Kolose 3:22 - Tedim Bible

²² Silate aw, Pasian kihta-in, mihing pahtaak ding ut-a mi’ maitang bekah mang hi loin, lungka loin, ci-le-sa tawh kipawl na tote uh thu khempeuh na mang un.

Tedim Bible Revision 2017

²² Silate aw, thu khempeuh ah na leitung topa uh thu na mang un. Amauʼ hong pahtak ding deihna tawh a hong muh sung bekin a hoih tatte hi kei unla, Topa na zahtakna uh hangin lungsim tak tawh gamta un.

Kolose 3:22 Referans Kwoze

Galati 1:10

Tu-in keimah in mi’ deihna zui ka hi hiam? Ahih kei leh, Pasian’ deihna zui ka hi hiam? Mite’ pahtak ding hanciam ka hi hiam? Mite’ pahtak nading hanciam ka hih leh, Khazih’ sila ka hi kei hi.

1 THESALONIKA MASA 2:4

Lungdamna Thu zui dinga kilawm mi ci-in Pasian in ko hong koih mah bangin mite lungsim uh kimsak bang hi loin, lungsim a hong dongtel Pasian lungkimsak bangin thu ka hilh uh hi.

Kolose 3:20

Tapate tanute aw, thu khempeuhah na nute na pate uh thu na mang un. Bang hang hiam na cih uh leh, nute pate thuman’na in Pasian’ deihna ahi hi.

Luka 6:46

“Keima thu ngai loin, ‘Topa aw, Topa aw,’ ci-in bang hangin hong ci na hi uh hiam?

Thuhilh-sia 5:7

Mang tam man leeng a mawkna mah tam a, kam tam pau leeng zong a kituak mahin a mawkna thu mah kibeh laplap hi; bangbang ahi zongin Pasian zahtak lai veve in.

Filemon 1:16

Tua bang ka cih ciangin sila bangin ngaihsun nawn loin, tham loin kei in ka it taktak ka nau hi a, nang adingin pumpi sungah ahi zongin, Pasian sungah ahi zongin bang zahin a it huai semsem naupa bangin na ngaihsut nading ka cihnopna hi.

2 KORIN NIHNA 7:1

Tua ahih ciangin ka itte aw, tua thuciamna eite tawh kikum ahih ciangin i pumpi kihhuainate leh lungsim kihhuainate khempeuh panin kisiangthosakin, Pasian kihta-in, a siangtho gamtatna tawh dimin om ni.

Sawltak 2:46

Amaute in biakna innpi sungah ni simin lungsim kituakin a om uh a, amau innah anlum balnenin, a siangtho lungdamna tawh anne tuidawn uh a, Pasian a phat uh hi.

Luka 7:8

Bang hang hiam na cih leh, keimah in zong mangza-ah hong kikoih hi. Ka nuai-ah zong galkapte a om hi. Tua galkapte khat kiangah, ‘Pai in,’ ka cih ciangin a pai hi. Adang khat kiangah, ‘Hong pai in,’ ka cih ciangin a hong pai hi,” ci-in a gensak hi.

Mattiu 8:9

Bang hang hiam cih leh, keimah in zong za nuai ah hong kikoih hi. Keima nuai ah zong galkapte a om hi. Tua galkapte khat, ‘Pai in,’ ka cih ciangin a pai hi, khat ‘hong pai in’ ka cih ciangin a hong pai hi. Ka nasempa, ‘Hih na sem in,’ ka cih ciangin a sem hi,” a ci hi.

Mattiu 6:22

“Mittang in pumpi meivak ahi hi. Tua ahih ciangin, na mit a ciim leh, na pumpi zong a vaak kim ding hi.

Malakhi 1:6

Vanglianpen Topa in siampite tungah hih bangin hong ci hi: “Tapa in a pa zahtak a, nasempa in a topa kihta hi. Keimah in na pa uh hi napi, bang hangin hong zahtak lo a, na Topa uh hi napi, bang hangin hong kihta lo na hi uh hiam? No siampte in kei hong simmawh napi-in, ‘Bang hong ci simmawh ka hi uh hiam?’ na ci lai uh hi.

Thuhilh-sia 12:13

Hih thute khempeuh banah, gen ding thu khat bek om hi. Mihing hong kipian’sakna, a thu bulpipen in: Pasian zahtakna, leh a thupiaknate man’na ahi hi.

Late 123:2

En in, nasem pasalte in a topa uh muang a, nasem numei in a tonu-uh a muan’ mah bangin, ko tungah hehpihna nong neih matengin Topa kote’ Pasian kong mitsuan uh hi.

Nehemiah 5:15

Keima hun ma-in a ukte in mite tungah vangikpi suan uh a, amaute tung panin ni simin an leh lenggahzu ngun shekel sawmli man la uh hi. Amau’ nasemte nangawn mite tungah kiliansak lai uh hi. Ahi zongin Pasian ka zahtakna hangin tua bangin kei ka gamta kei hi.

Piancilna 42:18

A ni thum ni-in Josef in amaute' kiangah, “Keimah in Pasian zaktak ka hih manin hih bangin gamta un, tua hi leh na nungta ding uh hi:

Thuhilh-sia 8:12

Mawhnei khat in zavei dong siatna bawl napi-in, a khan’ sau veve hi. Ahi zongin, “Pasian a zahtakte adingin, thu khempeuh nuam ding hi.

Nehemiah 5:9

Tua ciangin keimah in, “Note’ gamtatna hoih lo hi. I gal ahi mi namdangte’ zahkohna i ngah loh nadingin i Pasian zahtakna tawh na gamtat ding uh kilawm hi.