Jeremiah 6:16 - Tedim Bible

¹⁶ Topa in mite tungah, “Lamka bomah ding un la, khuadak un. Lam hoih ahi, lampi luite dong un la, tawn un. Na kha uh ading tawldamna na mu ding uh hi,” a ci hi. Ahih hangin amau in, “Ka tawn kei ding uh hi,” a ci uh hi.

Tedim Bible Revision 2017

¹⁶ Topa in mite tungah, “Lam ka bomah ding unla khuadak un. Lam hoih ahi lampi luite dong unla tawn un. Tua hileh na tawldam ding uh hi,” a ci hi. Ahih hangin amaute in, “Ka tawn kei ding uh hi,” a ci uh hi.

Jeremiah 6:16 Referans Kwoze

Isaiah 30:21

Taklam na kihei ciang uh hita leh veilam na kihei ciang uh hita leh, “Hih pen lampi hi, hih tawn un,” cihna aw, na nung lam panun na bil un a za ding hi.

Jeremiah 18:15

Ahih hangin ka mite in kei hong mangngilh khin uh a, milim pasiante kiangah paknamtui a hal uh hi. Amau’ tot ding lampi-ah tuk uh ahih manin a tot ngei uh lampi lui zui nawnloin, lampi lopi a tawn uh hi.

Thu-hilhkikna 32:7

A beisa hunte phawk un la, khang tampi hunte ngaihsun un; na pa dong in, hong lak ding hi; na upate dong in, hong gen ding uh hi.

Jeremiah 7:23

Ahih hangin, ‘Ka thu hong mang un; tua hi leh note’ Pasian ka hi ding-a, note in ka hoih zawk nadingin na khempeuh-ah kong thupiak bang na zui un,’ ci-in thu ka piazaw hi.

Kolose 2:6

Tua ahih ciangin Khazih Zeisu, Topa-a na san’ khit uh ciangin tua Topa sungah gamta-in, zung kha-in, kilamin omin, kihilhna na ngah khit uh mah bangin upna-ah kipin, hehpihna phatna tawh upna khangin kicingin om un.

Isaiah 2:5

Jakob’ suan leh khakte aw, hong pai un, Topa’ khuavak sungah gamta ni.

Johan 12:35

Tua ciangin Zeisu in, “Khuavakna in note kiangah tawlkhat a om lai ding hi. Khuamial in no hong lap loh nadingin khuavak a om lai takin na pai un. Khuamial lakah a pai mi in a tun’na ding a thei kei hi.”

Jeremiah 18:12

Amau in, ‘Tua bang gen kul lo hi. Ko’ ngimna bangin ka zui ding uh a, mi khempeuh in ama’ lungsim sia’ deihna bangin ka gamta ding uh hi,’ hong ci ding uh hi.

Jeremiah 22:21

Na daupai laitak-un kong hopih hangin na hong ngai nuam kei uh hi. Na neu tung-ua kipan nong tua cih ngitnget uh a, ka thu nong mang ngei kei uh hi.

Jeremiah 44:16

“Topa’ min a, nong gen thute kong mang kei ding uh hi.

Hebru 11:2

Tua upna hangin tanglai mite in teci pan’na a ngah uh hi.

Johan 13:17

Tua nate thei-in na hih le-uh teh, thupha na ngah ding uh hi.

Malakhi 4:4

“Israel mite khempeuh in a zuih dingin Horeb Mual panin ka nasem Moses tungah ka piak ahi, Moses’ thukhamte, ngeinate, leh biakna ngeina kipte khempeuh lim takin phawk un.

Isaiah 8:20

Tua ciangin note in, “Topa hong hilh thute leh teci panna thute ngai un. Aisante’ thu ngai kei un. Amaute in zing khuavak nei lo ahih manin hong gen thute a kiman’na om lo hi,” ci-in dawng un.

Luka 16:29

Abraham in, ‘Amaute in Moses leh Pasian’ kamsangte a nei uh hi.

Isaiah 28:12

Topa in note tungah tawlngakna leh lungnopna hong pia napi-in! note in ama thu na ngai kei uh hi.

Johan 5:39

Lai Siangtho hangah nuntak tawntungna ngah nung ci-in na up manunah Lai Siangtho na tel et uh hi. Hih Lai Siangtho in keima ading teci ahi hi.

