Jeremiah 50:5 - Tedim Bible

⁵ Zion khua lampi a dong ding uh a, tua khua lam maingat-in, ‘Hong pai un. A kimangngilh ngei nawn lo ding tawntung thuciamna khat Topa’ tungah ciam khawm dih ni,’ a ci ding uh hi.

Tedim Bible Revision 2017

⁵ Zion khua lampi a dong ding uh a, tua khua lam maingatin, ‘Hong pai un. A kimangngilh ngei nawn lo ding tawntung thuciamna khat Topaʼ tungah ciam khawm dih ni,’ a ci ding uh hi.

Jeremiah 50:5 Referans Kwoze

Jeremiah 32:40

Amaute’ tungah a tawntungin hoihna ka bawl det nadingin amaute tawh tawntung thuciamna khat ka bawl ding hi. Kei’ kiang panin a kiheikhiat loh nadingun amaute’ sungah kei hong zahtakna lungsim ka koih ding hi.

Isaiah 55:3

Ka mite aw, ka thu ngai un la, kei kiangah hong pai un; nuntakna na ngah theih nadingun hong za un; David tungah ka kamciam mah bangin, keima itna kip ahi tawntung thuciamna note tawh ka bawl ding hi.

Isaiah 35:8

Tua lai-ah lam lianpi khat om ding a, Lampi Siangtho kici ding hi; a siang lo mite in tua tung tawn ngei lo ding a, mi haite in tua lam a zui mite khialsak nawn lo ding hi.

Jeremiah 6:16

Topa in mite tungah, “Lamka bomah ding un la, khuadak un. Lam hoih ahi, lampi luite dong un la, tawn un. Na kha uh ading tawldamna na mu ding uh hi,” a ci hi. Ahih hangin amau in, “Ka tawn kei ding uh hi,” a ci uh hi.

Piancilna 17:7

Nang leh nang’ khit cianga na suan-le-khakte' tungah Pasian ka hihna ding tawntung thuciam nadingin kei leh nang leh nang’ khit cianga na suan-le-khakte’ kikal-ah amau' khang tawntungin ka thuciamna ka kipsak ding hi.

2 KORIN NIHNA 8:5

Tua bang a hih uh ciangin kote lawpna zah tham loin a hih uh a, Pasian deihna tawh kituakin a masa-in Pasian kiangah ahi zongin, kote kiangah ahi zongin, amau mahmah hong kipia uh hi.

Sawltak 11:23

Barnabas a tun’ ciangin Pasian’ hehpihna thupha a muh ciangin a lungdamin amaute in a lungsim tawh Pasian beel dingin mi khempeuh a hansuah hi.

Johan 7:17

Mi khatpeuh mah in Pasian’ deih bangin a gamtat nop leh, hih thu Pasian’ thu ahi hiam, keima utthu banga gen ka hi hiam a thei ding hi.

Late 84:7

Amaute a tha uh hat semsem hi; Zion-ah pasiante’ Pasian kimu ding hi.

1 KUMPI MASATE 19:14

Amah in, “Vanglianpen Pasian, Topa adingin ka huaiham mahmah hi; bang hang hiam cih leh Israel mite in na thuciamna nusia-in, na biakna taute lawnkhia a, namsau tawh na kamsangte that hi; kei, kei bekbek ka om lai hi; amaute in kei thah dingin hong zong uh hi,” a ci hi.

1 KUMPI MASATE 19:10

Amah in, “Vanglianpen Pasian, Topa adingin ka huaiham mahmah hi; bang hang hiam cih leh Israel mite in na thuciamna nusia-in, na biakna taute lawn khia a, namsau tawh na kamsangte that hi; kei, kei bekbek ka om lai hi; amaute in kei thah dingin hong zong uh hi,” a ci hi.

2 SAMUEL NIHNA 23:5

Hi hi, ka innkuan zong Pasian tawh tua bangmah hilo ahi hiam? Bang hang hiam cih leh amah in tawntung thuciamna kei tawh hong bawl a, na khempeuh a hoih a kipin hih hi. Bang hang hiam cih leh keimah hong huhin, ka deihna khempeuh tangtungsak ding hilo ahi hiam?

Jeremiah 3:18

Tua hun ciangin Judah mite in Israel mite hong pawlpih ding uh a, leilu lam gam panin na pute na pate-uh’ luah dinga ka piak sa gamah hong paikhawm ding uh hi.

Jeremiah 31:6

Bang hang hiam cih leh Efraim mualtung panin gal vilte in, ‘Tho un! Zion khua-ah, Topa, i Pasian kiangah va pai ni,’ ci-a hong kiko hun uh hong tung ding hi,” a ci hi.

Jeremiah 31:21

“Lampi-ah ciamtehna bawl un la, lam lahnate phut un. Na paikhiatna uh lampi mah limtakin hong zong kik un. Hong kilehkik un, nungak siangtho tawh a kibang Israel mite aw, na khuapi uh hong zuankik un.

Ezekiel 16:61

Na u nu leh na nau nu na ngahkik ciangin na gamtatnasa teng phawk kikin na mai a zum ding hi. Nang tawh i thuciamna sungah a kihel loh hangin amaute pen nangma tanu bangin hong om ding uh hi.

Ezekiel 37:22

Israel mual tung gamah, amaute minam khatin ka gawmkik ding hi. Amaute in a uk ding khat nei ding uh a, amaute minam nih-in kikhen nawn lo ding uh a, kumpi nih-in kikhen nawn lo ding uh a, kumpi gam nih-in zong kikhen nawn lo ding uh hi.

Hosea 1:11

Judah mite leh Israel mite kigawm kik ding uh a, amaute a makai dingin mi khat seh ding uh hi; amaute khangin ci-thei kik ding uh a, tua Jezre-el hun pen a nuam mahmah hun hi ding hi.

Hosea 3:5

Tua khit ciangin Israel mite in Topa amau’ Pasian leh a kumpipa uh David lamah hong kihei kik ding uh hi. Tua hun ciangin amaute in Topa zahtakin, ama letsongte sang ding uh hi.

Hosea 6:1

“Hong pai un, Topa kiangah ciahkik ni; amah in eite hong balgawp hangin hong damsak kik ding a, eite hong liamsak hangin i liamnate hong tun’sak kik ding hilo ahi hiam?