Johan 16:32 - Tedim Bible

³² En un, note in na omna ciat uhah na kikhenthang ding uh a, kei guak na hong nusiat nading uh ahun hong tung ding a, a tung zo hi. Ahih hangin kei guak ka om kei hi; Pa in kei tawh a omkhawm hi.

Tedim Bible Revision 2017

³² Note khempeuh kithehthangin na inn ciat uh zuanin kei bek na hong nusiat ding uh hun a hong tung ding hi bek loin tu-in a hong tung hi ta hi. Ahi zongin kei guak a hong kinusia hi lo a, Pa in kei hong ompih hi.

Johan 16:32 Referans Kwoze

Zekhariah 13:7

Namsau aw, ka tuucingpa a su dingin kipan in la, kei tawh nasem khawmpa lang pang in. Tuucingpa sat in. Tuute kithehthang ding a, ka tuute gim ka pia ding hi.

Mattiu 26:31

Tua lai takin Zeisu in, “Tuucingpa ka satlum a, tuu honpite a kithehthang ding uh hi,’ ci-a Lai Siangtho sungah a kigelh bangin note na vekpi-un kei hangin, tuzan ciangin na lungkia ding uh hi. Ahih hangin ka thawhkik khit ciangin note maiah Galile gamah ka pai ding hi,” a cih ciangin

Johan 8:29

Kei hong sawlpa in kei tawh a omkhawm hi. Amah in kei hong nusia kei ding hi. Bang hang hiam na cih uh leh, ama deihna bangin ka hih tawntung hi,” a ci hi.

Johan 8:16

Ahi hi. Keimah in thu ka khen zongin ka thukhenna a man hi. Bang hang hiam na cih uh leh, keimah guak ka hi kei hi; kei hong sawl Pa in kei tawh a omkhawm hi.

Marka 14:27

Tua lai takin Zeisu in, “Tuucingpa ka satlum a, tuute a kithehthang ding hi,” ci-a Lai Siangtho sunga a kigelh bangin, note na vekpi un na lungkia ding uh hi.

Mattiu 26:56

Hih thute khempeuh in Pasian’ kamsangte’ gelhsa Lai Siangtho hong tun’ nading ahi hi,” ci-in mihonpite kiangah a gen hi. Tua ciangin, a nungzuite khempeuh in Topa a taisan uh hi.

Johan 20:10

Tua ahih ciangin tua nungzuite amau innah a ciah uh hi.

Johan 16:25

“Tua thute thugentehna tawh kong gen zo hi. Thugentehna tawh gen loin, Pa’ thu note kiangah a tel takin kong gen nading ahun hong tung ding hi.

Johan 16:2

Amau in kikhopna innsung pan note hong hawlkhia ding uh hi. Ahi hi; hong that mite khempeuh in Pasian’ na ka sem hi ci-in a ki-um ding uh hi.

Johan 4:23

A bia taktakte in Kha leh thuman thutak tawh, Pa Pasian a biak ding uh hun hong tung ding tham loin a hong tung zo hi. Bang hang hiam na cih leh, Pa Pasian in amah bia dingin tua bang mite a zong hi.

Johan 4:21

Zeisu in, “Numei aw, ka thu hong um in. Hih mual tungah ahi zongin, Jerusalem khua sungah ahi zongin Pa Pasian na biak loh nading uh hun hong tung ding hi.

Johan 12:23

Zeisu in, “Mihing Tapa in minthan’na a ngah hun hong tung zo hi.

Johan 5:28

Hih thu lamdang na sa kei un. Bang hang hiam na cih uh leh, han sungah a omte khempeuh in ama aw za uh a, a hong pusuak hun hong tung ding hi.

Johan 5:25

Ke’n aman takpi kong cih-inah, a sisate in Pasian’ Tapa’ aw a zak nading uh a hun hong tung ding tham loin tu-in zong a tung zo hi. Tua aw a zate in a nungta ding uh hi.

Marka 14:50

Tua ciangin, a nungzuite khempeuh in Topa a taisan uh hi.

Sawltak 8:1

Saul in Stefen sih nading a thukim hi. Tua lai takin Jerusalem khua-ah a om pawlpite nakpi-in bawlsia uh a, sawltakte sim loh thu-um midangte khempeuh in Judah gam leh Samaria gam mun khempeuh ah a kithehthang uh hi.

Johan 16:31

Zeisu in zong, “Tu-in nong um uh hiam?

Johan 19:27

A nungzuipa kiangah, “Nang na nu en in!” a ci hi. Tua akipanin tua nungzuipa in, Zeisu’ nu ama innah a khoi hi.

Sawltak 21:6

khat-le-khat mangpha ka kikhak khit uh ciangin teembaw tungah ka kahto uh a, amaute a ciahkik uh hi.