Sawltak 17:11

Tua mite in Thesalonika khua mite sangin a dikzaw uh hi. Bang hang hiam i cih leh, deih phat mahmahna lungsim tawh Pasian’ thu sangin, hih thute a man hiam a man lo hiam cih a theih nadingun ni simin Lai Siangtho tel takin a sin uh hi.

ROM (Romans) 4:12

vun atna a thuak tham loin i pa Abraham in vun atna a thuak nai loh lai takin upna lam a zuite khempeuh’pa uh a suah nading ahi zongin, Abraham in vun atna a thuak nai loh lai takin upna a neih dikna-a ciamtehna ahi vun atna lim a ngah hi.

Jeremiah 2:25

Na khe guakin lam pai kei in la, na dang taksak kei in, kong cih hangin, nangmah in, ‘Bang phamawh hiam? Khual mite ka it a, amau’ nung ka zui ding hi,’ na ci hi.

1 KUMPI MASATE 8:36

vantung pan za-in na mi Israel, na nasemte’ khialhna maisak in la, amaute’ zuih ding lampi hoih hilh in; tua ciangin na mite tungah gamh-in na piaksa leitang tungah guah zusak in.

Late 116:7

Lungmuang takin ka om ding hi; bang hang hiam cih leh kei tungah Topa hong thunuam hi.

Jeremiah 12:16

Tua ciangin, ka mite’ omdan hoih takin a sin uh a, Baal min tawh kiciam dingin ka mite a sinsak mah bangun ‘Topa a nuntak bangin,’ ci-a kei’ min tawh kiciam ding a sin uh leh ka mite’ lakah kip takin a om ding uh hi.

Jeremiah 31:21

“Lampi-ah ciamtehna bawl un la, lam lahnate phut un. Na paikhiatna uh lampi mah limtakin hong zong kik un. Hong kilehkik un, nungak siangtho tawh a kibang Israel mite aw, na khuapi uh hong zuankik un.

Jeremiah 42:3

Topa na Pasian in ka lam pai nading uh ahi zongin, ka nasep nading uh ahi zongin a hong lah nadingin thu hong ngetsak in,” a ci uh hi.

Jeremiah 50:5

Zion khua lampi a dong ding uh a, tua khua lam maingat-in, ‘Hong pai un. A kimangngilh ngei nawn lo ding tawntung thuciamna khat Topa’ tungah ciam khawm dih ni,’ a ci ding uh hi.

Thukhente 2:17

Ahi zongin amaute in a thukhente uh thu ngai lo uh hi; bang hang hiam cih leh amaute in pasian dangte tawh paktatna gamta-in tuate mai-ah kun uh hi; Topa’ thupiakna a mang amau’ pute pate’ tot lampi panin amaute pial pah uh hi, amaute in Topa’ thu mang lo uh hi.

2 KHANG TANGTHU NIHNATE 19:11

En un, Topa’ thu tawh kisai thute khempeuh ah siampi lian Amariah in no tungah om hi, tua ciangin kumpipa tawh kisai thute khempeuh ah Judah mite a ukpa Ishmael’ tapa Zebadiah om hi; tua ciang Levi mite in note tungah ulian na hong sem ding uh hi. Hang takin gamta un, thumante tawh Topa hong om ta hen!” a ci hi.

Isaiah 46:9

Hun lui nate phawk un; bang hang hiam cih leh keimah in Pasian ka hi a, a dang om lo hi; keimah in Pasian ka hi a, kei tawh a kibang a dang om lo hi.

Isaiah 57:2

nopsakna sungah amah tum hi, thutang-a gamta mite in a sihna uhah nopna ngahin tawlnga uh hi.

Jeremiah 7:3

A vanglian Topa, Israel mite’ Pasian in hih bangin hong ci hi. Na nuntakzia uh leh na gamtatnate uh kikhel un. Tua hi leh hih munah kong teengsak bek ding hi.

Jeremiah 7:24

Ahih hangin amaute in ka thu hong mang lo uh a, a bil uh hong ngat lo uh hi. Amau’ gitlohna lungsim uh zui-in amau’ thuthu-in a omzaw uh a, mainawt loin a nungkin zaw uh hi.