Johan 6:51 - Tedim Bible

⁵¹ Keimah in vantung pan hong kumsuk nuntakna khomun ka hi hi. Hih khomun a nete in a tawntungin a nungta ding hi. Ahi hi. Ka hong piak khomun in leitung mite’ nuntak nading ka piak ka sa ahi hi,” a ci hi.

Tedim Bible Revision 2017

⁵¹ Kei pen vantung panin a hong pai suk nuntakna an ka hi hi. Tua an a ne mi peuhmah nungta tawntung ding hi. Leitung mite a nuntak nadingin ka piak ding an pen keima sa ahi hi,” a ci hi.

Johan 6:51 Referans Kwoze

Luka 22:19

Amah in khomun la a, hehpihna a phat khit ciangin, khomun balnenin, “Hih khomun in note ading a kipia ka pumpi ahi hi. Kei nong ngaihsut nadingun hih bangin na hih un,” ci-in a nungzuite a pia hi.

Johan 6:33

Pasian’ khomun in vantung pan hong paisuk a, leitung mite nuntakna a pia khomun ahi hi,” a cih leh,

Johan 3:13

Vantungah om a, vantung pan hong kumsuk Mihing Tapa khat longal kuamah vantungah a kahto ngei kei hi.”

Titu 2:14

Tua Topa in mawhna khempeuh sungpan eite hong tankhia dingin ahi zongin, gamtatna ahoihte ah lungsim utna nei-in, ama hong neihtuam dingin, ama ading siangthosak dingin ahi zongin eite ading ama pumpi a pia hi.

Mattiu 20:28

Tua mah bangin, Mihing Tapa in midangte na sem sak dingin hong pai ahi kei hi. Midangte’ na sem ding a, mi tampi tankhia ding leh, a nuntakna pia dingin a hong pai hi,” a ci hi.

2 KORIN NIHNA 5:21

Pasian in mawhna a nei lo Khazih, eite tangding mawhna a suaksak hi. Bang hang hiam na cih uh leh, eite in tua mi hangin Pasian’ dikna i suah theih nading ahi hi.

1 PETER MASA 2:4

Mite in a nilkhiat hangin Pasian’ teel nuntakna suangpi ahi, tua Topa kiangah pai-in,

Efesa 5:2

Khazih in note hong it maninah Pasian mai-ah namtui om nadingin ama pumpi kipia-in, kibia-in, eite tangding a kipaih mah bangin note in itna tawh gamta un.

Johan 3:16

“Pasian in a Tapa a um mi khempeuhte in kisia lo a, nuntak tawntungna a ngah nadingin a Tapa khat bek a piak dongin leitung mite a it hi.

Johan 1:29

Zingsang ciangin Zeisu hong pai Johan in a muh ciangin, “En un, leitung’ mawhna a puakhia Pasian’ Tuuno!

1 JOHAN MASA 4:14

Pa in a Tapa leitungmite’ Gumpa a suah nadingin hong sawl thu kote in thei-in teci ka pang uh hi.

1 JOHAN MASA 4:10

Eite in Pasian i itna hang hi lo hi, Pasian in eite hong it a, eite mawhna hong tat nadingin ama Tapa hong sawlna ah itna hong kilang hi.

1 JOHAN MASA 2:2

Tua Topa in eite mawhna tham loin, leitung mi khempeuh’ mawhna maisak nading ahi hi.

Johan 1:14

Thu in mi bangin hong suak a, hehpihna leh thuman thutak tawh kidimin eite lakah a om hi. Pa in a Ta khat bek a piaksa minthan’na bangin ama minthan’na ka mu uh hi.

Efesa 5:25

Pasalte aw, Khazih in pawlpi a it mah bangin na zite uh na it un.

2 KORIN NIHNA 5:19

Tua thu in, Pasian in Khazih sungah om a, leitungmite’ mawhna ciamteh loin amah tawh kilemsak a, tua kilemsakna thu kote hong pia hi.

Johan 7:38

Kei hong umte Lai Siangtho sungah a kigelh bangin, ama sung pan nuntakna guntui a luangkhia ding hi,” ci-in a kiko hi.

Johan 3:14

“Moses in gamlakah gul a khai bangin Mihing Tapa a kikhai ding hi.

Johan 3:36

Tapa thu a umte khempeuh in nuntak tawntungna a nei hi. Ahih hangin Tapa a um lo mi in nuntakna a ngah kei ding hi, Pasian’ hehna in tua pa tungah a om hi.

Johan 5:24

“Ke’n aman takpi kong cih-inah, keima thu za a, keimah hong sawlpa a um mi in, nuntak tawntungna ngah zo ahih ciangin, thukhenna a thuak kei hi; sihna pan paikhia a, nuntakna-ah a tung zo hi.

Johan 6:35

Zeisu in, “Keimah in nuntakna khomun ka hi hi. Kei kiangah hong pai mi in a nung ciangin a gilkial ngei nawn kei ding hi. Kei hong um mi in a nung ciangin a dangtak nawn kei ding hi.

Johan 6:41

“Vantung pan hong kumsuk khomun ka hi hi,” Zeisu in a cih ciangin

Johan 6:47

Vantung pan hong paipa in Pa a mu zo hi. Ke’n aman takpi kong cih-inah, a hong umte in nuntak tawntungna a nei uh hi.

Johan 6:48

Nuntakna khomun ka hi hi.

Johan 6:50

Vantung pan hong kumsuk hih khomun a nete in sihna tawh a kipelh ding hi.

Johan 11:26

Kei hong um a nungtate in zong cikmah ciangin a si ngei kei ding hi. Hih thu na um hiam?” ci-in a dot ciangin,