Late 27:4 - Tedim Bible

⁴ Topa’ tungah na khat ka ngen khin a, tua ngen-a ka zon’ ding pen: Topa’ inn sungah ka khan’ tawntungin om nading, Topa’ hoihna et ding leh ama biakinn sungah thu dot dingte ahi hi.

Tedim Bible Revision 2017

⁴ Topaʼ tung panin na khat ka ngen khin a, tua ngenin ka zon ding pen: Topaʼ inn sungah ka khan tawntungin om ding, Topaʼ hoihna et ding le ama biakinn sungah thu dot dingte ahi hi.

Late 27:4 Referans Kwoze

Late 26:8

Topa aw, nangma inn-a teen’ ding leh na minthang a omna mun-ah om ding ka ut hi.

Late 23:6

Hoihna leh hehpihna in ka khan’ tawntungin hong zui taktak ding a, Topa’ inn sungah ka om tawntung ding hi.

Late 65:4

Na inn-a om dinga na tel na lakte in mi nuamsa ahi hi! Nangma biakinn siangtho ahi na inn sunga hoihna tawh lungkim nung!

Late 84:4

Nangma inn sungah teeng a, nangmah phatna a sa ngitnget mite in thupha ngah mi ahi hi.

Late 84:10

Bang hang hiam cih leh mun dangah ni tulkhat om sangin nangma huang sungah ni khat om hoih zaw hi. Gitlohna inn sungah ka teen’ sangin ka Pasian’ inn kongcingpa ka hi nuamzaw hi.

Luka 10:42

Ahih hangin sapna khat bek a om hi. Mari in ahih leh, na hoih khat a teel zo hi. Tua na in ama tung pan kilakhia lo ding hi,” ci-in a gen hi.

Late 27:8

“Ka mai hong zong in,” na ci khin zo hi. Ka lungsim in nang tungah, “Topa aw, nangma mai kong zong hi,” ci hi.

Mattiu 6:33

Pasian’ Gam leh ama dikna zong masa un. Na zon’ uh leh, tua na khempeuh a hong pia thuah ding hi.

Jeremiah 29:13

Note in kei nong zong ding uh a, na lungsim khempeuh uh tawh nong zon’ uh ciangin nong mu ding uh hi.

Filippi 3:13

Ute naute aw, tua noptuamna keimah in ka len zo hi ka cih loh hangin, ka nasepna khat in ka nungah a om nate ngaihsun loin, ka mai lamah a omte zamin,

Hebru 11:6

Upna loin Pasian kilungdamsak zo lo hi. Bang hang hiam na cih uh leh, Pasian kiang a nai mi-in Pasian a om hi cih ahi zongin, cihtakna tawh amah a zong mite amah in thaman a piapa hi cih ahi zongin a um ding hi.

Late 90:17

Kote’ Topa Pasian’ maipha, komau tungah hong om sak in la, kote’ nasepna khempeuh hong tangtung sak in, hi hi, ka nasepna khempeuh uh-ah hong mavang sak in.

2 KORIN NIHNA 3:18

Eite khempeuh in mai sitna om loin limlang i et mah bangin Topa’ minthan’na mu-in, Kha Siangtho ahi Topa in hong sawl mah bangin eite minthan’na khang semsemin ama meel sun-in i kikheel hi.

Luka 2:37

kum sawmgiat leh kum li dong meigong a, thungetna leh an tan’na tawh sun tawh zan tawh pelh loin bia-in biakna innpi lawi loin a om hi.

Daniel 9:3

An ngawlin, ippi puan silhin, vut lakah tu-in, Topa’ kiangah deihtakin thu ka ngen hi.

Late 50:2

Hoih kicin’na, Zion panin, Pasian hong taangkhia hi.

Luka 18:1

Amaute in lungkia loin thu a nget ngitnget nadingun, Zeisu in thugentehna tawh thu a hilh-inah,

2 KORIN NIHNA 4:6

“Khua mial sungah khuavak a hong taang ding hi” a ci Pasian in Zeisu Khazih’ maitangah Pasian’ minthan’na theihna a vang hong piak nadingin kote lungsim uhah khuavak a hong tangsak hi.

Luka 13:24

Zeisu in, “Kong kawciik ah na lut zawh nadingun hahkat un. Bang hang hiam na cih uh leh, tampi in a lut nop ding uh hangin a lut zo kei ding uh hi, kong ci hi.

1 TIMOTI MASA 5:5

Meigongnu taktak hi a, khat guak a om lai numei in Pasian muang a, sun tawh zan tawh thungenin a om tawntung hi.

Zekhariah 9:9

Zion mite aw, nakpi takin lungdam un. Jerusalem mite aw, lungdamin awng un. En un, na kumpipa uh hong pai hi. Amah, dikna leh gupkhiatna tawh hong pai a, ahi zongin kiniamkhiatna tawh hong pai-in sin nai loh lano tungah hong tuang hi.

Late 26:6

Topa aw, mawh baan’lohna ka lahna-in ka khutte ka sil a, biakna pia-in na biakna tau kim-ah ka pai hi;

2 SAMUEL NIHNA 21:1

Tu-in kum khat khit kum khat, David’ hun sungin kum thum sung kialpi tung hi; tua ciangin David in Topa’ kiangah thu dong hi. Tua ciangin Topa in, “Amah in Gibeon mite that ahih manin Saul leh a innkuan tungah mithah mawhna om hi,” a ci hi.

1 SAMUEL MASA 1:11

Amah in thuciamna khat bawlin, “Mihonte’ Topa aw, nangmah in na nasemnu’ gimna nong et takpi a, keimah hong phawkin na nasemnu hong mangngilh loin na nasemnu tungah tapa khat nong piak leh, Topa tungah a khan’ tawntungin amah ka pia ding a, ama lu-ah mulkiatna kitah lo ding hi,” a ci hi.

1 SAMUEL MASA 30:8

Tua ciangin David in Topa thu dong a, “Hih mihonte ka delh ding hiam? Amaute ka pha ding hiam?” a ci hi. Amah in dawngin, “Delh in; bang hang hiam cih leh na pha taktak ding a, na mite na honkhia zo taktak ding hi,” a ci hi.

1 SAMUEL MASA 22:10

amah in ama adingin Topa thu dot sakin, an-le-tui pia a, Filistia mi Goliath’ namsau ama tungah pia hi,” a ci hi.