Late 17:8 - Tedim Bible

^8-9 Kei hong sutgawp migilo, keimah hong umcih ka gal kihtak huaite kiang panin mitnauta bangin hong kem in la, na kha lim-ah hong seel in.

Tedim Bible Revision 2017

^8-9 Kei a hong su gawp migilo, kei a hong umcih a kihtakhuai mahmah ka galte kiang panin mitnauta bangin hong kem inla, na kha liim ah hong seel in.

Late 17:8 Referans Kwoze

Thu-hilhkikna 32:10

“Amah in sehnel gam, huihpi nun’na gamlakah amaute mu hi; amah in kawi-in kem a, ama mit nauta bangin amaute kem hi.

Late 91:4

amah in a khate tawh nang hong tuam ding a, ama khate nuai-ah buk nading na mu ding hi; ama thumanna in nang hong dalin hong hu ding hi.

Late 91:1

Sang Penpa’ liahna sungah a om mi, Vanglianpa’ liim sungah a om mi in,

Paunak 7:2

Kong gen bangin gamta in; na nungta ding hi. Kong thuhilhte, na mitnauta bangin hoih takin kem in.

Luka 13:34

“Pasian’ kamsangte that a, na kiangah hong kisawlte zong suang tawh a deeng Jerusalem, Jerusalem khuapi aw, akpi in a nongeekte a kha nuai-ah a khop bangin, na tate tamveipi ka khawm nuam zo a; nang na ut kei hi.

Zekhariah 2:8

Hih bangin mang ka muh khit ciangin, ama mite’ na a sut gawp minam dangte kiangah thu a gen dingin Vanglianpen Topa in kei hong sawl a, “Topa’ mite a su mi peuhpeuh in a mit nauta banga a na manpha pen khat a su ahi hi.

Late 36:7

Pasian aw, na itna kip bangzahta in manpha! Mihing tate na kha lim-ah bu uh hi.

Late 57:1

Pasian aw, nangmah hong bel ka hih manin kei hong hehpih in, kei hong hehpih in; siatna huihpi a ven’ mateng na kha limah kong bu ding hi.

Ruth 2:12

Topa in na gamtatna sate apha tawh hong thuk a, a lim nuai beel dinga na paina Israelte’ Pasian, Topa in thaman a cingin hong pia ding hi,” a ci hi.

Late 61:4

Na buk sungah hong omsak tawntung ta in! Nangma khate’ hutna sungah lungmuanga om dingin!

Mattiu 23:37

“Pasian’ kamsangte that a, na omna ah hong kisawlte zong suangtum tawh a deeng Jerusalem khuapi aw, akpi in a nongeekte a kha nuai-ah a khop bangin, na tate tamveipi ka khawm nuam zo a, nang na ut kei hi.

Late 63:7

Bang hang hiam cih leh nangmah in kei hong huhpa na hi a, nangma hutna sungah lungdamin la ka sa hi.

Late 16:1

Pasian aw, nangmah hong bel ka hih ciangin keimah hong kem in.

Late 36:8

Na inn sunga na tampite tawh amaute nuamsa uh a, na lungkimna gun panin amaute dawn ding na pia hi.

Late 57:2

A Sang Penpa Pasian’ tung, kei’ Pasian’ tung, kei’ adingin ama deihna a tungsak Pasian’ tungah ka ko hi.

Late 61:5

Bang hang hiam cih leh Pasian aw, ka thuciamnate nangmah in na za khin a, nangmah hong zahtakte’ luahna keimah nong pia khin ta hi.