Amah in a nasemte sawl a, a khohsate a sapsak hangin a hawh nuam kei uh hi.

Kah la 1:16

Tua ahih manin ka mit sung pan khitui a dim letin a luang hi. Hong hehnem ding leh hong hanthawn ding kuamah a om kei hi. Galte in hong zo khin a, ka mite a cimawh uh hi.

Isaiah 50:2

Bang hangin, kong pai ciangin mi khat zong om lo ahi hiam? Kong sap ciangin hong dawng ding khat zong om lo ahi hiam? Hong hon zo lo zah dingin ka khut tom lua ahi hiam? Tua ahih kei leh note khahkhiatna ding thahatna nei lo ka hi hiam? En un, keima taiina tawh tuipi ka keusak a, gunte pen sehnel gam ka suaksak hi; tui om loh manin a ngasate uih a, dangtakin si uh hi.

Late 91:4

amah in a khate tawh nang hong tuam ding a, ama khate nuai-ah buk nading na mu ding hi; ama thumanna in nang hong dalin hong hu ding hi.

Late 81:13

Ka mite in ka thu hong ngai-in, ka deih bangin Israel gamta leh pawh!

Late 57:1

Pasian aw, nangmah hong bel ka hih manin kei hong hehpih in, kei hong hehpih in; siatna huihpi a ven’ mateng na kha limah kong bu ding hi.

Nehemiah 9:30

Kum tampi sung lungduaina tawh amaute na thuak a, na kamsangte tung tawnin na Kha Siangtho tawh amaute na hilhkhol hi; ahi zongin amaute in ngai nuam lo uh hi. Tua ahih ciangin gamdang mite khut sungah amaute na pia hi.

Jeremiah 35:14

Rekhab’ tapa Jonadab in a tate’ tunga leenggahzu a dawn loh nading uh a thupiakna a zui uh a, tuni ciang dong bangmah a dawn kei uh hi. Bang hang hiam cih leh amaute in a pa uh’ thupiakna a mang uh hi. Keimah in note kong hopih tawntung hangin ka thu nong mang kei uh hi.

Jeremiah 26:23

amau in zong Izipt gam panin Uriah manin Jehoiakim kumpipa’ kiangah a puak uh hi. Amah in tua pa namsau tawh that-in a luanghawm mi mawkmawkte’ kivuina munah a paai hi.

Late 149:2

Amah a Bawlpa’ tungah Israel lungdam hen la, amau Kumpipa’ sungah Zion mite kipak ta hen!

Nehemiah 9:26

“‘Ahi zongin amaute in dem nopna lungsim nei-in nang hong lehdo uh hi; amaute in na thukham nungngat uh a, nangma lamah hong ciahkik nadingun amaute a hilhkhol na kamsangte that uh a, amaute in gendai-mawhna lianpi bawl uh hi.

Thu-hilhkikna 32:29

Amaute pil hi leh, hih thu theitel ding uh a, amau’ thu tawpna mu ding uh hi!

Thu-hilhkikna 5:29

Amaute leh a suan a khakte uh a nopsak tawntung theih nadingin keimah zahtak ding leh ka thupiak khempeuh zuih ding hih bang ngaihsutna nei tawntung le-uh ka deih ahi hi.

Mangmuhna 11:8

Amaute luangte zong a Topa uh singlamteh tungah a sihna khuapi ahi, a khiatna in Sodom leh Izipt a kici khuapi sungah a om lampi tungah a om uh a,

Sawltak 8:1

Saul in Stefen sih nading a thukim hi. Tua lai takin Jerusalem khua-ah a om pawlpite nakpi-in bawlsia uh a, sawltakte sim loh thu-um midangte khempeuh in Judah gam leh Samaria gam mun khempeuh ah a kithehthang uh hi.

Sawltak 7:59

Suang tawh a den’ lai takun Stefen in Pasian kiangah thungenin, “Topa aw, ka kha hong la ta’n,” a cih khit ciangin,

Luka 15:28

Ahih hangin amah heh a, inn sungah a lut nuam kei hi. A pa pusuakin a zol hi.

Joel 2:23

“Zion mite aw, kipak un la, Topa, na Pasian uh tungah lungdam un. Note in an na hauh theih nadingun, ni danga bangin khuapi guah, tuk guah leh phalbi guah, a hoih bek hong zusak hi.

Kah la 4:13

Hih thu a hong piang hi. Kamsangte leh siampite in mawhna a bawl manun mi siangtho midikte’ sihna a hong piang hi.

Late 17:8

Kei hong sutgawp migilo, keimah hong umcih ka gal kihtak huaite kiang panin mitnauta bangin hong kem in la, na kha lim-ah hong seel in.

Jeremiah 35:17

Tua ahih manin keimah Topa, a vanglian Pasian, Israel mite’ Pasian in kong gen-inah: En un, Judah mite leh Jerusalem khua-a teeng mi khempeuh tungah a tung ding a, ka gen khiatsa siatna khempeuh ka tungsak ding hi. Bang hang hiam cih leh amau tungah ka gen hangin amau in ka thu hong ngai lo uh a, amaute ka sap hangin hong dawngkik lo uh hi, ci hi, ci-in va gen in,” a ci hi.