Late 91:1 - Tedim Bible

¹ Sang Penpa’ liahna sungah a om mi, Vanglianpa’ liim sungah a om mi in,

Tedim Bible Revision 2017

¹ Sangpen paʼ liahna sung, Vanglian paʼ liim sungah a om mi khempeuh in

Late 91:1 Referans Kwoze

Late 32:7

Nangmah in keima adingin bukna mun na hi a, haksatna panin kei hong kemin, hotkhiatna tawh nong tuam hi.

Late 27:5

Bang hang hiam cih leh haksat hun ciangin a buk sungah kei hong seel ding hi; a puanbuk khuhna nuai-ah kei hong seel ding-a, a san’na suang tungah hong koih ding hi.

Late 36:7

Pasian aw, na itna kip bangzahta in manpha! Mihing tate na kha lim-ah bu uh hi.

Late 17:8

Kei hong sutgawp migilo, keimah hong umcih ka gal kihtak huaite kiang panin mitnauta bangin hong kem in la, na kha lim-ah hong seel in.

Late 31:20

Mite’ sawmsimna panin na omna huam sungah amaute na seel a, kitotna panin amaute na buk sungah muanhuai-in na kem hi.

Isaiah 25:4

Bang hang hiam cih leh nang pen mizawngte’ adingin mun muanhuai, a cimawh mi’ adingin a lungkhamna ah mun muanhuai, huihpi panin bukna leh nisa panin nilim na hi hi; bang hang hiam cih leh thukhual lo mite’ hihna pen huihpi in kulh a nawk tawh kibang a,

Late 121:5

Topa in nangmah hong cing ding a, nangmah hong hu dingin na kiangah hong om hi.

Isaiah 32:2

Amaute pen, huihpi panin belhna, guahpi panin bukna bang ding uh a, sehnel gam sunga tui luang bangin, nisa gam sunga om suangpi liim bang ding uh hi.

Late 90:1

Topa aw, nangmah in khang tawntunga kote omna mun na hi hi.

Late 57:1

Pasian aw, nangmah hong bel ka hih manin kei hong hehpih in, kei hong hehpih in; siatna huihpi a ven’ mateng na kha limah kong bu ding hi.

Kah la 4:20

Amaute in galte khut sung pana a hong hu zo dinga ka up uh, Pasian’ teel a muanhuai kumpi a hong matsak uh hi.

Late 52:8

Ahih hangin kei ka hih leh Pasian’ inn sunga oliv kung hing tawh ka kibang hi. Pasian’ itna kip ka muang ngitnget hi.

Late 25:13

Amah nuamsa tawntung ding a, a tate in leitang nei ding uh hi.

Solomon la 2:3

Ka ngaihno, tangval dang tawh teh lehang, gamlak singkung lak-a apple kung tawh kibang hi. Ama liim-ah ka tu nuam a, a gahte lim ka sa hi.

Ezekiel 11:16

Tua ahih ciangin na salpihte kiangah hih bangin keima thugente va gen sawn in: A gamlapi gamah a teeng dingin puak khia-in, gam dangah a thehthangpa in keimah ka hi hi. Ahi zongin amaute’ omna gam dangah tawl khat sung bek kei a hong bia dingin ka om sak ahi hi.

Isaiah 8:14

Amah pen, bukna hi ding a, a siangtho’ luatna hangin mite’ kitukna leh puk theihna suangtum tawh kibang hi. Judah leh Israel kumpigam mite leh Jerusalem khua-a teeng mite a awk nading thangzak tawh kibang ding hi.

Thukhente 9:15

Thangling kung in singkungte kiangah, ‘Note tungah kumpi-in lungsim tak tawh sathau hong nilh na hih uh leh, hong pai un la ka liim-ah bu un; ahih hangin tua bang ahih kei leh, thangling kung lak panin meikuang hong pai khia hen la, Lebanon taamtak kungte kangtum hen,’ a ci hi.