Late 139:23 - Tedim Bible

²³ Pasian aw, kei hong entel in la ka lungsim hong thei in! Kei hong sit in la ka ngaihsutnate hong thei in!

Tedim Bible Revision 2017

²³ Pasian aw, kei hong en tel inla, ka lungsim hong thei in. Kei hong sit inla, ka ngaihsutnate hong thei in.

Late 139:23 Referans Kwoze

Late 26:2

Topa aw, keimah hong ze-et in la hong sin in; ka lungsim leh ka ngaihsutna hong entel in.

JOB (Job) 31:6

Pasian in a man tawikhaina-ah hong tawikhai hen, ka pauban’ het lohna hong mu ding hi.

Paunak 17:3

Kham leh ngunte, mei sungah kize-et a, mihingte’ lungsim, Topa in ze-et hi.

Thu-hilhkikna 8:2

A thupiakte na zui uh hiam na zui kei uh hiam cih a theih nadingin note hong niamkhiatin na lungsim uhah bang om hiam cih a theih nadingin Topa na Pasian un gamlakah hih kum sawmli sung note hong paipihna lampi khempeuh na ciamteh ding uh hi.

Late 139:1

Topa aw, nangmah in kei nong entel-a nong thei khin hi.

Jeremiah 11:20

Ahih hangin thuman tak-a thu khen a, mite’ lungsim leh ngaihsutna a entel a vanglian Topa aw, amaute na thukkikna kei hong musak in; bang hang hiam cih leh nang’ tungah ka thu kong ap khin hi.

Zekhariah 13:9

Tua a suakta seh khatte pen, meikhukah ngun a kisian’sak bangin, meikhukah kham a kize-et bangin, meikhukah ze-etin ka siangsak ding hi. Amaute in kei tungah thu hong ngenin, kei zong amau’ hong ngetna ka pia ding hi. Keima mi ahihna uh, amaute tungah ka gen ding a, amaute in, kei pen, amau’ Pasian ka hihna thu, a kam uh tawh pulak ding uh hi,” a ci hi.

Thu-hilhkikna 8:16

a tawpna ah a hoih-in na gamtat theih nading uh deihna-in note hong niamkhiatin hong ze-et theih nadingin na pu na pate un a theih loh manna tawh gamlakah hong vaak ahi Topa na Pasian uh na mangngilh kha ding uh hi.

Late 11:4

Topa in ama biakinn siangtho sungah om a, Topa’ tokhom in vantungah om hi; a mit-in en a, a mit tawh mihing’ tate entel hi.

Late 11:5

Topa in midikte leh migilote en tel a, a ngongtat nuam mi a lungsim in mudah hi.

Late 17:3

Keima lungsim hong sin in la, zan-in nangmah ka kiangah hong hawh in la, keimah hong ze-et lecin, ka sungah gitlohna na mu kei ding hi; ka kam in khial lo hi.