Johan 17:13 - Tedim Bible

¹³ Tu-in keimah in nangma kiangah kong pai ding hi. Keima lungdamna hih mite sungah a dim nadingin hih thute leitungah ka om lai-in ka gen hi.

Tedim Bible Revision 2017

¹³ Tu-in nangma kiangah a hong pai ta ding ka hih manin keimah bangin amaute in lungdamna cingtaak a neih theih nadingun leitungah ka om lai-in hih thute a gen ka hi hi.

Johan 17:13 Referans Kwoze

Hebru 12:2

eite upna a piangsakpa a kicingsakpa Zeisu a tel takin enin, i mai-ah a om kitaitehna-ah thakiamsak loin kidem ni. Tua Topa Zeisu in ama mai-ah a koih lungnopna thu hangin zumna ngaihsun loin, singlamteh a thuak khit ciangin Pasian’ tokhom ziat lamah a tu hi.

Galati 5:22

Kha Siangtho’ gah in: itna, lungdamna, kilemna, lungduaina, mi hehpihna, gitna, diktatna,

Johan 15:11

Note sungah ka lungdamna om a, note lungdamna a kicin’ nadingin hih thute note kiangah kong gen zo hi.”

Johan 3:29

Zipipa in zi neipa ahi hi. Ahih hangin zi neipa kiangah ding a, ama thu a za a lawmpa in zi pipa’ aw a zak manin a lungdam mahmah hi. Tua mah bangin keima lungdamna a kicing hi.

1 JOHAN MASA 1:4

Note lungdamna a kicin’ nadingin hih thute ka hong gelh uh hi.

Johan 13:3

Pa in na khempeuh ama khut tungah a apna thu ahi zongin, amah in Pasian kiang pan a hong paina thu ahi zongin, Pasian kiangah a paikik nading ahi zongin a theih ciangin,

2 JOHAN NIHNA 1:12

No kiangah ka hong gelh nop thu tampi a om hangin lai tungah laitui tawh gelh ding ka deih kei hi. Note kiangah hong pai-in, khat leh khat lungdamna a kicin’ nadingin note tawh maitang kimu-a kihopih ding ka lamen hi.

ROM (Romans) 14:17

Bang hang hiam na cih uh leh, Pasian’ Gam in an nekna, tui dawnna-ah a kip kei hi. Kha Siangtho hanga kingah dikna, kilemna leh lungdamna-ah a kip hi.

Johan 16:33

Note in keima sungah nopna na neih nadingun hih thute kong genkhol hi. Note in leitungah gimna na thuak ding uh hi. Ahih hangin lunghimawh kei un, leitung ka zozo hi,” ci-in a gen hi.

Late 126:5

Khitui tawh khai a tuhte, lungdam-a kikona tawh an lasak ta in!

Late 43:4

Tua ciangin Pasian biakna tau ahi zongin, ka lungdamna Pasian kiangah ahi zongin ka pia dinga, laiza khausai lasakna tawh nang kong phat ding hi, aw Pasian, ka Pasian aw.

Nehemiah 8:10

Tua ciangin amah in amaute kiangah, “Tu-in ciah un; an lim tui lim ne-in thadim un la, a nei zo lote zong va kholh un; bang hang hiam cih leh i Topa’ adingin tu ni in biakna ni siangtho ni ahi hi; dah kei un, bang hang hiam cih leh Topa sungah lungdamna in note’ thahatna ahi hi,” a ci hi.

Sawltak 13:52

Nungzuite in lungdamna leh Kha Siangtho tawh a kidim uh hi.

Johan 7:33

Tua ahih ciangin Zeisu in, “Note tawh tawlkhat bek ka om khit ciangin kei hong sawlpa kiangah ka ciahkik ding hi.

Johan 17:11

Tu-a kipanin leitungah ka om kei ding hi. Hih mite in leitungah a om lai ding uh hi. Nangma kiangah kei kong pai ding hi. A siangtho Pa aw, nang leh kei in pumkhat i hih mah bangin, amaute zong pumkhat a suah nadingun kei nong piaksa mite nangma min tawh kipsak in.