Jeremiah 5:1 - Tedim Bible

¹ Jerusalem khua sungah kileh kawikawi un. Khuadak un la, en dih un! A thuman gamtat leh thuman a zong mi khat beek na mu uh hiam, zong dih un. Na muh uh leh tua khua a mawhna ka maisak ding hi.

Tedim Bible Revision 2017

¹ Jerusalem khua sungah kileh kawikawi un. Khuadak unla en dih un! A thuman gamtat leh thuman a zong mi khat beek na mu uh hiam, zong dih un. Na muh uh leh tua khuaʼ mawhna ka maisak ding hi.

Jeremiah 5:1 Referans Kwoze

Ezekiel 22:30

Keimah in ka hehna tawh ka suksiat ding hun ciangin kulh a ciang zo ding, kulh a kicipna munah a ding zo ding, leh gamsung a hu zo ding mi khat amaute lakah ka zong a, ahi zongin tua bang ding mi khat beek ka mu kei hi.

2 KHANG TANGTHU NIHNATE 16:9

Bang hang hiam cih leh ama lamah a lungsim a paubang lo mite’ tangin ama vangliatna a lak dingin Topa’ mit in leitung khempeuh en kawikawi hi. Hih thu-ah na hai gamtat khin hi; bang hang hiam cih leh tu-a kipanin galdonate na nei ding hi,” a ci hi.

Isaiah 59:4

Kuamah in thutang tawh thu na nei kei uh a, thuman tak tawh kuamah thukhen zumah na pai kei uh hi; note in bangmah lopi suan’in nei-in zuau thu na gen uh a, siat nading thu ngaihsunin, gitlohna na piangsak uh hi.

Late 14:3

Amaute a vekpi-in puk khin uh a, a kibangin kisia kim uh hi; a hoih gamtat khat beek om lo hi.

Paunak 20:6

Mi khempeuh in mi citakin kigen kim uh hi; ahi zongin a citak takpi ding mi kimu zo ding ahi hiam?

Late 12:1

Topa aw, hong huh in, bang hang hiam cih leh mihing’ tate lak panin mi thumante mangthang a, mipha khat beek om nawn lo hi.

2 THESALONIKA NIHNA 2:10

kisiatna a ngah mite ading diklohna khemna apawl pawlte tawh ahi zongin a piang ding hi. Bang hang hiam na cih uh leh, tua mite in gupna a ngah nadingun ki-itna tawh kipawl thuman a sang kei uh hi.

Luka 14:21

Nasempa ciah a, tua thu khempeuh a topa a zasak hi. Tua lai takin inn teekpa heh a, “Khua sung lamlian ah ahi zongin, lamneu ah ahi zongin pai in la, mizawngte, mipoite, mittawte, khebaite hong tumpih in,’ ci-in a nasempa sawl hi.

Zekhariah 2:4

Tua ciangin vantungmi a masapa in a dawntuahpa kiangah, “Va tai in la, tehna khau a tawi tangvalpa kiangah hih thu va gen in, Jerusalem khua sungah mihing leh ganhing tam mahmah ding ahih manin Jerusalem kulh huam sungah ta zo lo ding uh hi.

Amos 8:12

Mihingte, leilu pan leitaw dong, nisuahna pan nitumna dong, Topa’ thu kanin vak kawikawi ding uh a, ahi zongin mu zo lo ding uh hi.

Joel 2:9

Khuapi sung hong kiden’na uh a, kulh tung khawngah tai zaizai uh hi. Inn tung khawngah kahto ngeingai uh a, guta bangin kongvangneu-ah hong lut uh hi.

Daniel 12:4

Tu-in Daniel aw, beina hun a tun’ mateng laibu khakcip in la, a tungah ciamtehna koih in. A kal lakah mi tampite’ pilna khangin, bang thu piang hiam cih thei tel nuamin kileh kawikawi ding uh hi,” hong ci hi.

Solomon la 3:2

Tho-in khua sung tengah ka vak a, kongzing kong kawm tengah ka pai a, ka ngaihno ka zong a, ka zon’zon’ hangin ka mu zo kei hi.

Paunak 23:23

Thuman, pilna, siamna, thu ngaihsut theihna lei in; tuate zuakkhiat dingin pammaih lua hi.

Paunak 8:3

khuapi lutna lampi gei-ah, mi omna kongpi tual-ah hong kiko a,

1 KUMPI MASATE 19:10

Amah in, “Vanglianpen Pasian, Topa adingin ka huaiham mahmah hi; bang hang hiam cih leh Israel mite in na thuciamna nusia-in, na biakna taute lawn khia a, namsau tawh na kamsangte that hi; kei, kei bekbek ka om lai hi; amaute in kei thah dingin hong zong uh hi,” a ci hi.

Jeremiah 2:29

“Bang hangin kei hong mawh sak khin na hi uh hiam? Na vekpi-un nong langpan’ khin uh hi. Topa in kong ci hi.

Jeremiah 44:15

Tua ciangin a zite un pasian dangte kiangah paknamtui a hal lam a thei papi khempeuh leh tua lai-a ding nupi khempeuh-a kipan Izipt gam leitaw lama teeng mi khempeuh, a vekpi-in mi tampi tak in Jeremiah’ kiangah:

Late 14:2

A pil gamtat, Pasian a zong a om uh hiam cih a theih nadingin Topa in vantung panin mihing’ tate ensuk hi.

Late 94:16

Kei adingin migilote do dingin kua kipan ahi hiam? Kei adingin siatna bawlte’ lang khatah kua ding ahi hiam?

Jeremiah 8:6

Amau’ thu gente ka ngaihsak a, kuamah in thuman gen lo uh hi. A gitlohna uh kuamah kisik lo a, ‘Bang hih ka hi hiam?’ ci lel uh hi. Sakol galsim ding a tai bangin amau’ tum ciat-in a pai uh hi.

Jeremiah 9:2

Sehnel gamlakah khawl nading bukno khat nei thei-in ka mite nusia-in taisan thei hi leng maw! A vekpi-un angkawm hat hi khin uh a, thuman lo kim uh hi.

Jeremiah 9:7

Tua ahih manin a vanglian Topa in a cih-inah: “En un, amaute a sian’tho nadingun ka suangtui dinga ka ze-et ding hi. Tua lo ka mite bang ka cih nawn ding hiam?

Ezekiel 9:9

Tua ciangin amah in hong dawng a, “Israel mite leh Judah mite’ mawhna nak liat mahmah hi. Gam sung khempeuh mi thahna tawh kidimsak uh a, Jerusalem khuapi, siatna namkim tawh kidimsak uh hi. Amaute in, ‘Topa in i gam susia khin a, Topa in eite hong mu lo hi,’ ci uh hi.